Indian Railways: ప్రయాణికులకు బిగ్‌ అలర్ట్.. ట్రైన్‌లో మొబైల్ ఛార్జింగ్‌పై ఆంక్షలు.. ఇవే కొత్త రూల్స్!
ఈ మధ్యకాలంలో రైలు బోగీల్లో పెరుగుతున్న అగ్ని ప్రమాదాల దృష్ట్యా రైల్వే శాఖ కీలక నిర్ణయం తీసుకుంది. ఈ ప్రమాదాలను తగ్గించేందుకు ఇకపై అన్ని రైళ్లలో రాత్రి వేళల్లో మొబైల్ ఛార్జింగ్ పాయింట్లను తప్పనిసరిగా నిలిపివేయాలని రైల్వే బోర్డు అన్ని జోనల్ రైల్వేలకు స్పష్టమైన ఆదేశాలు జారీ చేసింది. ఈ మేరకు అక్టోబర్ 26న అధికారిక ప్రకటన విడుదల చేసింది.
రైలు బోగీల్లో పెరుగుతున్న అగ్ని ప్రమాదాలకు అడ్డుకట్ట వేసేందుకు భారతీయ రైల్వే కీలక నిర్ణయం తీసుకుంది. ఇకపై రాత్రి వేళల్లో ప్రయాణికులు మొబైల్ ఫోన్లు ఛార్జింగ్ పెట్టుకోవడానికి అనుమతి ఉండదు. రాత్రి 11 గంటల నుంచి ఉదయం 5 గంటల వరకు అన్ని రైళ్లలోని మొబైల్ ఛార్జింగ్ పాయింట్లను నిలిపివేయాలని ఆదేశాలు జారీ చేసింది. గతంలోనే ఈ ఆదేశాలు జారీ చేసినప్పటికీ, ప్రస్తుతం వాటి అమలును మరింత కఠినతరం చేసింది. అక్టోబర్ 26న కొత్త మార్గదర్శకాలను జారీ చేసింది.
రైల్వే శాఖ మార్గదర్శకాల ప్రకారం.. రైళ్లలో రాత్రి 11 గంటల నుంచి ఉదయం 5 గంటల వరకు ఛార్జింగ్ పాయింట్లను నిలిపివేయాలనే నిబంధనను తొలిసారిగా 2014 జూన్ 19న తీసుకొచ్చారు. అయితే, రైల్వే సిబ్బంది ఈ నిబంధనలను సరిగ్గా పాటించకపోవడంతో అగ్ని ప్రమాదాల ముప్పు కొనసాగుతోంది.
తాజాగా సౌత్ ఈస్టర్న్ రైల్వే పరిధిలో చోటుచేసుకున్న ఘటన ఈ నిబంధనలను మరోసారి తెరపైకి తెచ్చింది. ఇటీవల ఓ రైలులో రైల్వే సిబ్బంది సమయానికి మొబైల్ ఛార్జింగ్ పాయింట్లను ఆఫ్ చేయకపోవడంతో, ఆ రైలులో ప్రయాణిస్తున్న ఓ వ్యక్తి తన పవర్ బ్యాంక్‌ను ఛార్జింగ్‌కు పెట్టాడు. అయితే, కొద్దిసేపటికే అది పేలిపోయింది. దీంతో అప్రమత్తమైన రైల్వే శాఖ ప్రయాణికుల భద్రత దృష్ట్యా ముందస్తు జాగ్రత్తలను మరింత కఠినతరం చేసింది.
తాజా ఆదేశాల ప్రకారం.. ప్రతి రోజూ రాత్రి 11 గంటలు కాగానే రైలులోని మొబైల్ ఛార్జింగ్ పాయింట్లను సిబ్బంది స్విచ్ ఆఫ్ చేయాలి. తిరిగి ఉదయం 5 గంటలకు వాటన్నింటినీ ఆన్ చేయాలి. ఈ నిబంధనల అమలులో ఎలాంటి మినహాయింపులు ఉండకూడదని, నిర్లక్ష్యంగా వ్యవహరించే వారిపై చర్యలు తీసుకుంటామని రైల్వే బోర్డు స్పష్టం చేసింది.
రైల్వే సిబ్బందికి ఈ అంశంపై పూర్తిస్థాయి శిక్షణ ఇవ్వడంతోపాటు, వారిలో అవగాహన పెంచాలని బోర్డు ఆదేశించింది. అలాగే, నిబంధనలు సరిగ్గా అమలవుతున్నాయో లేదో తెలుసుకునేందుకు అధికారులు, సూపర్‌వైజర్లు తరచూ ఆకస్మిక తనిఖీలు నిర్వహించాలని సూచించింది.