రాత్రిపూట చపాతీ తింటే నిజంగా బరువు తగ్గుతారా..? అసలు నిజాలు తెలుసుకోండి..
చాలా ఇళ్లలో ప్రతిరోజూ ఉండే అతి పెద్ద సందేహం.. రాత్రి పూట అన్నం తినాలా లేక చపాతీ తినాలా? రెండూ పోషక విలువలు కలిగినవే అయినప్పటికీ.. మన జీర్ణక్రియ, నిద్రపై ఇవి వేర్వేరు ప్రభావాలను చూపుతాయి. రాత్రి పూట చపాతీ తినడం బరువు తగ్గడానికి సహాయపడుతుందని చాలామంది నమ్ముతారు. అసలు ఇందులో నిజమెంత? అన్నం తింటే నిజంగానే బరువు పెరుగుతారా? ఈ వివరాలన్నీ ఇప్పుడు తెలుసుకుందాం.
గోధుమ లేదా మల్టీగ్రెయిన్ పిండితో చేసే చపాతీలలో ఫైబర్ పుష్కలంగా ఉంటుంది. ఫైబర్ నెమ్మదిగా జీర్ణం కావడం వల్ల రక్తంలో చక్కెర స్థాయిలు ఆకస్మికంగా పెరగవు. అంతేకాకుండా ఇది ఎక్కువసేపు కడుపు నిండిన అనుభూతిని ఇస్తుంది. దీనివల్ల ఆకలి వేయదు. బరువు తగ్గాలనుకునే వారికి ఇది చాలా మంచిది.
చపాతీలో ఫైబర్ ఎక్కువగా ఉండటం వల్ల జీర్ణం కావడానికి ఎక్కువ సమయం పడుతుంది. కాబట్టి బలహీనమైన జీర్ణవ్యవస్థ ఉన్నవారు రాత్రి పూట చపాతీలు తింటే గ్యాస్ లేదా ఉబ్బరం వంటి సమస్యలు వచ్చే అవకాశం ఉంది.
బియ్యంతో చేసే అన్నంలో ఫైబర్ తక్కువగా ఉంటుంది. కాబట్టి ఇది చాలా త్వరగా జీర్ణమవుతుంది. రాత్రి సమయంలో మన జీర్ణక్రియ నెమ్మదిగా పనిచేస్తుంది. అటువంటి సమయంలో త్వరగా జీర్ణమయ్యే అన్నం తినడం కడుపుకు చాలా తేలికగా ఉంటుంది. అలాగే ఇది సెరోటోనిన్ ఉత్పత్తికి సహాయపడి, మంచి నిద్ర పట్టేలా చేస్తుంది. అన్నం త్వరగా జీర్ణమైపోవడం వల్ల, తిన్న కొద్దిసేపటికే మళ్లీ ఆకలి వేసే అవకాశం ఉంది. అందుకే బరువు తగ్గాలనుకునే వారు రాత్రి పూట అన్నం మానేసి చపాతీ వైపు మొగ్గు చూపుతారు.
ఏది మంచిది? : ఆరోగ్య పరంగా చూస్తే అన్నం, చపాతీ రెండూ మంచివే. మీ శారీరక స్థితిని బట్టి ఎంచుకోవడం ముఖ్యం. అధిక బరువు లేదా షుగర్ ఉన్నవారు చపాతీని ఎంచుకోవడం ఉత్తమం. జీర్ణ సమస్యలు ఉన్నవారు రాత్రి పూట అన్నం తినడం అనుకూలంగా ఉంటుంది.
అన్నం లేదా చపాతీ.. ఏదైనా సరే మితంగా తినడం చాలా ముఖ్యం. వీటితో పాటు కూరగాయలు, ప్రోటీన్ ఉండేలా చూసుకోండి. అన్నింటికంటే ముఖ్యంగా పడుకునే ముందు కనీసం 2-3 గంటల ముందే రాత్రి భోజనం ముగించండి.