Health Insurance: ఆన్లైన్లో హెల్త్ ఇన్యూరెన్స్ తీసుకునేవారు జాగ్రత్త.. ఈ విషయాలు తెలుసుకోకపోతే మోసపోతారు
మార్కెట్లో అనేక హెల్త్ ఇన్యూరెన్స్ కంపెనీలు ఉన్నాయి. కొన్ని ఇన్యూరెన్స్ కంపెనీలు ఆన్లైన్లో ఆఫర్ల పేరుతో కస్టమర్లను ఆకట్టుకుంటూ ఉంటాయి. వీటిని చూసి కొంతమంది వెంటనే తీసుకుంటూ ఉంటారు. అయితే ఆన్లైన్లో హెల్త్ పాలసీలు కొనుగోలు చేసేటప్పుడు మీరు తెలుసుకోవాల్సిన విషయాలు చాలానే ఉన్నాయి.
హెల్త్ ఇన్యూరెన్స్ అనేది ప్రతీఒక్కరికీ అవసరమే. ఎప్పుడు ఏ ఆపద వస్తుందో తెలియదు. దీంతో మీతో పాటు కుటుంబసభ్యులకు కూడా హెల్త్ ఇన్యూరెన్స్ తీసుకోవడం మంచిది. ఇప్పట్లో ప్రైవేట్ హాస్పిటల్కు వెళితే లక్షలకు లక్షలు ఖర్చవుతాయి. అదే హెల్త్ ఇన్యూరెన్స్ ఉంటే మీకు హాస్పిటల్ బిల్లులు ఆదా అవుతాయి. అందుకే ఈ రోజుల్లో అందరూ హెల్త్ ఇన్యూరెన్స్ అనేది తీసుకుంటున్నారు. అయితే హెల్త్ ఇన్యూరెన్స్ తీసుకునేటప్పుడు ఈ విషయాలు ఆలోచించండి.
చాలామంది ఆన్లైన్లో ఆఫర్లు చూసి ఇతర విషయాలపై అవగాహన లేకుండా హెల్త్ ఇన్యూరెన్స్ కొనుగోలు చేస్తూ ఉంటారు. అలా చేయడం వల్ల మీరు నష్టపోయే అవకాశం ఉంటుంది. హెల్త్ ఇన్యూరెన్స్లో అనేక నియమ,నిబంధనలు ఉంటాయి. వాటిని తెలుసుకుని కొనుగోలు చేయాలి. వెయిటింగ్ పీరియడ్, సబ్ లిమిట్స్, రూమ్ రెంట్, క్లెయిమ్ బోనస్ వంటి వాటిని తెలుసుకోవాలి.
కొంతమంది ఆన్లైన్లో ఆఫర్లు చూసి తక్కువ ప్రీమియం పడుతుందనే ఉద్దేశంతో ఏదోక పాలసీ తీసుకుంటారు. వీటిల్లో రూమ్ రెంట్, కో పేమెంట్స్ వంటి పరిమితులు ఉంటాయి. రూమ్ రెంట్ కొంతవరకు మాత్రమే ఇస్తామని, మిగతాది మీరు పే చేసుకోవాలని నిబంధనలు పెడతారు. ఇక కో పేమెంట్ అంటే.. ఇన్యూరెన్స్ సంస్థ కొంత అమౌంట్ పే చేస్తే.. మిగతా బిల్లు మీరు కట్టాల్సి ఉంటుంది. ఇలాంటి నిబంధనలు లేని పాలసీ తీసుకోండి.
ఇక మీకు ప్రస్తుతం ఉన్న అనారోగ్యాల గురించి ముందే తెలియజేయాలి. గతంలో వచ్చిన అనారోగ్యాలు, సర్జరీల గురించి చెప్పాలి. దీని వల్ల క్లెయిమ్ చేసుకునేటప్పుడు ఇబ్బందులు ఉండవు. చెప్పకపోవడం వల్ల ఒక్కొసారి క్లెయిమ్ తిరస్కరించే అవకాశం ఉంటుంది. ఇక కొన్ని సర్జరీలకు వెయిటింగ్ పీరియడ్ ఉంటుంది. పాలసీ తీసుకున్న కొన్నేళ్ల తర్వాత మాత్రమే వాటికి క్లెయిమ్ చేసుకోవచ్చు. వీటిని కూడా చెక్ చేయాలి.
ఇక క్లెయిమ్స్ సమయంలో ఇబ్బందులు రాకుండా ఉండాలంటే.. మీరు హాస్పిటల్లో చేరిన సమయంలో మీ పాలసీలో ఉన్న రూమ్ కేటగిరిని మాత్రమే ఎంచుకోండి. ఇక హాస్పిటల్లో చేరేముందు మీ పాలసీ నెట్వర్క్ హాస్పిటల్ లిస్టులో ఉందో.. లేదో చెక్ చేసుకోండి.