Summer Drink: ఈ గింజలను గుర్తుపట్టారా..? గ్లాసుడు నీళ్లలో ఓ స్పూన్ నానబెట్టి తాగితే ఉంటుంది సామీ..

Fennel Water

వేసవి మండే ఎండల్లో ఉపశమనం కోసం చాలా మంది శీతలపానియాలు తాగేందుకు ఆసక్తి చూపుతారు. వేడి కారణంగా తలెత్తే డీహైడ్రేషన్, అలసట, నీరసం, ఒళ్ళు నొప్పులు, వడదెబ్బ, జీర్ణ సమస్యలు వంటి అనేక ఇబ్బందులు తలెత్తుతాయి. అందువల్ల ఈ సమయంలో ఆరోగ్యం పట్ల మరింత శ్రద్ధ తీసుకోవాలి. ఇటువంటి పరిస్థితులలో శరీరాన్ని చల్లగా ఉంచుకోవడానికి, డీహైడ్రేషన్ సమస్య నుంచి బయటపడటానికి కొబ్బరి నీళ్ళు, పుచ్చకాయ వంటి సీజనల్‌ పండ్లను తీసుకోవాలి. వీటితోపాటు ఈ వేడి వేసవిలో సోంపు గింజల నీటిని కూడా తాగవచ్చు. ఇవి శరీరాన్ని చల్లబరచడమే కాకుండా అనేక ఇతర ఆరోగ్య ప్రయోజనాలు కూడా అందిస్తాయి.

వేసవిలో సోంపు నీటిని ఎందుకు తాగాలంటే..

ఆయుర్వేదం ప్రకారం వేసవిలో శరీరంలో ‘పిత్త దోషం’ పెరిగి వేడి, వాపు, ఎసిడిటీకి కారణమవుతుంది. సోంపుకు చల్లదనాన్నిచ్చే గుణాలు ఉండటం వల్ల, అది పిత్తాన్ని సమతుల్యం చేస్తుంది. కాబట్టి, వేసవి కాలంలో ప్రతిరోజూ ఉదయం పరగడుపున సోంపు నీటిని తాగడం వల్ల శరీర ఉష్ణోగ్రత సమతుల్యంగా ఉండి, వడదెబ్బ తగిలే ప్రమాదం తగ్గుతుంది. ఇది మండుటెండలో కూడా శరీరాన్ని చల్లగా ఉంచుతుంది.

సోంపు నీటి వల్ల కలిగే ప్రయోజనాలు ఏమిటి?

జీర్ణ వ్యవస్థను మెరుగుపరుస్తుంది: వేసవిలో ఎసిడిటీ, గ్యాస్, మలబద్ధకం మరియు కడుపు నొప్పి వంటి సమస్యలు సర్వసాధారణం. సోంపు నీళ్లు ఈ సమస్యల నుంచి ఉపశమనం కలిగించడంలో సహాయపడతాయి. ఇందులో ఉండే ఫైబర్, యాంటీఆక్సిడెంట్లు జీర్ణక్రియను మెరుగుపరిచి, కడుపును తేలికగా ఉంచుతాయి.

శరీరాన్ని చల్లబరుస్తుంది

సోంపుకు సహజంగా చల్లదనాన్నిచ్చే గుణాలు ఉన్నాయి. వీటి నీటిని తాగడం వల్ల శరీర ఉష్ణోగ్రత తగ్గి, వడదెబ్బ నుంచి శరీరాన్ని కాపాడుతుంది. కాబట్టి మండు వేసవిలో బయటకు వెళ్లే ముందు సోంపు నీటిని తాగడం మంచిది.

శరీరానికి తేమ

నీటిలో కొన్ని సోంపు గింజలను కలపడం వల్ల దాని రుచి మెరుగుపడుతుంది. సోంపు నీరు శరీరానికి తేమను అందిస్తుంది. ఇది శరీర ఉష్ణోగ్రతను అదుపులో ఉంచడానికి, కణాల పనితీరును మెరుగుపరచడానికి సహాయపడుతుంది.

శరీరాన్ని శుద్ధి చేస్తుంది

సోంపు నీళ్లు శరీరం నుంచి విషపదార్థాలను బయటకు పంపడానికి సహాయపడుతుంది. ఇది కాలేయం, మూత్రపిండాలను శుభ్రపరుస్తుంది. తద్వారా స్పష్టమైన, కాంతివంతమైన చర్మాన్ని అందిస్తుంది.

బరువు అదుపు

మీరు త్వరగా బరువు తగ్గాలనుకుంటే వేసవిలో సోంపు నీటిని తప్పకుండా తాగాలి. ఇది మీ జీవక్రియను వేగవంతం చేసి, ఆకలిని నియంత్రిస్తుంది.

చర్మం – జుట్టుకు కూడా ప్రయోజనకరం

సోంపులో విటమిన్ సి, యాంటీఆక్సిడెంట్లు, ఖనిజాలు దండిగా ఉంటాయి. ఇది చర్మం కాంతిని పెంచి, జుట్టును మూలాల నుంచి బలపరుస్తుంది.

సోంపు నీటిని ఎలా తయారు చేయాలి?

ఒక టీస్పూన్ సోంపు గింజలను ఒక గ్లాసు నీటిలో రాత్రంతా నానబెట్టాలి. ఈ నీటిని వడకట్టి ఉదయం పరగడుపున తాగాలి. కావాలనుకుంటే ఈ నీటిని వేడి చేసుకుని కూడా తాగవచ్చు. ఇందులో కొద్దిగా తేనె, నిమ్మరసం కూడా కలుపుకోవచ్చు. అలాగే సోంపు గింజలు, రాతి చక్కెరను నూరి ఈ పొడిని చల్లటి నీటిలో కలిపి, అందులో కొద్దిగా నిమ్మరసంతో కలిపి తాగవచ్చు.

మరిన్ని ఆరోగ్య కథనాల కోసం క్లిక్‌ చేయండి.