ఏడాది పొడవునా మామిడి రుచి కావాలా? అయితే నోరూరించే ఒరుగుల ఇలా ఇంట్లోనే రెడీ చేసుకోండి!
మామిడి పండ్ల సీజన్ రాగానే మనం రకరకాల పచ్చళ్లు, ఆవకాయలు పెట్టుకుంటాం. అయితే, మామిడికాయను ఎండబెట్టి నిల్వ చేసుకునే ఒరుగులు ఎలా తయారు చేసుకోవాలో తెలుసా..? మామిడికాయలను ఎక్కువ కాలం నిల్వ ఉంచుకోవడానికి ఒరుగుల తయారీ పాతకాలపు పద్ధతి అయినా ఇప్పటికీ ఎంతో ప్రాచుర్యం పొందింది. వీటి తయారీ చాలా సులభం, ఆరోగ్యకరం కూడా. తెలంగాణ, మహారాష్ట్ర ఇతర ప్రాంతాల్లో ప్రాచుర్యం పొందిన ఈ పద్ధతిని మీరు కూడా ప్రయత్నించవచ్చు.
ఒరుగుల తయారీ విధానం: బాగా ముదిరిన, పుల్లగా ఉండే పచ్చి మామిడికాయలను ఎంచుకోవాలి.. వాటిని శుభ్రంగా కడిగి తడి లేకుండా తుడుచుకోవాలి. మామిడికాయ పైన తొక్క తీసేసి (మీకు ఇష్టమైతే తొక్కతో కూడా ఉంచవచ్చు), మీకు కావలసిన పరిమాణంలో సన్నని పొడవాటి ముక్కలుగా కోయాలి.
ఒక గిన్నెలో మామిడి ముక్కలను తీసుకుని, అందులో తగినంత ఉప్పు, కొంచెం పసుపు వేసి బాగా కలపాలి. ఉప్పు ముక్కలకు పట్టి నీరు ఊరుతుంది. ఈ ముక్కలను ఒక పొడి గుడ్డపై లేదా వెడల్పాటి ప్లేట్లో వేసి ఎండలో పెట్టాలి. ముక్కలు విడివిడిగా ఉండేలా చూసుకోవాలి. తేమ పూర్తిగా పోయి, ముక్కలు ముడుచుకుపోయి గట్టిగా అయ్యే వరకు (సుమారు 3-4 రోజులు) ఎండబెట్టాలి. పూర్తిగా ఎండిన ముక్కలను గాజు సీసాలో లేదా ప్లాస్టిక్ డబ్బాలో భద్రపరుచుకోవాలి.
మామిడి ఒరుగులను గ్రైండ్ చేస్తే స్వచ్ఛమైన ఆమ్చూర్ పొడి (Dry Mango Powder) తయారవుతుంది. దీనిని చాట్ మసాలాల్లో వాడవచ్చు. కొందరు పిల్లలు ఈ ఉప్పు, పసుపు కలిసిన ఎండిన ముక్కలను నేరుగా తినడానికి కూడా ఇష్టపడతారు.
ఒరుగులతో ఉపయోగాలు కూడా అనేకం ఉన్నాయి. మామిడికాయ పప్పు, సాంబార్, మామిడి ఒరుగుల పచ్చడి, మామిడి ఆవకాయ వంటి వంటకాల్లో వీటిని వాడతారు. చింతపండు అందుబాటులో లేనప్పుడు లేదా మామిడి పులుపు కావాలనుకున్నప్పుడు పప్పు, చారు లేదా మాంసాహార కూరల్లో వీటిని వేయవచ్చు. మామిడి రుచి ఏ మాత్రం తగ్గకుండా ఉంటుంది. పచ్చి మామిడికాయల పుల్లని, ఘాటైన రుచిని అలాగే కలిగి ఉంటాయి.
ఆరోగ్యపరంగా కూడా ఒరుగులు మంచివి. విటమిన్ సి, పెక్టిన్, యాంటీఆక్సిడెంట్లు పుష్కలంగా ఉంటాయి. కెమికల్స్ ఉండే నిల్వ పదార్థాల కంటే ఇలా ఇంట్లోనే సహజంగా మామిడిని భద్రపరుచుకోవడం ఆరోగ్యానికి ఎంతో మంచిది. మామిడి సీజన్ ముగియక ముందే మీరు కూడా మామిడి ఒరుగులను తయారు చేసి పెట్టుకోండి!