Rama Ekadashi: నేడు రమా ఏకాదశి.. ఈ వ్రతం ఆచరిస్తే లక్ష్మీ కటాక్షంతో సిరిసంపదలు!
Rama Ekadashi Significance And Puja Vidhi Telugu: 2026 రమా ఏకాదశి నవంబర్ 5న వచ్చింది. ఈ పవిత్రమైన రోజున శ్రీమహావిష్ణువుతో పాటు లక్ష్మీదేవిని పూజించడం వల్ల సిరిసంపదలు, సుఖసంతోషాలు కలుగుతాయని భక్తుల విశ్వాసం. రమా ఏకాదశి ప్రాముఖ్యత, పూజా విధానం, ఉపవాస నియమాలు, శోభనుడి వ్రత కథ గురించి తెలుసుకుందాం.
Rama Ekadashi Significance Telugu: హిందూ ధర్మంలో ఏకాదశి తిథికి ఎంతో విశిష్టమైన స్థానం ఉంది. ముఖ్యంగా శ్రీమహావిష్ణువును ఆరాధించడానికి ఏకాదశి అత్యంత పవిత్రమైన రోజుగా భావిస్తారు. ప్రతి నెలలో శుక్లపక్షం, కృష్ణపక్షంలో ఒక్కొక్క ఏకాదశి చొప్పున రెండు ఏకాదశులు వస్తాయి. ఒక్కో ఏకాదశికి ప్రత్యేకమైన పేరు, విశిష్టత, వ్రత ఫలితం ఉంటాయి. అలాంటి పవిత్రమైన ఏకాదశుల్లో ఆశ్వయుజ మాసంలో వచ్చే బహుళ ఏకాదశి ఒకటి. దీనినే రమా ఏకాదశిగా పిలుస్తారు. ఈ రోజున శ్రీమహావిష్ణువుతో పాటు లక్ష్మీదేవిని భక్తిశ్రద్ధలతో పూజించడం వల్ల సిరిసంపదలు, సుఖసంతోషాలు కలుగుతాయని భక్తుల నమ్మకం. మరి ఈ ఏడాది రమా ఏకాదశి ఎప్పుడు? ఈ వ్రతాన్ని ఎలా ఆచరించాలి? దీని వెనుక ఉన్న పురాణ కథ ఏమిటో తెలుసుకుందాం.
రమా ఏకాదశి ఎప్పుడు?
2026 సంవత్సరంలో నవంబర్ 5, గురువారం నాడు రమా ఏకాదశి వ్రతాన్ని ఆచరించనున్నారు. ఆశ్వయుజ బహుళ ఏకాదశి తిథి ఈ రోజున ఉండటంతో భక్తులు ఉపవాస దీక్ష చేపట్టి శ్రీలక్ష్మీనారాయణులను ఆరాధిస్తారు.
రమా ఏకాదశి విశిష్టత
లక్ష్మీదేవికి ఉన్న పవిత్రమైన నామాల్లో రమా అనే పేరు కూడా ఒకటి. అందుకే ఆశ్వయుజ బహుళ ఏకాదశికి రమా ఏకాదశి అనే పేరు వచ్చింది. ఈ రోజున లక్ష్మీనారాయణులను పూజించడం వల్ల అమ్మవారి కటాక్షంతో పాటు శ్రీమహావిష్ణువు అనుగ్రహం లభిస్తుందని పురాణాలు పేర్కొంటున్నాయి. ఈ వ్రతాన్ని నియమనిష్ఠలతో ఆచరిస్తే పాపాలు తొలగి, మరణానంతరం ఉత్తమ గతులు లభిస్తాయని ఆధ్యాత్మిక విశ్వాసం.
రమా ఏకాదశి పూజా విధానం
ఈ పవిత్రమైన రోజున తెల్లవారుజామునే నిద్రలేచి తలస్నానం చేయాలి. ఇంటిని, పూజామందిరాన్ని శుభ్రం చేసుకోవాలి. పసుపు రంగు వస్త్రాలు ధరించి శ్రీలక్ష్మీనారాయణుల చిత్రపటం లేదా విగ్రహం ఎదుట ఉపవాస దీక్షను ప్రారంభించాలి. ముందుగా ఆవు నెయ్యితో దీపం వెలిగించి పసుపు రంగు పూలు, తులసి దళాలతో స్వామివారిని అలంకరించాలి. శ్రీలక్ష్మీ అష్టోత్తరం, విష్ణు సహస్రనామాలను పఠించాలి. అనంతరం కొబ్బరికాయ, చక్రపొంగలి, పులిహోర, శనగలను నైవేద్యంగా సమర్పించాలి. కర్పూర హారతి ఇచ్చి కుటుంబమంతా సుఖసంతోషాలతో ఉండాలని ప్రార్థించాలి.
రమా ఏకాదశి వ్రత కథ
పురాణాల ప్రకారం పూర్వం ముచుకుందుడు అనే విష్ణుభక్తుడైన రాజు ఉండేవాడు. ఆయనకు చంద్రభాగ అనే కుమార్తె ఉండేది. ఆమెను శోభనుడు అనే యువకుడికి ఇచ్చి వివాహం చేశాడు. ఒకసారి శోభనుడు భార్యతో కలిసి మామగారి రాజ్యానికి వెళ్లాడు. ఆ సమయంలో రమా ఏకాదశి కావడంతో రాజ్యంలో ప్రతి ఒక్కరూ ఉపవాసం ఉండాలనే నియమం అమలులో ఉండేది. శోభనుడు శారీరకంగా బలహీనుడు కావడంతో ఉపవాసాన్ని తట్టుకోలేక ఆ రాత్రి మరణించాడు. అయితే రమా ఏకాదశి వ్రత మహిమ కారణంగా మరణానంతరం మందరాచల పర్వతంపై అద్భుతమైన దివ్యనగరాన్ని పొందాడు. అక్కడ సకల భోగభాగ్యాలను అనుభవించసాగాడు.
కొంతకాలానికి సోమశర్మ అనే బ్రాహ్మణుడు తీర్థయాత్రల్లో భాగంగా ఆ ప్రాంతానికి వెళ్లి శోభనుడిని గుర్తించాడు. అతనికి లభించిన దివ్య వైభవం గురించి ముచుకుందుడికి, చంద్రభాగకు తెలియజేశాడు. దీంతో చంద్రభాగ తన పుణ్యఫలంతో భర్తను చేరుకుంది. ఆమె చేసిన సత్కర్మల ప్రభావంతో శోభనుడి రాజ్యం శాశ్వతమైన దివ్య వైభవాన్ని పొందిందని పురాణ కథనం.
ఉపవాసం, దానధర్మాలు తప్పనిసరి
రమా ఏకాదశి రోజున శక్తిని బట్టి ఉపవాసం పాటించాలి. శ్రీహరి నామస్మరణ, భగవద్గీత పఠనం, భజనలు చేయాలి. పేదలకు అన్నదానం చేయడం, బ్రాహ్మణులకు దక్షిణ, గోదానం వంటి దానధర్మాలు చేయడం శుభప్రదంగా భావిస్తారు. మరుసటి రోజు ద్వాదశి తిథిలో పారణ చేసి ఉపవాస దీక్షను విరమించాలి. ఇలా భక్తి, నియమం, నిష్ఠలతో రమా ఏకాదశి వ్రతాన్ని ఆచరించడం వల్ల లక్ష్మీనారాయణుల అనుగ్రహం లభించి జీవితంలో సుఖశాంతులు, ఐశ్వర్యం కలుగుతాయని భక్తుల విశ్వాసం.
(Disclaimer: వ్రత విధానాలు, ఫలితాలు సంప్రదాయాలు, పురాణ విశ్వాసాల ఆధారంగా ఇవ్వబడ్డాయి. వ్యక్తిగత నిర్ణయాలు తీసుకునేముందు సంబంధిత నిపుణులను సంప్రదించడం మంచిది.)