చుట్టాలు వచ్చారు.. టిఫిన్ చేయాలా ? 15 నిమిషాల్లో కరకరలాడే ఇన్స్టంట్ మసాలా దోసె రెడీ
ఉదయాన్నే లేవగానే ఏం బ్రేక్ఫాస్ట్ చేయాలా అని ఆలోచించడం ప్రతి ఇంట్లోనూ రోజూ ఉండేదే. ముఖ్యంగా వేడివేడిగా, కరకరలాడే హోటల్ స్టైల్ దోశ తినాలనిపించినప్పుడు.. ఇంట్లో దోశ పిండి సిద్ధంగా లేకపోతే చాలా నిరాశ కలుగుతుంది. ఎందుకంటే మామూలు దోశ పిండి కావాలంటే బియ్యం, మినప్పప్పు నానబెట్టి, రుబ్బి, రాత్రంతా పులియబెట్టాలి.
ఓపిక, సమయం లేనప్పుడు అప్పటికప్పుడు కేవలం మన వంటగదిలో ఉండే బొంబాయి రవ్వతో క్రిస్పీగా, నోరూరించే మసాలా దోశను తయారు చేసుకోవచ్చు. బ్యాచిలర్స్కైనా, ఆఫీసులకు వెళ్లేవారికైనా ఇదొక సూపర్ ఫాస్ట్ బ్రేక్ఫాస్ట్ ఆప్షన్. ఈ ఇన్స్టంట్ రవ్వ దోశను పర్ఫెక్ట్గా ఎలా చేయాలో ఇప్పుడు చూద్దాం.
కావలసిన పదార్థాలు: ఒక కప్పు బొంబాయి రవ్వ (ఉప్మా రవ్వ), పావు కప్పు బియ్యప్పిండి, రెండు చెంచాల మైదా పిండి, అర కప్పు పెరుగు, సన్నగా తరిగిన ఒక చిన్న ఉల్లిపాయ రెండు పచ్చిమిర్చి, కొద్దిగా అల్లం తురుము, కరివేపాకు, కొత్తిమీర, ఒక చెంచా జీలకర్ర, తగినంత ఉప్పు మరియు కాల్చడానికి నూనె లేదా నెయ్యి.
తయారీ విధానం: ముందుగా ఒక మిక్సింగ్ బౌల్ తీసుకుని అందులో బొంబాయి రవ్వ, బియ్యప్పిండి, మైదా పిండి వేసి బాగా కలుపుకోవాలి. బియ్యప్పిండి వేయడం వల్ల దోశకు మంచి క్రిస్పీనెస్ వస్తుంది. ఇప్పుడు ఇందులో అర కప్పు పెరుగు, తగినంత ఉప్పు వేసి, ఉండలు లేకుండా తగినన్ని నీళ్లు పోసి పల్చగా కలుపుకోవాలి. ఈ మిశ్రమం సాధారణ దోశ పిండిలా చిక్కగా ఉండకూడదు, బాగా పల్చగా (మజ్జిగలా) ఉండాలి. ఇలా కలిపిన పిండిని రవ్వ నానేందుకు వీలుగా ఒక 10 నుండి 15 నిమిషాల పాటు పక్కన పెట్టాలి.
రవ్వ బాగా నానిన తర్వాత పిండి మరికొంత చిక్కబడుతుంది. అప్పుడు అవసరమైతే మరికొన్ని నీళ్లు పోసి మళ్లీ పల్చగా చేసుకోవాలి. ఇప్పుడు ఈ పిండిలో సన్నగా తరిగిన ఉల్లిపాయ ముక్కలు, పచ్చిమిర్చి, అల్లం తురుము, జీలకర్ర, కరివేపాకు మరియు కొత్తిమీర వేసి బాగా కలుపుకోవాలి.
ఇప్పుడు స్టవ్ ఆన్ చేసి దోశ పెనం పెట్టుకుని బాగా వేడి చేయాలి. రవ్వ దోశ పర్ఫెక్ట్గా రావాలంటే పెనం బాగా వేడిగా ఉండాలి. పెనం వేడెక్కాక, మంటను హై-ఫ్లేమ్లోనే ఉంచి, పల్చటి పిండిని పెనంపై చుట్టూ జల్లుతున్నట్లుగా (పోస్తున్నట్లుగా) వేయాలి. మామూలు దోశలా దీన్ని గరిటెతో రుద్దకూడదు.
దోశ వేసిన తర్వాత పైనుండి కొద్దిగా నూనె లేదా నెయ్యి చల్లాలి. మంటను మీడియం ఫ్లేమ్లోకి మార్చి, దోశ మంచి గోల్డెన్ బ్రౌన్ కలర్ వచ్చే వరకు క్రిస్పీగా కాల్చుకోవాలి. మధ్యలో 2-3 టేబుల్ స్పూన్ల రెడీ చేసుకున్న బంగాళదుంప మసాలాను పెట్టండి. రవ్వ దోశను రెండో వైపు తిప్పాల్సిన అవసరం లేదు. ఎంతో కరకరలాడే కమ్మని ఇన్స్టంట్ రవ్వ దోశ సిద్ధం! దీన్ని వేడివేడిగా అల్లం చట్నీ లేదా కొబ్బరి చట్నీతో తింటే ప్లేట్లు ఖాళీ అవ్వాల్సిందే!