Remuneration: స్టార్ హీరోలకు భారీ రెమ్యునరేషన్.. నిర్మాతల దైర్యం అదేనా..
హీరోల మార్కెట్ పెరిగిపోయినపుడు.. వాళ్లతో సినిమాలు చేస్తున్న నిర్మాతలకు బడ్జెట్ కూడా భారీగానే పెరుగుతుంది. మరీ ముఖ్యంగా రెమ్యునరేషన్స్ కూడా కొండెక్కి కూర్చోవడం ఖాయం. తాజాగా ఇదే జరుగుతుంది. ఏకంగా 100 కోట్ల నుంచి 250 కోట్ల వరకు డిమాండ్ చేస్తున్నారు కొందరు హీరోలు. ఒకప్పుడు సినిమాలకు 100 కోట్లు వస్తే పండగ చేసుకునే వాళ్లు నిర్మాతలు. కానీ ఇప్పుడు స్టార్ హీరోలకు 100 కోట్ల పారితోషికం కూడా తక్కువే అనిపిస్తుంది. దానికి కారణం మన హీరోల రేంజ్ ఇప్పుడు 1000 కోట్లకు చేరడమే. ఓ సినిమాకు పాజిటివ్ టాక్ వస్తే.. టార్గెట్ 1000 క్రోర్స్ అంటున్నారు హీరోలు. అందుకే వాళ్ల పారితోషికం కూడా అదే స్థాయిలో అందుకుంటున్నారు.
రెమ్యునరేషన్ అంటే ముందుగా గుర్తుకొచ్చే పేరు.. ప్రభాస్. ఈయన సినిమాలు 1000 కోట్లు ఈజీగా వసూలు చేస్తున్నాయి. బాహుబలి 2 తర్వాత కల్కితో మరోసారి ఈ ఫీట్ అందుకున్నారు రెబల్ స్టార్. నిన్నమొన్నటి వరకు ఓ సినిమాకు 150 కోట్లు తీసుకున్న ప్రభాస్.. కల్కి తర్వాత 200 కోట్లు డిమాండ్ చేస్తున్నట్లు తెలుస్తుంది. ఆయన స్థాయికి అది తక్కువే అంటున్నారు నిర్మాతలు.ప్రభాస్ సినిమాలకు డిజిటల్, శాటిలైట్, డబ్బింగ్, ఆడియో అంటూ నాన్ థియెట్రికల్ బిజినెస్సే దాదాపు 400 కోట్ల వరకు జరుగుతుందిప్పుడు. ఇక థియెట్రికల్ బిజినెస్ కూడా నెక్ట్స్ లెవల్‌లో ఉంది. అందుకే ఆయనకు 200 కోట్లు ఇవ్వడానికి కూడా సై అంటున్నారు నిర్మాతలు.
మరోవైపు విజయ్ కూడా ఇదే స్థాయిలో అందుకున్నారు. గోట్ కోసం ఈయన 180 కోట్లు తీసుకున్నట్లు తెలుస్తుంది.విజయ్‌కు గతంలో తమిళ మార్కెట్ మాత్రమే ఉండేది.. కానీ ఇప్పుడు తెలుగుతో పాటు, హిందీ కూడా తోడైంది. పైగా ఓవర్సీస్ నుంచి విజయ్ సినిమాలకు 100 కోట్లకు పైగానే వస్తున్నాయి. యావరేజ్ టాక్ వచ్చిన లియో కూడా 500 కోట్లకు పైగా వసూలు చేసింది. దానికితోడు రాజకీయాల్లోకి వెళ్లిపోవడంతో.. కెరీర్‌లో చివరి సినిమాలు కాబట్టి 200 కోట్లు ఇచ్చేందుకు ఓకే అంటున్నారు మేకర్స్.
ప్రభాస్, విజయ్ మాత్రమే కాదు.. సౌత్ ఇండస్ట్రీలో రెమ్యునరేషన్ పరంగా రికార్డులు తిరగరాస్తున్న హీరోలు చాలా మంది ఉన్నారు. వాళ్ల సినిమాలకు జరిగే బిజినెస్ కూడా అలాగే ఉంటుంది కాబట్టి నిర్మాతలు కూడా స్టార్స్‌కు నో చెప్పలేకపోతున్నారు. మరి ఈ లిస్టులో ఇంకా ఎంతమంది హీరోలున్నారు..? వాళ్లు ఒక్కో సినిమాకు ఎన్ని వందల కోట్లు వసూలు చేస్తున్నారో చూద్దాం..
మొత్తం ఆసియా ఖండంలోనే జాకీ చాన్ తర్వాత అత్యధిక రెమ్యునరేషన్ అందుకున్న హీరో రజినీకాంత్. అప్పట్లోనే ఆయన రికార్డులు అలా ఉండేవి. ఆ మధ్య కాస్త ట్రాక్ తప్పడంతో.. పారితోషికం కూడా తగ్గింది. కానీ జైలర్‌తో మళ్లీ ఫామ్‌లోకి వచ్చిన సూపర్ స్టార్.. ఒక్కో సినిమాకు 175 కోట్లకు పైగానే అందుకుంటున్నట్లు ట్రేడ్ వర్గాలు చెప్తున్న మాట. ప్రస్తుతం వెట్టైయాన్‌తో పాటు కూలీలో నటిస్తూ బిజీగా ఉన్నారు రజినీకాంత్. ఇక అల్లు అర్జున్ సైతం రెమ్యునరేషన్ విషయంలో తగ్గేదే లే అంటున్నారు. పుష్ప తర్వాత ఈయన రేంజ్ పాన్ ఇండియా అయిపోయింది. పుష్ప 2 కోసం 130 కోట్ల వరకు బన్నీ తీసుకుంటున్నట్లు తెలుస్తుంది. కేజియఫ్ తర్వాత యశ్ కూడా సినిమాకు 125 కోట్లకు పైగానే డిమాండ్ చేస్తున్నారు.
రామ్ చరణ్, జూనియర్ ఎన్టీఆర్ రేంజ్ కూడా ట్రిపుల్ ఆర్ తర్వాత 100 కోట్లు దాటేసింది. గేమ్ ఛేంజర్, దేవర కోసం ఈ ఇద్దరు హీరోలు బాగానే తీసుకుంటున్నారు. మహేష్ బాబు సైతం రాజమౌళి సినిమా కోసం రికార్డ్ రేంజ్‌లో రెమ్యునరేషన్ తీసుకుంటున్నారు. పవన్ గురించి చెప్పనక్కర్లేదు. ఈయన ఒక్క రోజుకే 3 కోట్ల వరకు ఛార్జ్ చేసిన రోజులన్నాయి. మొత్తానికి ఇక్కడ డిమాండ్ అండ్ సప్లై పాలసీ నడుస్తుంది.