Truecaller: ట్రూకాలర్‌లో కొత్త ఏఐ ఫీచర్‌.. ఇకపై ఆ కాల్స్‌కి చెక్‌..
ప్రముఖ కాలర్‌ ఐడీ సంస్థ ట్రూకాలర్‌కు ఎలాంటి ఆదరణ ఉందో ప్రత్యేకంగా చెప్పాల్సిన పనిలేదు. దాదాపు స్మార్ట్ ఫోన్‌ ఉన్న ప్రతీ ఒక్కరూ ఈ యాప్‌ను ఉపయోగిస్తుంటారు. ఇక ఎప్పటికప్పుడు కొంగొత్త ఫీచర్లను అందిస్తూ యూజర్లను అట్రాక్ట్ చేస్తున్న ట్రూకాలర్‌ తాజాగా మరో కొత్త ఫీచర్‌ను తీసుకొచ్చింది. ఇంతకీ ఏంటీ ఫీచర్‌.? దీని ఉపయోగం ఏంటో ఇప్పుడు తెలుసుకుందాం..
ప్రస్తుతం చాలా మందిని స్పామ్‌ కాల్స్ సమస్య వేధిస్తోంది. ఈ స్పామ్‌ కాల్స్ కారణంగా మోసాలు కూడా జరుగుతున్నాయి. అందుకే ఇలాంటి కాల్స్‌కు కట్టడి చేయడానికి ఎన్ని చర్యలు తీసుకుంటున్నా ఫలితం ఉండడం లేదు.
అయితే ఇలాంటి కాల్స్‌కు చెక్‌ పెట్టడానికే ట్రూ కాలర్‌ కొత్త ఫీచర్‌ను తీసుకొచ్చింది. ఆర్టిఫిషియల్‌ ఇంటెలిజెన్స్‌తో రూపొందించిన ఈ ఫీచర్‌ సహాయంతో స్పామ్‌ కాల్స్‌కు చెక్‌ పెట్టొచ్చు.
ఈ కొత్త ఫీచర్‌ సహాయంతో స్పామ్‌ కాల్‌లను వాటంతటవే బ్లాక్ చేస్తుంది. అంతేకాకుండా స్పామర్‌లు, వాటి సంబంధిత కాల్స్ నుంచి రక్షణ కల్పించేలా ఈ కొత్త ఫీచర్‌ను రూపొందించారు.
మ్యాక్స్‌ అప్‌డేట్‌తో ఈ ఫీచర్‌ను ప్రస్తుతం ఆండ్రాయిడ్‌ ప్రీమియం స్‌బస్క్రైబర్‌ల కోసం తీసుకొచ్చారు. ఈ ఫీచర్‌ను కేవలం ప్రీమియం సబ్‌స్క్రైబర్స్‌ కోసం మాత్రమే అందుబాటులోకి తీసుకొచ్చే ఆలోచనలో ఉన్నట్లు తెలుస్తోంది.
ఈ కొత్త ఫీచర్‌ను యాప్ వెర్షన్ v13.58 లేదా తర్వాతి వెర్షన్ యూజర్లు ఈ సేవలను తీసుకురానున్నారు. ట్రూకాలర్‌ యాప్‌లో సెట్టింగ్స్ ఆప్షన్‌లో ఈ ఫీచర్‌ను ఎనెబుల్ చేసుకోవచ్చు. Max ని ఎంచుకున్న తర్వాత , యాప్ స్పామర్‌ల నుండి కాల్‌లను ఆటోమెటిక్‌గా బ్లాక్ చేస్తుంది.