Palli Karam Podi: కూరలు లేనప్పుడు అన్నంలోకి, టిఫిన్లలోకి బెస్ట్ పల్లీ కారం పొడి
వంటింట్లో కూరలు ఏమీ లేనప్పుడు లేదా వంట చేసే ఓపిక లేనప్పుడు.. వేడివేడి అన్నంలో రెండు చెంచాల పొడి, కాస్త నెయ్యి వేసుకుని కలుపుకుని తింటే ఆ సంతృప్తి మాటల్లో చెప్పలేం. అలాంటి వాటిలో అందరికీ అమితంగా ఇష్టమైనది సాంప్రదాయ 'పల్లీ కారం పొడి'. కేవలం అన్నంలోకే కాకుండా ఉప్మా, ఇడ్లీ, చపాతీలతో పాటు వంకాయ, తోటకూర, దొండకాయ లాంటి వేపుళ్లలో స్టవ్ ఆఫ్ చేసే ముందు ఈ పొడి చల్లితే కూరల రుచి అమాంతం పెరిగిపోతుంది.
అయితే చాలామంది పల్లీ పొడి చేసినప్పుడు అది ముద్దగా మారిపోవడం లేదా నూనె తేలడం జరుగుతుంది. అలా కాకుండా పర్ఫెక్ట్ టెక్స్చర్తో పొడిపొడిగా రావడానికి పాటించాల్సిన చిట్కాలతో కూడిన తయారీ విధానాన్ని ఇప్పుడు వివరంగా చూద్దాం. కావలసిన పదార్థాలు: 200 గ్రాములువేరుశనగ గుళ్లు, తగినంత కారం, రుచికి సరిపడా ఉప్పు, మరియు 7 నుండి 8 - తొక్కతో సహా వెల్లుల్లి రెబ్బలు
తయారీ విధానం: స్టవ్ వెలిగించి బాండీ పెట్టి 200 గ్రాముల పల్లీలు వేయాలి. బాండీ వేడెక్కే వరకు మీడియం మంటపై ఉంచి, ఆ తర్వాత పూర్తిగా లో ఫ్లేమ్లోకి మార్చాలి. చిన్న మంటపై ఓపికగా కలుపుతూ పల్లీలు లోపలి వరకు సమానంగా వేగేలా చూసుకోవాలి. పల్లీలు మాడకుండా లోపలి వరకు వేగితేనే పొడి కమ్మటి రుచి, సువాసన వస్తుంది.
పల్లీలు బాగా వేగాక స్టవ్ ఆఫ్ చేయాలి. ఇవి వేడిగా ఉన్నప్పుడే ఒక చిన్న గిన్నె లేదా కప్పు అడుగుభాగంతో వాటిపై ఒత్తితే పొట్టు సులభంగా విడిపోతుంది. అన్ని గింజలకూ పొట్టు తీయాల్సిన పనిలేదు; సగం గింజలకు పొట్టు ఉంటేనే టెక్స్చర్ బాగుంటుంది. పొట్టును గాలికి చెరిగి పక్కన ఉంచాలి.
గ్రైండ్ చేసే విధానం: పల్లీలు పూర్తిగా చల్లారిన తర్వాత మాత్రమే మిక్సీ జార్లో వేయాలి. వేడి మీద వేస్తే ఆవిరికి పొడి ముద్ద కడుతుంది. అందులో తగినంత కారం పొడి, రుచికి సరిపడా ఉప్పు వేసి కలపాలి. మిక్సీని కంటిన్యూస్గా తిప్పితే పల్లీల్లోని నూనె బయటకు వచ్చి ముద్దవుతుంది. కేవలం పల్స్ మోడ్లో ఆపుతూ ఆపుతూ మధ్యలో స్పూన్తో కలుపుతూ రవ్వలా బరకగా గ్రైండ్ చేసుకోవాలి.
ఈ దశలో ఉప్పు, కారాలు సరిచూసుకుని, 7-8 పొట్టుతో ఉన్న వెల్లుల్లి రెబ్బలను వేసి మరో రెండు సార్లు మాత్రమే పల్స్ చేయాలి. ఈ పొడిని పూర్తిగా చల్లారిన తర్వాత తడిలేని గాజు సీసాలో లేదా స్టీల్ డబ్బాలో నిల్వ చేసుకుంటే నెల రోజుల పాటు తాజాగా, ఘుమఘుమలాడుతూ ఉంటుంది. కూరలు ఏమీ లేనప్పుడు ఈ పల్లీ పొడిని వేడి అన్నంలో నెయ్యితో కలిపి తింటే ప్రతి ముద్ద అద్భుతంగా ఉంటుంది!