దేశ విదేశాల్లో ప్రయాణిస్తూ బంగారం కొనాలనుకుంటున్నారా? అయితే ఈ 5 దేశాలకు మీ టూర్ ప్లాన్ చేసుకోండి!
మీరు ప్రయాణ ప్రియులై ఉండి, బంగారం కొనడమంటే ఎక్కువ ఇష్టమా..? అయితే, ఈ వార్త మీ కోసమే.. కొంతమంది తమ సొంత దేశంలో కంటే బంగారం చౌకగా లభించే దేశాలకు ప్రత్యేకంగా ప్రయాణిస్తారని తెలిస్తే మీరు ఆశ్చర్యపోవచ్చు. సౌందర్య సాధనంగానే కాకుండా సురక్షితమైన పెట్టుబడిగా, దేశాల ఆర్థిక పటిష్టతకు బంగారం అత్యంత కీలకమైనది. బంగారం డిమాండ్ ఎంతగా వార్తల్లో నిలుస్తుందో, దాని సరఫరా కూడా అంతే ఆసక్తికరంగా ఉంటుంది. వరల్డ్ గోల్డ్ కౌన్సిల్ (WGC) నివేదికల ప్రకారం, ప్రపంచవ్యాప్తంగా ప్రతి ఏటా వేల టన్నుల బంగారం మైనింగ్ ద్వారా వెలికితీస్తుంటారు. అయితే ఇందులో కొన్ని దేశాలు మాత్రమే భారీ స్థాయిలో బంగారాన్ని ఉత్పత్తి చేస్తూ గ్లోబల్ మార్కెట్ను శాసిస్తున్నాయి. ఈ రేసులో చైనా సుమారు 380 టన్నుల వార్షిక ఉత్పత్తితో ప్రపంచంలోనే నంబర్ వన్ స్థానంలో కొనసాగుతోంది.
ప్రపంచవ్యాప్తంగా బంగారానికి ఉన్న క్రేజ్ గురించి ప్రత్యేకంగా చెప్పక్కర్లేదు. ముఖ్యంగా భారతదేశంలో పసిడిని లక్ష్మీదేవి స్వరూపంగా భావిస్తారు. కేవలం ఆభరణాల కోసమే కాకుండా డిజిటల్ ఇన్వెస్ట్మెంట్స్, టెక్నాలజీ రంగం, వివిధ దేశాల సెంట్రల్ బ్యాంకుల నిల్వల కోసం (Gold Reserves) బంగారం విరివిగా ఉపయోగపడుతుంది. అయితే, ఈ బంగారమంతా ఎక్కడి నుంచి వస్తుంది? ప్రపంచంలోనే అత్యధికంగా పసిడిని వెలికితీసే టాప్ 5 దేశాల వివరాలను ఇప్పుడు చూద్దాం..
చైనా (China): ప్రపంచంలోనే అత్యధికంగా బంగారాన్ని ఉత్పత్తి చేసే దేశాల జాబితాలో చైనా మొదటి స్థానంలో నిలిచింది. గణంకాల ప్రకారం చైనా ఏటా దాదాపు 380 టన్నుల బంగారాన్ని ఉత్పత్తి చేస్తోంది. ఇది ప్రపంచ మొత్తం ఉత్పత్తిలో దాదాపు 10 శాతానికి సమానం. చైనాలోని షాన్డాంగ్, హెనాన్, జాయోయాంగ్ వంటి ప్రాంతాలలో భారీ ఎత్తున బంగారు గనుల తవ్వకాలు జరుగుతాయి. ఇక్కడ ఆసక్తికరమైన విషయం ఏంటంటే, చైనా ఎంత బంగారం ఉత్పత్తి చేసినా, అంతకంటే ఎక్కువ బంగారాన్ని వినియోగిస్తుంది.
రష్యా (Russia): ఈ జాబితాలో రష్యా రెండో స్థానంలో ఉంది. రష్యా ఏటా సుమారు 310 నుండి 330 టన్నుల బంగారాన్ని మైనింగ్ ద్వారా వెలికితీస్తుంది. సైబీరియా, రష్యా తూర్పు ప్రాంతాలలో విస్తారమైన బంగారు నిల్వలు ఉన్నాయి. ప్రపంచంలోనే అత్యధిక ఖనిజ సంపద కలిగిన దేశాల్లో రష్యా ఒకటి.
ఆస్ట్రేలియా (Australia): మూడో స్థానంలో ఆస్ట్రేలియా నిలిచింది. ఈ దేశంలో ఏటా దాదాపు 280 నుండి 300 టన్నుల వరకు బంగారం ఉత్పత్తి అవుతుంది. వెస్ట్రన్ ఆస్ట్రేలియాలోని కాల్గూర్లీ (Kalgoorlie), బోడింగ్టన్ వంటి ఓపెన్-పిట్ గనులు దీనికి ప్రధాన వనరులు. ఆస్ట్రేలియా తన బంగారంలో ఎక్కువ భాగాన్ని ఆసియా దేశాలైన భారత్, చైనాలకు ఎగుమతి చేస్తుంది.
కెనడా (Canada): కెనడా నాలుగో స్థానంలో కొనసాగుతోంది. వైవిధ్యభరితమైన భౌగోళిక పరిస్థితులు ఉన్న కెనడాలో ఏటా 200 టన్నులకు పైగా బంగారం వెలికితీస్తున్నారు. అంటారియో, క్యూబెక్ ప్రాంతాలలోని గనులు కెనడా ఆర్థిక వ్యవస్థకు, జీడీపీకి భారీగా దోహదపడుతున్నాయి.
యునైటెడ్ స్టేట్స్ (USA): టాప్ 5 జాబితాలో అమెరికా చివరి స్థానంలో ఉంది. అమెరికా ఏటా సుమారు 160 నుండి 180 టన్నుల బంగారాన్ని ఉత్పత్తి చేస్తోంది. అమెరికాలో లభించే మొత్తం బంగారంలో దాదాపు 75 శాతం ఒక్క నెవాడా (Nevada) రాష్ట్రంలోని గనుల నుంచే రావడం విశేషం. బంగారం ఉత్పత్తి అనేది కేవలం ఆయా దేశాల సంపదను పెంచడమే కాకుండా, ప్రపంచ మార్కెట్లో కరెన్సీ విలువలను స్థిరంగా ఉంచడంలో మరియు అంతర్జాతీయ వ్యాపారాలలో కీలక పాత్ర పోషిస్తుంది.