దారుణం.. డెలివరీ ఏజెంట్‌నంటూ వచ్చాడు.. ఇంట్లో వృద్ధురాలు ఒంటరిగా ఉందని తెలిసి..సీసీ ఫుటేజ్ వైరల్!
ముంబై నగరంలో నివాస ప్రాంతాల భద్రతపై మరోసారి తీవ్రమైన ప్రశ్నలు తలెత్తుతున్నాయి. కాందివాలి వెస్ట్ ప్రాంతంలో ఉన్న ఒక అపార్ట్‌మెంట్‌లో ఒంటరిగా ఉన్న వృద్ధురాలే లక్ష్యంగా దుండగుడు తెగించిన ఘటన కలకలం సృష్టించింది. ఇళ్లలో ఉండే సీసీటీవీ కెమెరాల్లో ఈ దారుణ దృశ్యం రికార్డవడంతో ఈ ఘటన వెలుగులోకి వచ్చింది. బాధితురాలి ఫిర్యాదు మేరకు పోలీసులు కేసు నమోదు చేసి నిందితుడి కోసం గాలింపు చర్యలు చేపట్టారు. అసలేం జరిగింది..
Updated on: Nov 08, 2026 | 3:22 PM
ముంబైలోని కాందివాలి ప్రాంతంలో ఒక అపార్ట్‌మెంట్‌లో చోటుచేసుకున్న షాకింగ్ ఘటన కలకలం రేపింది. గుర్తుతెలియని వ్యక్తి డెలివరీ ఏజెంట్ లేదా సందర్శకుడి ముసుగులో రెండవ అంతస్తులోని ఓ ఇంటికి వచ్చి, చిరునామా అడుగుతున్నట్లు నటించాడు. ఆ తర్వాత ఏం జరిగింది.. ఈ మొత్తం దుశ్చర్య అక్కడ ఉన్న సీసీటీవీ కెమెరాలో స్పష్టంగా రికార్డైంది. ఈ వీడియో సోషల్ మీడియాలో వైరల్ కావడంతో అపార్ట్‌మెంట్ల భద్రతపై తీవ్ర ఆందోళన వ్యక్తమవుతోంది. బాధితురాలి ఫిర్యాదు మేరకు పోలీసులు కేసు నమోదు చేసి నిందితుడి కోసం గాలింపు చర్యలు చేపట్టారు.
నవంబర్ 3వ తేదీ రాత్రి సుమారు 9:30 గంటల ప్రాంతంలో ఈ ఘటన చోటుచేసుకుంది. ఒక నిందితుడు డెలివరీ బాయ్ లేదా అడ్రస్ వెతుక్కుంటూ వచ్చిన వ్యక్తిలా నటిస్తూ అపార్ట్‌మెంట్‌లోకి ప్రవేశించాడు. ఆ సమయంలో రెండవ అంతస్తులో ఉన్న ఒక వృద్ధురాలు తన ఫ్లాట్ తలుపు తెరుస్తుండగా ఆమె దగ్గరికి వెళ్లాడు. తనకు ఒక ప్రత్యేక చిరునామా కావాలని అడిగాడు. ఆ వృద్ధురాలు మూడవ అంతస్తుకు వెళ్లమని దారి చెప్పింది.
ఆ వ్యక్తి వెళ్లేలా నటించి, అకస్మాత్తుగా వెనక్కి తిరిగి వృద్ధురాలపై దాడి చేశాడు. ఎవరికీ అనుమానం రాకుండా క్షణాల వ్యవధిలో ఆమె మెడలోని బంగారు గొలుసును లాక్కొని అక్కడి నుంచి పరారయ్యాడు. ఈ ఊహించని పరిణామానికి వృద్ధురాలు తీవ్ర దిగ్భ్రాంతికి గురయ్యారు.
ఈ ఘటనకు సంబంధించిన సీసీటీవీ ఫుటేజ్ సోషల్ మీడియాలో వైరల్ కావడంతో హౌసింగ్ సొసైటీలలో సెక్యూరిటీ ఏర్పాట్ల తీరుతెన్నులపై తీవ్ర చర్చ జరుగుతోంది. బయటి వ్యక్తులు ఎటువంటి తనిఖీలు లేకుండా అపార్ట్‌మెంట్‌లలోకి ఎలా ప్రవేశిస్తున్నారనే ప్రశ్నలు వ్యక్తమవుతున్నాయి.
వీడియో ఇక్కడ చూడండి..
Elderly woman robbed inside a Kandivali West apartment in Mumbai!
A chain-snatching incident in broad daylight was caught on CCTV, raising serious concerns about residential security. 😳 https://t.co/qn0TuqviuW
— Ghar Ke Kalesh (@gharkekalesh) November 5, 2026
ఈ ఘటనపై సమాచారం అందుకున్న కాందివాలి పోలీసులు వెంటనే స్పందించారు. సీసీటీవీ ఫుటేజ్ ఆధారంగా నిందితుడి కదలికలను పరిశీలిస్తున్న పోలీసులు, ఎఫ్‌ఐఆర్ నమోదు చేసి దర్యాప్తు ముమ్మరం చేశారు. నిందితుడిని వీలైనంత త్వరగా పట్టుకుని చట్టపరమైన చర్యలు తీసుకుంటామని అధికారులు వెల్లడించారు. నగరంలో వృద్ధులు, మహిళల భద్రతను నిర్ధారించడానికి పోలీసులు గస్తీని మరింత కట్టుదిట్టం చేయాలని స్థానికులు కోరుతున్నారు.
