Money Plant: మనీ ప్లాంట్తో నిజంగా సంపద పెరుగుతుందా.. మీరు పక్కా తెలుసుకోవాల్సిన విషయాలు ఇవే..
ప్రస్తుతం ఇండోర్ ప్లాంట్స్ అనగానే అందరికీ ముందుగా గుర్తొచ్చేది మనీ ప్లాంట్. అందమైన ఆకుపచ్చని రంగుతో ఇంటికి నిండుదనాన్ని ఇచ్చే ఈ మొక్క వెనుక కేవలం అలంకారమే కాదు.. అంతకు మించిన ఆరోగ్య, ఆధ్యాత్మిక ప్రయోజనాలు ఉన్నాయని మీకు తెలుసా? గాలిని శుద్ధి చేయడంలో దీనికి సాటి మరేదీ లేదని నిపుణులు చెబుతున్నారు. అసలు మనీ ప్లాంట్ ఇంట్లో ఉంటే కలిగే లాభాలేంటో, దానిని ఎలా కాపాడుకోవాలో ఇప్పుడు చూద్దాం.
సహజమైన ఎయిర్ ప్యూరిఫైయర్: మనీ ప్లాంట్లు కేవలం అందం కోసం మాత్రమే కాదు, మన ఇంట్లోని గాలిని శుద్ధి చేసే ఆక్సిజన్ ఫ్యాక్టరీలు. వాతావరణంలో ఉండే బెంజీన్, ఫార్మాల్డిహైడ్, కార్బన్ మోనాక్సైడ్ వంటి ప్రమాదకరమైన విష వాయువులను ఇవి పీల్చుకుంటాయి. తద్వారా మనకు స్వచ్ఛమైన గాలిని అందిస్తాయి.
వాస్తు, సానుకూల శక్తి: వాస్తు శాస్త్రం, ఫెంగ్ షుయ్ ప్రకారం.. మనీ ప్లాంట్ ఇంట్లో ఉండటం వల్ల సానుకూల శక్తి పెరుగుతుంది. ఇది ఇంట్లోని ప్రతికూలతను తొలగించి, ఆర్థిక వృద్ధికి, మానసిక ప్రశాంతతకు దోహదపడుతుందని చాలా మంది నమ్ముతారు. అంతేకాదు, టీవీలు, కంప్యూటర్ల నుండి వచ్చే రేడియేషన్ను తగ్గించే గుణం కూడా దీనికి ఉందని విశ్వసిస్తారు.
పెంచే విధానం: మనీ ప్లాంట్ ప్రత్యేకత ఏంటంటే.. దీనిని మట్టిలో లేదా నీటిలో కూడా పెంచవచ్చు. మట్టిలో పెంచితే నేల పై పొర ఎండినప్పుడు మాత్రమే నీరు పోయాలి. అతిగా నీరు పోస్తే వేరు కుళ్ళు తెగులు వచ్చి మొక్క చనిపోయే ప్రమాదం ఉంది. నీటిలో పెంచితే ప్రతి వారం లేదా పది రోజులకు ఒకసారి నీటిని మారుస్తూ ఉండాలి.
ఎండ తగలాలా? వద్దా?: చాలా మంది చేసే తప్పు ఏంటంటే మనీ ప్లాంట్ను నేరుగా ఎండలో పెట్టడం. ఈ మొక్కకు ప్రత్యక్ష సూర్యకాంతి అవసరం లేదు. ఇంటి లోపల వెలుతురు వచ్చే కిటికీల దగ్గర లేదా బాల్కనీలో నీడ ఉన్న చోట ఉంచితే ఇది ఏపుగా పెరుగుతుంది.
ఒత్తిడికి విరుగుడు: ఇంట్లో పచ్చదనం ఉండటం వల్ల కళ్లకు రిఫ్రెషింగ్గా ఉండటమే కాకుండా పని ఒత్తిడిని తగ్గిస్తుంది. మానసిక ఉల్లాసాన్ని ఇచ్చే ఈ చిన్న మొక్క మీ ఇంటి వాతావరణాన్ని మార్చేస్తుంది.