Lucky Zodiacs: మూడు కీలక గ్రహాల బలం..ఇక ఆ రాశుల వారికి తిరుగే ఉండదు..!
Telugu Astrology: ప్రస్తుతం ఓ రెండు నెలల పాటు మేషం, వృషభం, సింహం, తుల, ధనుస్సు, మకర రాశుల ప్రాభవం నడుస్తోంది. ఈ రాశుల వారు ఎటువంటి పోటీలోనైనా ఘన విజయం సాధించే అవకాశం ఉంది. ఆదాయంలో, ఉద్యోగంలో, వృత్తి, వ్యాపారాల్లో వీరిదే పైచేయిగా ఉంటుంది. వీరికి గురు బలంతో పాటు శని, రవుల బలం కూడా పెరుగుతున్నందువల్ల ఏ రంగంలో ఉన్నా వీరే ముందుంటారు. సమయం ఈ రాశులకు బాగా అనుకూలంగా ఉంది. మే చివరి వరకూ వీరి జీవితం విజయాలు, సాఫల్యాలతో సాగిపోయే అవకాశం ఉంది.
మేషం: ఈ రాశివారు ఉద్యోగంలో, బాధ్యతల నిర్వహణలో, లక్ష్యాలను పూర్తి చేయడంలో చాలా ముందుంటారు. కొత్త నైపుణ్యాలను అలవరచుకుంటారు. ప్రతిభా పాటవాలను, విషయ పరిజ్ఞానాన్ని పెంచు కుంటారు. ప్రయాణాలు చేయగలుగుతారు. ఆరోగ్యాన్ని కాపాడుకుంటారు. వీరి సమర్థత వల్ల ఉద్యోగంలో పదోన్నతులు పొందుతారు. వృత్తి, వ్యాపారాల్లో ఉన్నవారు సరికొత్త మార్పులతో రాబడిని పెంచుకునే అవకాశం ఉంది. వినూత్న ఆదాయ మార్గాలతో ఆదాయాన్ని పెంచుకోవడం జరుగుతుంది.
వృషభం: ఆదాయ వృద్ధి ప్రయత్నాల్లో ఈ రాశివారు తప్పకుండా ముందుంటారు. ధన, లాభ స్థానాలు బలంగా ఉన్నందువల్ల వీరు ఏ కొద్ది ప్రయత్నం చేపట్టినా సంపన్నులయ్యే అవకాశం ఉంది. వీరిలోని పట్టుదల, ఆత్మవిశ్వాసాలతో సరికొత్త ఆదాయ వృద్ధి ప్రయత్నాలను చేపట్టే అవకాశం ఉంది. ఉద్యోగంలో అధికారుల నమ్మకాన్నిచూరగొనడం, సమర్థత నిరూపించుకోవడం వల్ల ఇతరుల కంటే ఎక్కువగా జీతభత్యాలు పొందగలుగుతారు. వృత్తి, వ్యాపారాలు కొత్త పుంతలు తొక్కుతాయి.
సింహం: ఈ రాశివారు తమ కలలను సాకారం చేసుకోవడానికి చేయని ప్రయత్నం ఉండదు. విదేశీ ఉద్యోగం చేయాలన్న కలను నెరవేర్చుకుంటారు. ఉద్యోగంలో బాధ్యతలు, లక్ష్యాల్ని పూర్తి చేయడంలో వీరు సహోద్యోగుల కంటే ముందుంటారు. పోటీ పరీక్షలు, ఇంటర్వ్యూలలో ఘన విజయాలు సాధించగలుగుతారు. వీరి ఆశలు, ఆశయాలు చాలావరకు ఫలించి ఉన్నత పదవులు పొందడం, ఇతర దేశాలకు వెళ్లడం, సాధారణ స్థితినుంచి ఉన్నత స్థితికి ఎదగడం తప్పకుండా జరుగుతుంది.
తుల: ఈ రాశివారిలోని పట్టుదల, కర్తవ్యదీక్ష వల్ల వ్యాపారాలు, వాణిజ్యాలు కొత్త పుంతలు తొక్కుతాయి. పోటీదార్ల మీద పైచేయి సాధిస్తారు. వృత్తి జీవితంలో కూడా వీరికి పేరు ప్రఖ్యాతుల పెరుగుతాయి. వీరి వల్ల సంస్థకు పేరు వచ్చే అవకాశం ఉంది. ఉద్యోగంలో సరికొత్త మార్పులు, నైపుణ్యాలను ప్రవేశపెడతారు. వీరిలోని సృజనాత్మక శక్తి, ప్రతిభా పాటవాలు బాగా వృద్ధి చెందుతాయి. వీరు ఉద్యోగం చేసే సంస్థ వీరి సలహాలు, సూచనలతో దూసుకుపోతుంది. వీరికి షేర్లు బాగా లాభిస్తాయి.
ధనుస్సు: రాశ్యధిపతి గురువు మిథునంలో ఉండి ఈ రాశిని సప్తమ దృష్టితో వీక్షించడం వల్ల ఈ రాశివారు ఏ రంగంలో ఉన్నా అగ్ర స్థానానికి చేరుకునే అవకాశం ఉంది. వీరిలో యాంబిషన్ మరింతగా పెరిగి, కొత్త రంగాల్లో ప్రవేశించడం జరుగుతుంది. ఉద్యోగంలో ఉన్నత పదవులు పొందడంతో పాటు, వృత్తి, వ్యాపారాల్లో దూసుకుపోవడం తప్పకుండా జరుగుతుంది. వృత్తి, ఉద్యోగాలరీత్యా తరచూ విదేశాలకు వెళ్లే అవకాశం అధికారులు వీరికే ఇస్తారు. ఆదాయ వృద్ధిలో కూడా వీరే ముందుంటారు.
మకరం: ఈ రాశివారిలోని పట్టుదల, దీక్షాదక్షతలు పూర్తి స్థాయిలో రాణించడానికి అవకాశం కలుగుతుంది. ఎంతటి శ్రమకైనా ఓర్చి ఆదాయ మార్గాలను పెంచుకుంటారు. సరికొత్త నైపుణ్యాలను అలవరచుకుంటారు. లాభదాయక పరిచయాలు వృద్ధి చెందుతాయి. ప్రతి అవకాశాన్నీ సద్వినియోగం చేసుకునే అవకాశం ఉంది. సీనియర్ల కంటే బాగా ముందుండి పదోన్నతులు చేజిక్కించుకునే అవకాశం ఉంది. షేర్లు, స్పెక్యులేషన్లు, ఆర్థిక లావాదేవీల్లో దూరదృష్టితో వ్యవహరించి సక్సెస్ అవుతారు.