Meal Maker kurma: మిల్ మేకర్ కుర్మా ఇలా చేయండి.. కొంచెం కూడా మిగల్చకుండా మొత్తం లాగించేస్తారు!!

Meal Maker Curry

మిల్ మేకర్స్.. వెజిటేరియన్ల నాన్ వెజ్ అని దీనికి పేరు. మిల్ మేకర్స్ తో రకరకాల వంటలు తయారు చేసుకోవచ్చు. మిల్ మేకర్ పులావ్, మిల్ మేకర్ కుర్మా.. పేర్లు చెప్పగానే లాలాజలం ఊరుతోంది కదూ. కానీ ఇంట్లో అంత ఓపికగా చేసుకోలేక కొందరు.. ఎలా చేయాలో తెలీక ఇంకొందరు రెస్టారెంట్లలో లభించే కూరల వైపు మొగ్గుచూపుతుంటారు. అవి ఆరోగ్యానికి అంత మంచిది కాదు కదా.. దాని వల్ల అనేక ఆరోగ్య సమస్యలు కూడా ఎదురవుతాయి. అందుకే ఇంట్లోనో ఈజీగా హెల్దీగా మిల్ మేకర్ కుర్మా ఎలా తయారు చేసుకోవాలో చూసేద్దాం.

మిల్ మేకర్ కుర్మాకు కావలసిన పదార్థాలు:

ఉల్లిపాయలు – పెద్దవి 2, పచ్చిమిర్చి -2, జీడిపప్పు -2 టేబుల్ స్పూన్లు, పెరుగు -1/4 కప్పు, వేడి నీళ్లలో గంటపాటు నానబెట్టిన మిల్ మేకర్ -50 గ్రాములు, నూనె- 3 టేబుల్ స్పూన్లు, అల్లం వెల్లుల్లి పేస్ట్ – 1 టేబుల్ స్పూన్, గరం మసాలా – 1 అర టీ స్పూన్, ధనియాల పొడి – 1 టేబుల్ స్పూన్, కారం – 1 టేబుల్ స్పూన్, ఉప్పు – రుచికి తగినంత, జీలకర్ర పొడి – 1/2 టీ స్పూన్, టమాటాలు – 100 గ్రాములు, చింతపండు పులుసు -4 చెంచాలు, నీళ్లు – 1/2 కప్పు, తరిగిన కొత్తిమీర.

తయారీ విధానం:

*ఉల్లిపాయలను నిలువుగా కట్ చేసి.. వేయించుకోవాలి. ఒక మిక్సీ జార్ లో వేయించిన ఉల్లిపాయలు, పచ్చిమిర్చి, జీడిపప్పు, పెరుగు వేసి మెత్తటి పేస్ట్ గా గ్రైండ్ చేయాలి.

*వేడినీటిలో ఉంచిన మిల్ మేకర్ లను నీరు లేకుండా పిండి పక్కన పెట్టుకుని.. మరో కడాయిలో నూనె వేసి వేడయ్యాక మిల్ మేకర్ లను దోరగా వేయించాలి.

*వాటిని తీసేసి.. ఇంకొంచెం నూనె వేసి.. అల్లం వెల్లుల్లి పేస్ట్, గరంమసాలా, ఉప్పు, కారం, జీలకర్రపొడి, ధనియాల పొడి వేసి పచ్చివాసన పోయేలా వేయించాలని. అలాగే టమాటాలను మిక్సీ పట్టి.. ఆ గుజ్జును వేసి వేగనివ్వాలి.

*మిక్సీపట్టి పక్కకు పెట్టుకున్న ఉల్లిపాయ పేస్ట్ ను కూడా ఈ మిశ్రమంలో వేసి.. నూనె పైకి తేలేంతవరకూ మరికొద్ది సేపు వేయించాలి. ఇప్పుడు నాలుగు స్పూన్ల చింతపండు పులుసు వేసి కలపాలి.

*2 నిమిషాల తర్వాత వేయించిన మిల్ మేకర్లను అందులో వేసి, అరకప్పు నీరుపోసి కలపాలి. కడాయిపై మూతపెట్టి సన్నని మంటపై ఉడికించాలి. నీరు ఇగిరిపోయి గుజ్జుగా అవుతుండగా.. సన్నగా తరిగిన కొత్తిమీర చల్లుకుని స్టవ్ ఆఫ్ చేసుకోవాలి.

అంతే .. ఘుమఘమలాడే మిల్ మేకర్ కర్రీ రెడీ. దీనిని అన్నం, చపాతీల్లో హ్యాపీగా తినవచ్చు.