Team India: ఆ విజయాలకే మిడిసిపడితే కష్టం.. గంభీర్, గిల్లకు ఇచ్చిపడేసిన టీమిండియా మాజీ ప్లేయర్
Rahul Dravids Stern Warning on Team India: భారత టెస్ట్ క్రికెట్ ప్రస్తుతం పరివర్తన దశను ఎదుర్కొంటుందని టీమిండయా మాజీ కోచ్ రాహుల్ ద్రావిడ్ తెలిపారు. ఐపీఎల్, వైట్ బాల్ క్రికెట్ కారణంగా ఆటగాళ్లకు రెడ్ బాల్ ప్రిపరేషన్ సమయం లభించడం లేదని, ఇది సాంకేతిక లోపం కంటే మానసిక, సమయపాలన సవాల్ అని ఆయన పేర్కొన్నారు. దేశవాళీ క్రికెట్పై దృష్టి సారించకపోతే టెస్ట్ హోదా కోల్పోయే ప్రమాదముందని ఆయన హెచ్చరించారు.
Rahul Dravids Stern Warning on Team India: ఫిబ్రవరి 7 నుంచి టీ20 ప్రపంచకప్ 2026 మొదలుకానుంది. ప్రస్తుతం టీమిండియా న్యూజిలాండ్ జట్టుతో టీ20 సిరీస్ ఆడుతోంది. జనవరి 31న చివరి మ్యాచ్ లో ఇరుజట్లు పోటీపడనున్నాయి. ఇప్పటికే సిరీస్ గెలిచిన భారత జట్టు, ఆధిక్యాన్ని పెంచుకోవాలని చూస్తోంది. టీ20ల్లో అదరగొడుతోన్నా.. వన్డేలు, టెస్ట్ ల్లో మాత్రం తేలిపోతోంది భారత జట్టు. ఈ క్రమంలో టీమిండియా మాజీ ప్లేయర్, కోచ్ రాహుల్ ద్రవిడ్ భారత జట్టును హెచ్చరించాడు.
భారత టెస్ట్ క్రికెట్ ప్రస్తుతం ఒక క్లిష్టమైన పరివర్తన దశను ఎదుర్కొంటోందని మాజీ ప్రధాన కోచ్ రాహుల్ ద్రావిడ్ చెప్పుకొచ్చాడు. గత దశాబ్ద కాలంగా స్వదేశంలో తిరుగులేని శక్తిగా వెలుగొందిన టీమిండియా ఇటీవల న్యూజిలాండ్ చేతిలో వైట్వాష్కు గురవడం, దక్షిణాఫ్రికా, ఆస్ట్రేలియాలో చవిచూస్తున్న పరాజయాలతో తన పట్టును కోల్పోతున్నట్లు కనిపిస్తోంది. గౌతమ్ గంభీర్ బాధ్యతలు స్వీకరించిన తర్వాత కూడా ఈ పరిస్థితిలో పెద్దగా మార్పు రాకపోవడం అభిమానులను ఆందోళనకు గురిచేస్తోంది.
ద్రావిడ్ ప్రకారం, దీనికి ప్రధాన కారణం ఆటగాళ్లలో సాంకేతిక లోపం కంటే కూడా ఫార్మాట్ల మధ్య మారే క్రమంలో వారు ఎదుర్కొంటున్న మానసిక, సమయపాలన పరమైన సవాళ్లు. నేటి క్రికెటర్లు ఏడాది పొడవునా ఐపీఎల్, అంతర్జాతీయ వైట్ బాల్ క్రికెట్లో మునిగి తేలుతున్నారు. ఒక టెస్ట్ సిరీస్కు కేవలం మూడు, నాలుగు రోజుల ముందు మాత్రమే వేదికకు చేరుకోవడం వల్ల ఎర్ర బంతితో ఆడే సహజమైన నైపుణ్యాన్ని అలవర్చుకోవడానికి వారికి సమయం సరిపోవడం లేదు. ముఖ్యంగా స్పిన్కు అనుకూలించే పిచ్లపై భారత బ్యాటర్లు తలపడటం వెనుక ఉన్న అసలు రహస్యం ఇదేనని ఆయన స్పష్టం చేశారు.
విరాట్ కోహ్లీ, రోహిత్ శర్మ వంటి దిగ్గజాలు జట్టు మార్పు దశలో ఉన్న సమయంలో మిడిల్ ఆర్డర్లో స్థిరత్వం లోపించడం జట్టును మరింత దెబ్బతీస్తోంది. మూడు ఫార్మాట్లు ఆడే ఆటగాళ్లు ఆరు నెలల తర్వాత నేరుగా టెస్ట్ మ్యాచ్లో బరిలోకి దిగినప్పుడు రెడ్ బాల్ కదలికను, పిచ్ స్వభావాన్ని అర్థం చేసుకోవడానికి అవసరమైన మజిల్ మెమరీని కోల్పోతున్నారు. ఇది కేవలం బ్యాటింగ్ వైఫల్యం మాత్రమే కాదు, టెస్ట్ క్రికెట్కు అవసరమైన అంకితభావం, తయారీలో ఏర్పడిన ఒక నిర్ణయాత్మక లోపమని ద్రావిడ్ బలంగా నొక్కి చెప్పారు.
టెస్ట్ క్రికెట్ పతనానికి ద్రావిడ్ చూపిస్తున్న మరో కీలక కోణం మారుతున్న క్రికెట్ సంస్కృతి, షెడ్యూలింగ్ ఒత్తిడి. పూర్వం ఫ్రాంచైజీ క్రికెట్ లేని రోజుల్లో ఆటగాళ్లు టెస్ట్ సిరీస్కు ముందు కనీసం నెల రోజుల పాటు రంజీ ట్రోఫీ లేదా నెట్స్ ప్రాక్టీస్లో ఎర్ర బంతితో గడిపేవారు. ఆ ఓపికే గత తరం ఆటగాళ్లను గంటలకొద్దీ క్రీజ్లో నిలబెట్టేది. కానీ ప్రస్తుతం శుభ్ మన్ గిల్ వంటి యువ ఆటగాళ్లు ఒకవైపు టీ20 ఫార్మాట్లో మెరుపులు మెరిపిస్తూనే మరుసటి వారమే టెస్ట్ మ్యాచ్లో డిఫెన్సివ్ మైండ్సెట్లోకి మారాల్సి రావడం ఒక అసాధ్యమైన టాస్క్ లాగా మారుతోంది. సాయి సుదర్శన్, కరుణ్ నాయర్ వంటి ప్రతిభావంతులు అందుబాటులో ఉన్నా వారికి లభిస్తున్న పరిమిత అవకాశాలు, నిరంతరం మారుతున్న జట్టు కూర్పు వారి ఆత్మవిశ్వాసాన్ని దెబ్బతీస్తున్నాయి. ముఖ్యంగా సీమింగ్ ట్రాక్లపై పేస్ బౌలింగ్ను ఎదుర్కోవడంలోను, టర్నింగ్ ట్రాక్లపై స్పిన్నర్లను సమర్థవంతంగా అడ్డుకోవడంలోను మన బ్యాటర్లు విఫలమవుతున్నారు.
ద్రావిడ్ మాటల్లో చెప్పాలంటే, టెస్ట్ క్రికెట్ అనేది కేవలం నైపుణ్యానికి సంబంధించింది కాదు, అది ఒక ప్రత్యేకమైన జీవనశైలి, ఏకాగ్రతకు సంబంధించింది. కేవలం వైట్ బాల్ విజయాలతో సంతృప్తి పడితే టెస్ట్ ఫార్మాట్లో టీమిండియా తన నెంబర్ వన్ హోదాను శాశ్వతంగా కోల్పోయే ప్రమాదం ఉంది. సీనియర్ల రిటైర్మెంట్ తర్వాత ఏర్పడే శూన్యాన్ని పూరించాలంటే యువ ఆటగాళ్లకు దేశవాళీ క్రికెట్లో ఎర్రబంతితో ఎక్కువ సమయం గడిపేలా బోర్డు ప్రణాళికలు సిద్ధం చేయాలి. లేనిపక్షంలో అడపాదడపా విదేశీ విజయాలు మినహా స్వదేశీ కోటలు కూడా కూలిపోయే ముప్పు పొంచి ఉంది. భారత క్రికెట్ తన పూర్వ వైభవాన్ని సంతరించుకోవాలంటే కేవలం టి20 మెరుపుల మీద కాకుండా టెస్ట్ క్రికెట్కు అవసరమైన ఓపిక, సాంకేతికతపై మళ్లీ దృష్టి పెట్టాల్సిన అవసరం ఉందని ద్రావిడ్ విశ్లేషణ స్పష్టం చేస్తోంది.