
కోట్లాది మందికి ఉదయం నిద్రలేవగానే ఒక కప్పు వేడివేడి టీ పడనిదే రోజు గడవదు. కొందరికి ఇది అలవాటు అయితే, మరికొందరికి అలసటను తీర్చే దివ్యౌషధం. అయితే పర్ఫెక్ట్ టీ తయారు చేయడంలో ముందుగా నీటిని మరిగించాలా, లేక పాలతో కలిపి మరిగించాలా అనే విషయంపై ఎప్పటినుంచో భిన్నాభిప్రాయాలు ఉన్నాయి. దీనికి ఒకే కచ్చితమైన సమాధానం లేకపోయినా, మనం ఎంచుకునే పద్ధతి టీ రుచిని, రంగును, చిక్కదనాన్ని పూర్తిగా మార్చేస్తుంది.

చాలా ఇళ్లలో అనుసరించే సాంప్రదాయ పద్ధతి ప్రకారం.. ముందుగా నీటిలో టీ ఆకులు వేసి బాగా మరిగిస్తారు. ఇలా చేయడం వల్ల టీ ఆకులలోని అసలైన సారం, రంగు పూర్తిస్థాయిలో బయటకు వస్తాయి. ఫలితంగా మంచి సువాసనతో కూడిన ఘాటైన, ముదురు రంగు టీ సిద్ధమవుతుంది. స్ట్రాంగ్గా, ఉత్తేజకరంగా ఉండే టీని ఇష్టపడేవారికి ఈ పద్ధతి అత్యుత్తమమైనది.

మరోవైపు టీ కొంచెం క్రీమీగా, మృదువుగా ఉండాలని కోరుకునేవారు పాలు, నీళ్లు కలిపి ఒకేసారి మరిగించే పద్ధతిని ఎంచుకుంటారు. ఈ విధానంలో టీ ఆకులు పాలలో నెమ్మదిగా ఉడకడం వల్ల చేదు తగ్గి, టీకి చిక్కటి ఆకృతి లభిస్తుంది. నిజానికి పాలు, నీళ్ల నిష్పత్తిని, మరిగించే సమయాన్ని, అలాగే అల్లం, యాలకుల వంటి మసాలాలను మన అభిరుచికి తగ్గట్టుగా మార్చుకుంటూ నచ్చిన రుచిని పొందవచ్చు.

ఇక టీ తయారీ పూర్తయ్యాక మిగిలిపోయే వాడిన టీ పొడిని చాలామంది వృథాగా పారేస్తుంటారు. కానీ దానిని తిరిగి ఎన్నో రకాలుగా ఉపయోగించుకోవచ్చని నిపుణులు చెబుతున్నారు. వాడిన టీ ఆకులను మరోసారి నీటిలో మరిగించి వడకట్టి, అందులో కొన్ని చుక్కల సుగంధ తైలం కలిపితే మొక్కలకు చక్కటి సహజ క్రిమిసంహారక స్ప్రేగా పనిచేస్తుంది.

అంతేకాకుండా ఇంట్లోని గాజు సామాన్లు, పింగాణీ పాత్రలను తళతళా మెరిసేలా చేయడానికి మరిగించిన టీ నీటిని నేచురల్ క్లీనర్గా వాడుకోవచ్చు. అలాగే వాడిన టీ పొడిని ఎండలో బాగా ఆరబెట్టి మొక్కలకు ఎరువుగా వేయడం వల్ల నేల సారవంతమవుతుంది. ఇందులో ఉండే టానిన్లు నేల ఆమ్లతను పెంచి, ముఖ్యంగా గులాబీల వంటి పూల మొక్కలు ఏపుగా పెరగడానికి, ఎక్కువ పూలు పూయడానికి ఎంతో దోహదపడతాయి.