ఐపీఎల్ 2027 మినీ వేలానికి 7గురు దాయాది ఆటగాళ్లు.. ఆ వివాదం ముగిసినట్లేనా..?
Bangladesh 7 Players Register IPL 2027 Mini Auction: డిసెంబర్‌లో గోవా వేదికగా జరగనున్న IPL 2027 మినీ వేలానికి ముందు సంచలన పరిణామం చోటుచేసుకుంది. గత ఏడాది వివాదం తర్వాత ముస్తాఫిజుర్ రహమాన్‌తో సహా ఏడుగురు బంగ్లాదేశ్ ఆటగాళ్లు వేలంలో పాల్గొనేందుకు తమ పేర్లను నమోదు చేయడం క్రికెట్ వర్గాల్లో చర్చనీయాంశమైంది.
Updated on: Nov 13, 2026 | 12:40 PM
Bangladesh 7 Players Register IPL 2027 Mini Auction: ఇండియన్ ప్రీమియర్ లీగ్ అంటేనే డబ్బుల వర్షం. ప్రతి ఏడాది డిసెంబర్ నెల వస్తే చాలు ఫ్రాంచైజీల క్యాంపుల్లో వ్యూహాలు, ఆటగాళ్ల మార్కెట్లో హీట్ పెరుగుతాయి. ఈసారి డిసెంబర్‌లో గోవాలో జరగనున్న IPL 2027 మినీ వేలంపై ఇప్పటి నుంచే ఉత్కంఠ మొదలైంది. జట్లను పటిష్టం చేసుకునేందుకు ఫ్రాంచైజీలు భారీ పందాలు వేయడం ఖాయమనే సంకేతాలు వస్తున్నాయి. ఈ తరుణంలో బంగ్లాదేశ్ నుంచి వచ్చిన ఒక వార్త యావత్ క్రికెట్ ప్రపంచాన్ని ఆశ్చర్యానికి గురిచేసింది.
రంగంలోకి 7గురు బంగ్లా స్టార్లు..
విశ్వసనీయ మీడియా కథనాల ప్రకారం.. కట్టర్ పేసర్ ముస్తాఫిజుర్ రహమాన్‌తో సహా మొత్తం ఏడుగురు బంగ్లాదేశ్ ఆటగాళ్లు IPL 2027 వేలం కోసం తమ పేర్లను రిజిస్టర్ చేసుకున్నారు. బంగ్లాదేశ్ క్రికెట్ బోర్డు (బీసీబీ) కూడా ఇందుకు అధికారికంగా రిజిస్ట్రేషన్ ప్రక్రియను ప్రారంభించడం గమనార్హం.
బీసీబీ వర్గాల సమాచారం మేరకు.. ముస్తాఫిజుర్‌తో పాటు నహీద్ రాణా, రిషద్ హుస్సేన్, హసన్ మహమూద్, తౌహిద్ హృదయ్, టస్కిన్ అహ్మద్, షోరిఫుల్ ఇస్లాం వేలంలో అదృష్టాన్ని పరీక్షించుకోవాలని భావిస్తున్నారు. గత ఏడాది నెలకొన్న తీవ్ర వివాదం తర్వాత బంగ్లా ఆటగాళ్లు మళ్లీ భారత టీ20 లీగ్‌లో ఆడేందుకు ముందుకు రావడం ఇదే తొలిసారి.
బీసీసీఐ నుంచి బీసీబీకి ఫోన్.. తెరవెనుక ఏం జరిగింది?
ఈ వ్యవహారంలో అత్యంత కీలకమైన అంశం బీసీసీఐ పాత్ర. బీసీబీకి చెందిన ఒక సీనియర్ అధికారి మీడియాకు వెల్లడించిన వివరాల ప్రకారం.. IPL 2027 మినీ వేలానికి ముందు భారత క్రికెట్ నియంత్రణ మండలి బంగ్లాదేశ్ బోర్డును సంప్రదించింది.
“ఇది ఐపీఎల్ మినీ వేలానికి సంబంధించిన రెగ్యులర్ ప్రాసెస్. ఆసక్తి ఉన్న ఆటగాళ్ల పేర్లను రిజిస్టర్ చేయాలని బీసీసీఐ ప్రతి క్రికెట్ బోర్డును కోరింది. ముస్తాఫిజుర్ మినీ వేలం కోసం రిజిస్టర్ చేస్తున్నాడు. అవును, నహీద్ రాణా, రిషద్, హసన్, తౌహిద్, టస్కిన్, షోరిఫుల్ కూడా రిజిస్టర్ చేశారు” అని ఆ అధికారి స్పష్టం చేశారు.
అంటే గత చేదు అనుభవాలను పక్కనపెట్టి ఇరు బోర్డుల మధ్య క్రికెటింగ్ సంబంధాలు మళ్లీ గాడిన పడుతున్నాయనే సంకేతం ఇది.
గత ఏడాది వివాదం.. ముస్తాఫిజుర్ రిలీజ్ వెనుక కథ..
ఈ నిర్ణయం ప్రాధాన్యతను అర్థం చేసుకోవాలంటే గత ఏడాది నాటి పరిణామాలను గుర్తుచేసుకోవాలి. IPL 2026 సీజన్‌కు ముందు భారత్-బంగ్లాదేశ్ మధ్య ద్వైపాక్షిక సంబంధాలు తీవ్ర ఉద్రిక్తతకు గురయ్యాయి. బంగ్లాదేశ్‌లో చెలరేగిన నిరసనల్లో మైనారిటీ హిందువులపై దాడులు జరిగాయన్న వార్తల నేపథ్యంలో బీసీసీఐపై తీవ్ర ఒత్తిడి పెరిగింది.
ఆ సమయంలో కోల్‌కతా నైట్ రైడర్స్ జట్టులో ఉన్న ముస్తాఫిజుర్ రహమాన్‌ను రిలీజ్ చేయాలని బీసీసీఐ ఆదేశించినట్లు వార్తలు వచ్చాయి. కేకేఆర్ సహ యజమాని, బాలీవుడ్ స్టార్ షారుఖ్ ఖాన్ కూడా సోషల్ మీడియాలో తీవ్ర ట్రోలింగ్ ఎదుర్కొన్నారు. చివరకు విమర్శలకు తెరదించేందుకు ఫ్రాంచైజీ సీజన్‌కు ముందే ముస్తాఫిజుర్‌ను జట్టు నుంచి తప్పించింది.
దీనికి ప్రతీకారంగానే బంగ్లాదేశ్ క్రికెట్‌లో పెద్ద దుమారం రేగింది. భారత్ వేదికగా జరిగిన ఐసీసీ టీ20 వరల్డ్‌కప్‌లో ఆడేందుకు బంగ్లాదేశ్ జట్టు నిరాకరించింది. భద్రతా కారణాలను చూపుతూ టోర్నీ నుంచి వైదొలగింది. ఆ పరిణామం ఇరు దేశాల క్రికెట్ సంబంధాల్లో ఒక చేదు అధ్యాయంగా మిగిలిపోయింది.
ఇప్పుడు పరిస్థితి మారిందా?
సీనియర్ క్రీడా పరిశీలకుల అంచనా ప్రకారం.. ఈ ఏడు పేర్ల నమోదు కేవలం వేలం తతంగం మాత్రమే కాదు. ఇది క్రికెట్ దౌత్యానికి సంకేతం. బంగ్లా పేసర్లకు ఐపీఎల్‌లో ఎప్పుడూ డిమాండ్ ఉంటుంది. ముస్తాఫిజుర్ లాంటి అనుభవజ్ఞుడు, నహీద్ రాణా లాంటి ఎక్స్‌ప్రెస్ పేసర్, రిషద్ లాంటి స్పిన్ ఆల్‌రౌండర్ ఫ్రాంచైజీల వ్యూహాల్లోకి సరిగ్గా సరిపోతారు.
గత వివాదాన్ని దాటుకుని వారు మళ్లీ వేలంలోకి రావడం ఐపీఎల్ విస్తరణకు, భారత-బంగ్లా క్రికెట్ సయోధ్యకు శుభ సంకేతంగా చెప్పవచ్చు. గోవా వేలం టేబుల్‌పై వారికి ఎంత ధర పలుకుతుందో వేచి చూడాలి.
మరిన్ని క్రీడా వార్తల కోసం ఇక్కడ క్లిక్ చేయండి..
