Godhuma Rava Khichdi: పిల్లల నుంచి పెద్దల వరకు తినగలిగే సూపర్ హెల్దీ గోధుమ రవ్వ కిచిడీ
రోజూ అన్నం లేదా టిఫిన్లు తిని బోర్ కొట్టినప్పుడు వంటికి ఎంతో చలువ చేస్తూ, పొట్టను తేలికగా ఉంచే ఆరోగ్యకరమైన వంటకం కిచిడీ. సాధారణంగా కిచిడీని బియ్యంతో చేస్తుంటారు. కానీ బియ్యానికి బదులుగా పీచు పదార్థం పుష్కలంగా ఉండే గోధుమ రవ్వ , జీర్ణక్రియను మెరుగుపరిచే పొట్టు పెసరపప్పు కాంబినేషన్‌లో చేస్తే రుచితో పాటు ఆరోగ్య ప్రయోజనాలు రెట్టింపవుతాయి.
కావలసిన పదార్థాలు: 1 గ్లాసు గోధుమ రవ్వ, 1 గ్లాసు పొట్టు పెసరపప్పు, 5 గ్లాసులు నీళ్లు, పావు కప్పు సన్నగా తరిగిన బీన్స్, పావు కప్పు సన్నగా తరిగిన క్యారెట్ ముక్కలు, పిడికెడు పచ్చి బఠానీ, అర టీస్పూన్ జీలకర్ర అర టీస్పూన్ మిరియాల పొడి, చిటికెడు పసుపు, రుచికి సరిపడా ఉప్పు , 1 స్పూన్ నెయ్యి, 1 స్పూన్ వంట నూనె, కొద్దిగా తాజా కొత్తిమీర తరుగు
తయారీ విధానం: ఒక గ్లాసు పొట్టు పెసరపప్పును కనీసం 2 గంటల పాటు నీళ్లలో నానబెట్టుకోవాలి. ఒక గ్లాసు గోధుమ రవ్వను వండే ముందు శుభ్రంగా కడిగి నీరు వార్చి పక్కన ఉంచాలి రవ్వను ఎక్కువ సేపు నానబెట్టాల్సిన అవసరం లేదు. స్టవ్‌పై కుక్కర్ పెట్టి ఒక స్పూన్ నెయ్యి, ఒక స్పూన్ నూనె వేసి వేడిచేయాలి. నెయ్యి కాగాక అర స్పూన్ జీలకర్ర వేసి చిటపటలాడనివ్వాలి.
ఇప్పుడు సన్నగా తరిగిన బీన్స్ ముక్కలు, క్యారెట్ ముక్కలు వేసి రెండు నిమిషాలు వేయించాలి. ఆ తర్వాత పచ్చి బఠానీ వేసి నిమిషం పాటు వేయించాలి. అనంతరం నానబెట్టి నీరు తీసిన పొట్టు పెసరపప్పును వేసి నేతిలో నిమిషం పాటు దోరగా వేయించాలి; ఆపై కడిగి ఉంచిన గోధుమ రవ్వను కూడా వేసి నేతి వాసన పట్టేలా మరో నిమిషం వేయించాలి.
మనం తీసుకున్న ఒక గ్లాసు రవ్వ, ఒక గ్లాసు పప్పు (మొత్తం రెండు గ్లాసులు) కొలతకు గాను సరిగ్గా 5 గ్లాసుల నీళ్లు పోయాలి. మెత్తగా, క్రీమీగా ఉడకడం కోసం ఒక గ్లాస్ నీరు అదనంగా వేసుకోవాలి. ఇందులో అర టీస్పూన్ మిరియాల పొడి, తగినంత ఉప్పు, మంచి రంగు కోసం చిటికెడు పసుపు వేసి కలపాలి. కుక్కర్ మూతపెట్టి మీడియం మంటపై 4 విజిల్స్ వచ్చే వరకు ఉడికించాలి.
ఆవిరి పోయాక కుక్కర్ మూత తీసి చూస్తే చక్కగా ఉడికి ఉంటుంది; ఇప్పుడు గరిటెతో మెత్తగా మాష్ చేసుకోవాలి. చివరగా సన్నగా తరిగిన కొత్తిమీర చల్లి కలుపుకోవాలి. అంతే, నోట్లో వేస్తే వెన్నలా కరిగిపోయే కమ్మని 'గోధుమ రవ్వ కిచిడీ' సిద్ధం! వేడివేడిగా ప్లేట్‌లో వడ్డించి, మధ్యలో గుంత చేసి ఒక చెంచా స్వచ్ఛమైన నెయ్యి వేసి.. టమాటా పప్పుచారు లేదా ఆవకాయ, పచ్చి ఉల్లిపాయతో తింటుంటే అమృతంలా ఉంటుంది!