ఫోన్కు ఒక రోజులో ఎన్నిసార్లు ఛార్జింగ్ పెట్టాలో తెలుసా..? 99శాతం మంది చేసే తప్పు ఇదే..
ఈ ఆధునిక యుగంలో ఫోన్ లేకుండా సెకన్ కూడా ఉండలేని సిట్యువేషన్కు జనం వచ్చేశారు. ఫోనే వారి ప్రపంచంగా మారిపోయింది. ఏది కావాలన్నా ఫోన్లోనే.. అంతలా మన జీవితంలో భాగమైపోయిన ఫోన్ల విషయంలో చాలా మందిని వేధించే ఏకైక సమస్య.. ఛార్జింగ్ త్వరగా అయిపోవడం. కొత్తలో అంతా బాగున్నా.. కొద్ది నెలలు అవ్వగానే ఛార్జింగ్ త్వరగా అయిపోతుంది. దీనికి మనం చేసే కొన్ని తప్పులు కూడా కారణం అవ్వొచ్చు. అసలు రోజుకు ఎన్నిసార్లు ఛార్జ్ చేయాలి..? అనేది తెలుసుకుందాం..
ప్రస్తుత స్మార్ట్ఫోన్లన్నీ లిథియం అయాన్ బ్యాటరీలతో వస్తున్నాయి. పాత కాలపు ఫోన్లలాగా వీటిని పూర్తిగా 0శాతం వరకు వాడేసి.. ఆపై 100శాతం వరకు ఛార్జ్ చేయకూడదని టెక్ నిపుణులు గట్టిగా చెప్తున్నారు. బ్యాటరీ లైఫ్ ఎక్కువ టైమ్ కాపాడుకోవడానికి అత్యంత సురక్షితమైన గోల్డెన్ రేంజ్ 20శాతం నుండి 80శాతం మధ్య మాత్రమే. అంటే మీ ఫోన్ బ్యాటరీ 20శాతానికి పడిపోయినప్పుడు ఛార్జర్కు కనెక్ట్ చేయడం, అలాగే 80శాతం లేదా 85శాతానికి చేరగానే ప్లగ్ తీసేయడం బ్యాటరీ ఆయుష్షును పెంచుతుంది.
ఫోన్ను రోజుకు ఎన్నిసార్లు ఛార్జ్ చేయాలనే దానికి ఎలాంటి కఠినమైన నియమాలు లేవు. చాలా మంది ఫోన్ను తరచుగా ఛార్జ్ చేయడం వల్ల బ్యాటరీ పాడైపోతుందని భయపడుతుంటారు. కానీ అది కేవలం అపోహ మాత్రమే. వాస్తవానికి.. ఒకేసారి 0 నుండి 100శాతం వరకు సుదీర్ఘంగా ఛార్జ్ చేయడం కంటే అవసరమైనప్పుడు రోజుకు 2 నుండి 3 సార్లు కొద్దికొద్దిగా టాప్ అప్ ఛార్జ్ చేయడం బ్యాటరీకి చాలా మంచిది. ఇది బ్యాటరీపై అదనపు వోల్టేజ్ భారాన్ని తగ్గిస్తుంది.
స్మార్ట్ఫోన్ బ్యాటరీ లైఫ్ అనేది అది పనిచేసే ఛార్జింగ్ సైకిల్స్పై ఆధారపడి ఉంటుంది. సాధారణంగా ఒక మొబైల్ బ్యాటరీ 300 నుండి 500 పూర్తి ఛార్జింగ్ సైకిల్స్ వరకు తన గరిష్ట సామర్థ్యాన్ని నిలుపుకోగలదు. ఫోన్ను 0 నుండి 100శాతం వరకు ఛార్జ్ చేస్తే దానిని ఒక పూర్తి సైకిల్గా పరిగణిస్తారు. అదే మీరు మీ ఫోన్ను ఎల్లప్పుడూ 40శాతం నుండి 80శాతం మధ్యలోనే ఉంచుతూ రెండుసార్లు ఛార్జ్ చేస్తే, అది కేవలం అర సైకిల్గా మాత్రమే లెక్కించబడుతుంది. దీనివల్ల బ్యాటరీ లైఫ్ రెట్టింపు అవుతుంది.
కొత్త ఫోన్ కొన్నప్పుడు మొదటిసారి వాడే ముందు కచ్చితంగా 8 గంటల పాటు ఛార్జ్ చేయాలనే పాత నమ్మకాన్ని పక్కన పెట్టేయాలి. అప్పట్లో వాడిన నికెల్ ఆధారిత బ్యాటరీలకు ఆ నియమం వర్తించేది. కానీ ప్రస్తుత లిథియం బ్యాటరీలకు అలాంటి అవసరం లేదు. బాక్స్ లోంచి తీసిన వెంటనే ఎంత ఛార్జింగ్ ఉంటే అంతటితోనే నేరుగా వాడుకోవచ్చు. అలాగే, రాత్రంతా ఫోన్ను ఛార్జింగ్కు పెట్టే అలవాటు ఉన్నా మార్చుకోవాలి. నేటి ఫోన్లలో ఆటో-కటాఫ్ ఫీచర్ ఉన్నప్పటికీ, 100శాతానికి చేరిన తర్వాత కూడా గంటల తరబడి ప్లగ్ లోనే ఉంచడం వల్ల బ్యాటరీ కెమిస్ట్రీ దెబ్బతింటుంది.
ఫోన్ను ఛార్జ్ చేయడానికి ఎల్లప్పుడూ మొబైల్తో పాటు వచ్చిన ఒరిజినల్ ఛార్జర్ను లేదా విశ్వసనీయ బ్రాండ్ల నుంచి సర్టిఫైడ్ ఛార్జర్లను మాత్రమే వాడాలి. తక్కువ ధరకు దొరికే స్థానిక, నాసిరకం ఛార్జర్లు స్థిరమైన వోల్టేజ్ను అందించలేవు. దీనివల్ల ఫోన్ విపరీతంగా వేడెక్కడం జరుగుతుంది. లిథియం బ్యాటరీలకు అతిపెద్ద శత్రువు ఈ వేడి మాత్రమే. కాబట్టి స్మార్ట్ ఛార్జింగ్ అలవాట్లను అలవర్చుకుని, మీ ఫోన్ బ్యాటరీ ఎక్కువ కాలం మన్నికగా ఉండేలా చూసుకోండి.