
మీ ఇంట్లో పప్పు, పప్పుచారు లేదా రసం కాచిన రోజున, వాటిలోకి అదిరిపోయే నంజుడు కోసం వెతుకుతున్నారా? అయితే ఈ సూపర్ క్రిస్పీ చామగడ్డ 65 రెసిపీని తప్పకుండా ప్రయత్నించండి. ఈ రుచి ఎంత గొప్పగా ఉంటుందంటే, ఒక్కసారి తింటే మళ్లీ మళ్లీ చేసుకోవాలనిపిస్తుంది. ఆధునిక కాలంలో మనం విరివిగా దొరికే చామగడ్డలు, కందగడ్డలు తినడం తగ్గించేశాము. కానీ, ఇవి ఆలూ కంటే చాలా మంచివి, ఎక్కువ పీచు పదార్థాన్ని, మంచి పోషకాలను అందిస్తాయి.
తయారీ విధానం:ఈ రుచికరమైన చామగడ్డ 65ను తయారు చేయడానికి ముందుగా అరకిలో చామగడ్డలను శుభ్రంగా కడిగి కుక్కర్లో వేయాలి. ఇందులో కొద్దిగా నీరు, ఉప్పు వేసి మూతపెట్టి, మీడియం ఫ్లేమ్పై సుమారు నాలుగు నుంచి ఐదు విసిల్స్ వచ్చేంత వరకు ఉడికించాలి. దుంపలు 80% ఉడికితే సరిపోతుంది, మరీ మెత్తగా గుజ్జుగా మారకూడదు. అవి కాస్త ఫర్మ్గా ఉండాలి, అప్పుడే పంటి కింద నలిగేటప్పుడు రుచిగా ఉంటాయి.
స్టీమ్ తగ్గిన తర్వాత దుంపలను బయటకు తీసి, పూర్తిగా చల్లారనివ్వాలి. దుంపలు పూర్తిగా చల్లారిన తర్వాతే వాటి పెచ్చు తీసి, పొడవుగా లేదా స్ట్రిప్స్గా కోసుకోవాలి. చక్రాలైతే కాస్త మందంగా ఉండేలా చూసుకోండి, మరీ పలుచగా కోయవద్దు. ఇలా కోసుకున్న చల్లటి దుంప ముక్కలను ఒక బౌల్లోకి తీసుకోండి.
ఇప్పుడు ఈ ముక్కల్లో రుచికి సరిపడా ఉప్పు, ఒక టీస్పూన్ వేపిన జీలకర్ర పొడి, అర టేబుల్స్పూన్ ధనియాల పొడి, పావు టీస్పూన్ పసుపు పొడి, ఒక టేబుల్స్పూన్ కారం, మూడు నుంచి నాలుగు టేబుల్స్పూన్ల పెరుగు, అలాగే రంగు కోసం కొద్దిగా రెడ్ ఫుడ్ కలర్ (ఇది పూర్తిగా ఆప్షనల్) వేయండి. పైన కొద్దిగా కొత్తిమీర తరుగు, ఒక టేబుల్స్పూన్ తాజా అల్లం వెల్లుల్లి ముద్ద, రెండు రెబ్బల కరివేపాకుని తుంచి వేయండి. చివరగా ఒక నిమ్మకాయ రసం పిండండి.
వీటన్నిటిని బాగా కలిపి, మసాలాలు చామగడ్డ ముక్కలకు చక్కగా పట్టేలా చూసుకోండి. చామగడ్డలో సహజంగా ఉండే జిగురు మసాలాలను బాగా పట్టుకోవడానికి సహాయపడుతుంది. కోటింగ్ ఇచ్చిన తర్వాత ఒకసారి రుచి చూసి, అవసరమైతే ఉప్పు, కారం లేదా నిమ్మరసం సర్దుబాటు చేసుకోండి.
తర్వాత రెండు టేబుల్స్పూన్ల బియ్యం పిండి, రెండు టేబుల్స్పూన్ల కార్న్ ఫ్లోర్ వేసి పైపైన కలపండి. ఎక్కువ కలపకుండా తడిపొడిగా ఉండేలా చూసుకోండి. చామగడ్డలు వేడిగా ఉన్నప్పుడు మసాలాలు కలపడానికి ప్రయత్నిస్తే, వాటిలో నుంచి నీరు వచ్చి కోటింగ్ ఎక్కువగా పట్టి, వేగిన తర్వాత గట్టిగా మారవచ్చు. కాబట్టి, దుంపలు పూర్తిగా చల్లారిన తర్వాతే కోట్ చేసుకోవడం ముఖ్యం. ఇది మీకు పర్ఫెక్ట్ క్రిస్పీ టెక్చర్ ఇస్తుంది.
ఇప్పుడు బాగా వేడెక్కిన నూనెలో మసాలాలు కలిపిన చామగడ్డ ముక్కలను ఒక్కొక్కటిగా వేయండి. నూనెలో ఎక్కువగా వేయకుండా చూసుకోండి. మీడియం ఫ్లేమ్పై రెండు నిమిషాల పాటు కదపకుండా వదిలేయండి. వెంటనే గరిట పెడితే కోటింగ్ ఊడిపోవచ్చు. రెండు నిమిషాల తర్వాత నెమ్మదిగా ముక్కలను తిరగేస్తూ, ఎర్రగా, గోల్డెన్ బ్రౌన్ అయ్యేంత వరకు వేయించాలి. ఈ వేడికి దుంప మిగిలిన 20% కూడా చక్కగా ఉడుకుతుంది.
ఈ చామగడ్డ 65 ఆలూ 65, పనీర్ 65, చికెన్ 65 కంటే కూడా చాలా ఎక్కువ సేపు క్రిస్పీగా ఉంటుంది. పప్పు లేదా పప్పుచారుతో నంజుకొని తింటుంటే ఎంత బాగుంటుందంటే అంత బాగుంటుంది.