చీమల బెడదకు చెక్.. రూపాయి ఖర్చు లేకుండా ఇలా చేస్తే మీ ఇంట్లో ఒక్క చీమ కనిపించదు..
వేసవి కాలం వచ్చిందంటే దోమల మోతతో పాటు చీమల బెడద కూడా అధికమవుతుంది. ఇల్లు ఎంత శుభ్రంగా ఉన్నా, ఎక్కడో ఒకచోట పంచదార పలుకో లేదా తినుబండారాల ముక్కో కనిపిస్తే చాలు.. క్షణాల్లో చీమలదండు అక్కడ వాలిపోతుంది. ఇవి కేవలం ఆహారానికే పరిమితం కాకుండా మంచాలు, సోఫాలు, చివరకు మనం వేసుకునే బట్టల్లోకి కూడా ప్రవేశించి కుట్టేస్తుంటాయి. మరి ఈ వేసవిలో మీ ఇంటిని చీమల రహితంగా మార్చుకోవడానికి కొన్ని అద్భుతమైన ఇంటి చిట్కాలు ఇప్పుడు చూద్దాం.
వెనిగర్ స్ప్రే: తెల్ల వెనిగర్, నీటిని సమాన పాళ్లలో కలిపి ఒక స్ప్రే బాటిల్లో నింపుకోండి. చీమలు ఎక్కువగా తిరిగే ప్రదేశాల్లో, ముఖ్యంగా అవి ఇంట్లోకి ప్రవేశించే దారుల వద్ద ఈ మిశ్రమాన్ని స్ప్రే చేయండి. రోజువారీ ఇల్లు తుడిచే నీటిలో కొద్దిగా వెనిగర్ కలిపితే ఇల్లు శుభ్రపడటమే కాకుండా చీమలు దరిచేరవు.
మిరప పొడి లేదా మిరియాలు: చీమలు వెళ్లే దారుల్లో ఎర్ర మిరప పొడిని చల్లడం వల్ల అవి వెంటనే వెనక్కి తగ్గిపోతాయి. ఒకవేళ ఇంట్లో చిన్న పిల్లలు ఉంటే మిరప పొడికి బదులుగా, నల్ల మిరియాల పొడిని నీటిలో కలిపి ఆ నీటిని చల్లడం ఉత్తమం.
బేకింగ్ సోడా - చక్కెర మిశ్రమం: సమాన పాళ్లలో బేకింగ్ సోడా, పంచదార పొడిని కలిపి చీమల పుట్టల వద్ద లేదా అవి వచ్చే మూలల్లో చల్లండి. చక్కెర వాసనకు ఆకర్షితమయ్యే చీమలు, ఆ మిశ్రమాన్ని తిన్నప్పుడు బేకింగ్ సోడా వాటి కడుపులోని ఆమ్లంతో చర్య జరిపి వాటిని నిర్మూలిస్తుంది.
డిష్ సోప్ మిశ్రమం: గిన్నెలు కడిగే లిక్విడ్ సోప్ను నీటిలో కలిపి చీమలు ఉన్నచోట చల్లితే, అవి అయోమయానికి గురై ఆ ప్రదేశం నుండి పారిపోతాయి. సోప్ వాటర్ చీమల శ్వాస వ్యవస్థపై ప్రభావం చూపుతుంది.
చీమలు రాకుండా ఉండాలంటే చిట్కాలతో పాటు నివారణా చర్యలు కూడా ముఖ్యం. ఇంట్లో ఆహార పదార్థాలు కింద పడగానే వెంటనే శుభ్రం చేయాలి. గోడల్లో లేదా నేలపై ఏవైనా పగుళ్లు ఉంటే వాటిని వెంటనే మూసివేయాలి. ముఖ్యంగా తేమ ఉన్న ప్రదేశాల్లో చీమలు త్వరగా చేరుతాయి కాబట్టి వంటగది, బాత్రూమ్ ఏరియాలను వీలైనంత పొడిగా ఉంచుకోవాలి. ఈ చిన్నపాటి జాగ్రత్తలతో వేసవిలో చీమల బెడద నుండి మీ కుటుంబాన్ని కాపాడుకోవచ్చు.