Virat Kohli : 85 సెంచరీలతో నయా హిస్టరీ.. సచిన్ టెండూల్కర్ రికార్డును కోహ్లీ బ్రేక్ చేయగలడా?
Virat Kohli : అంతర్జాతీయ క్రికెట్లో యాక్టివ్ ఆటగాళ్లలో అత్యధికంగా 85 సెంచరీలు సాధించిన విరాట్ కోహ్లీ అగ్రస్థానంలో నిలిచాడు. సచిన్ టెండూల్కర్ 100 సెంచరీల మహా రికార్డును కోహ్లీ అధిగమించగలడా? రోహిత్ శర్మ, జో రూట్, స్టీవ్ స్మిత్ సహా టాప్-7 బ్యాటర్ల పూర్తి జాబితా ఇదే.
Virat Kohli : క్రికెట్ చరిత్రలో ప్రతి యుగంలోనూ ఒక అసాధారణ బ్యాటర్ పుట్టుకొస్తాడు. తన అద్భుతమైన ఆటతీరుతో పాత రికార్డులన్నింటినీ బద్దలు కొడుతూ కొత్త చరిత్ర లిఖిస్తాడు. 2010వ సంవత్సరం తర్వాత అంతర్జాతీయ క్రికెట్లో అలాంటి ఒక సంచలనం సృష్టించిన రికార్డుల రారాజు కింగ్ విరాట్ కోహ్లీ. గత ఒకటిన్నర దశాబ్ద కాలంగా ప్రపంచ క్రికెట్ను తన చేతుల్లోకి తీసుకున్న కోహ్లీ.. పరుగులు పారించడంలో, సెంచరీలు, హాఫ్ సెంచరీల వర్షం కురిపించడంలో ఎన్నో మైలురాళ్లను అందుకున్నాడు. ప్రస్తుతం అంతర్జాతీయ క్రికెట్లో కొనసాగుతున్న ఆటగాళ్లందరిలోనూ అత్యధిక సెంచరీలు చేసిన మొనగాడిగా విరాట్ కోహ్లీ ప్రపంచ రికార్డు సృష్టించాడు. మూడు ఫార్మాట్లలోనూ తన క్లాస్ చూపించి ప్రపంచంలోని మేటి బౌలర్లను సైతం బెంబేలెత్తించాడు.
ప్రస్తుతం ఆడుతున్న క్రికెటర్ల గణాంకాలను పరిశీలిస్తే, ఇంటర్నేషనల్ క్రికెట్లో అత్యధిక శతకాలు బాదిన టాప్-7 బ్యాటర్ల జాబితాలో ఎందరో దిగ్గజాలు చోటు సంపాదించుకున్నారు. ఈ ప్రతిష్టాత్మక లిస్టులో టీమిండియా రన్ మెషిన్ విరాట్ కోహ్లీ 85 సెంచరీలతో మొదటి స్థానంలో గంభీరంగా నిలిచాడు. కోహ్లీ తన కెరీర్లో వన్డేల్లో రికార్డు స్థాయిలో 54 సెంచరీలు, టెస్ట్ క్రికెట్లో 30 సెంచరీలు, టీ20 అంతర్జాతీయ మ్యాచ్లలో 1 సెంచరీ సాధించాడు. ఈ జాబితాలో ఇంగ్లాండ్కు చెందిన క్లాసిక్ బ్యాటర్ జో రూట్ 61 అంతర్జాతీయ సెంచరీలతో రెండో స్థానంలో ఉన్నాడు. జో రూట్ ఇప్పటికే ఇంగ్లాండ్ తరఫున అత్యధిక సెంచరీలు చేసిన రికార్డును తన పేరిట లిఖించుకున్నాడు.
ఈ ప్రత్యేకమైన లిస్టులో భారత జట్టు స్టార్ ఓపెనర్, మాజీ కెప్టెన్ రోహిత్ శర్మ మూడో స్థానంలో నిలిచాడు. హిట్ మ్యాన్ అంతర్జాతీయ క్రికెట్లో సెంచరీల హాఫ్ సెంచరీని, అంటే 50 సెంచరీలను పూర్తి చేసుకున్నాడు. ప్రస్తుతం యాక్టివ్గా ఉన్న క్రికెటర్లలో విరాట్ కోహ్లీ, జో రూట్ మినహా రోహిత్ శర్మ ఒక్కడే 50 లేదా అంతకంటే ఎక్కువ సెంచరీలు చేసిన ఘనత సాధించాడు. అతని తర్వాత ఆస్ట్రేలియా రన్ మెషిన్ స్టీవ్ స్మిత్ 49 సెంచరీలతో నాలుగో స్థానంలో కొనసాగుతున్నాడు. స్మిత్ ప్రస్తుతం రోహిత్ శర్మ రికార్డును బ్రేక్ చేయడానికి కేవలం ఒకే ఒక్క సెంచరీ దూరంలో ఉన్నాడు.
ఈ జాబితాలో ఐదో స్థానంలో పాకిస్థాన్ స్టార్ బ్యాటర్ బాబర్ ఆజం నిలిచాడు. అతని ఖాతాలో ప్రస్తుతం 32 అంతర్జాతీయ సెంచరీలు ఉన్నాయి. అలాగే దక్షిణ ఆఫ్రికాకు చెందిన దూకుడు గల వికెట్ కీపర్ బ్యాటర్ క్వింటన్ డికాక్ 31 సెంచరీలతో ఆరో స్థానంలో నిలవగా, వెస్టిండీస్కు చెందిన ఆశాకిరణం షాయ్ హోప్ 25 సెంచరీలతో ఈ ఎలైట్ లిస్టులో ఏడో స్థానాన్ని దక్కించుకున్నాడు. కింగ్ కోహ్లీ ఈ లిస్టులో అందరికంటే చాలా ముందున్నప్పటికీ, అతను ఇప్పటికే టీ20, టెస్ట్ ఫార్మాట్ల నుంచి రిటైర్మెంట్ ప్రకటించాడు. ఈ నేపథ్యంలో క్రికెట్ దేవుడు సచిన్ టెండూల్కర్ నెలకొల్పిన 100 సెంచరీల మహా రికార్డును కోహ్లీ బ్రేక్ చేయడం ఇకపై దాదాపు అసాధ్యమనే చెప్పాలి. ఎందుకంటే కోహ్లీ ఇప్పుడు కేవలం వన్డే ఫార్మాట్లో మాత్రమే దేశానికి ప్రాతినిధ్యం వహిస్తున్నాడు. ఇదే పరిస్థితి రోహిత్ శర్మకు కూడా వర్తిస్తుంది, హిట్ మ్యాన్ కూడా ఇప్పుడు కేవలం వన్డే క్రికెట్పైనే పూర్తి దృష్టి సారించాడు.
మరిన్ని క్రీడా వార్తల కోసం ఇక్కడ క్లిక్ చేయండి..