Aircraft Carrier Vikrant: భారతదేశపు మొట్టమొదటి స్వదేశీ విమాన వాహక నౌక ‘విక్రాంత్’ రెడీ.. దీని ప్రత్యేకతలు ఇవే!

Aircraft Carrier Vikrant

Aircraft Carrier Vikrant: భారతదేశపు మొదటి స్వదేశీ విమాన వాహక నౌక ‘విక్రాంత్’ సముద్ర పరీక్షలు ఆగస్టు 4 నుండి ప్రారంభమయ్యాయి. ఇది దేశంలో నిర్మించిన అతిపెద్ద విమాన వాహక నౌక. ఈ వీడియోను ట్విట్టర్‌లో పంచుకుంటూ, భారత నావికాదళం ఇది భారతదేశానికి ‘గర్వించదగిన మరియు చారిత్రాత్మక దినం’ అని పేర్కొంది. ఇది స్వయం ఆధారిత భారతదేశం, మేక్ ఇన్ ఇండియా కింద నిర్మించిన దేశపు మొదటి స్వదేశీ విమాన వాహక నౌక. దీనితో, విమాన వాహక నౌకలను నిర్మిస్తున్న ఎంపిక చేసిన దేశాల జాబితాలో భారత్ చేరింది. ఈ దేశీయ క్యారియర్‌ ‘విక్రాంత్’ని వచ్చే ఏడాది నాటికి భారత నావికాదళంలోకి ప్రవేశపెట్టాలని భావిస్తున్నారు. ఈ సందర్భంగా విమాన వాహకాలు అంటే ఏమిటి? విక్రాంత్ ప్రత్యేకత ఏమిటి? ఇది నేవీలో చేరిన తర్వాత భారత సైన్యం బలం ఎంత పెరుగుతుంది? ఏ దేశాలలో ఎన్ని విమాన వాహకాలు ఉన్నాయి? వంటి ఆసక్తికర ప్రశ్నలకు సమాధానాలు ఇవిగో.. మీకోసం..

యుద్ధనౌకలు అంటే..

సరళమైన భాషలో అర్థం చేసుకుంటే, యుద్ధనౌక అంటే యుద్ధానికి సంబంధించిన పనిలో ఉపయోగించే ఓడ. సాధారణంగా అలాంటి నౌకలను ఒక దేశంలోని నౌకాదళం ఉపయోగిస్తుంది. విమాన వాహక నౌక కూడా ఒక రకమైన యుద్ధనౌక. ఒక విమాన వాహక నౌకను సముద్రంలో తేలుతున్న విమానాశ్రయంగా భావించవచ్చు. అంటే, విమాన వాహక నౌకలో విమానం టేకాఫ్ నుండి ల్యాండింగ్ వరకు కావలసిన అన్ని సౌకర్యాలు ఉంటాయి. వీటి పని శత్రు దేశాల నావికాదళంతో వ్యవహరించడం నుండి వైమానిక దళానికి మద్దతు ఇవ్వడం వరకు ఉంటుంది. సముద్ర భద్రత విషయంలో యుద్ధనౌకల పాత్ర చాలా ముఖ్యమైనది.

విక్రాంత్ గురించి..

విక్రాంత్ యుద్ధ నౌకను 23 వేల కోట్ల వ్యయంతో రూపొందించారు. ఈ విమాన వాహక నౌక 262 మీటర్ల పొడవు, 62 మీటర్ల వెడల్పుతో ఉంటుంది. దీనిని కొచ్చిన్ షిప్‌యార్డ్ లిమిటెడ్ నిర్మించింది. దీని గరిష్ట వేగం గంటకు 52 కిలోమీటర్లు. ఈ 14 అంతస్తుల క్యారియర్‌లో 2300 కంపార్ట్‌మెంట్లు ఉన్నాయి. ఓడలో ఒకేసారి 1700 మంది నావికులను నియమించవచ్చు. ఈ నౌకలో, మిగ్ -29 కె, కమోవ్ -31 హెలికాప్టర్‌లతో సహా 30 యుద్ధ విమానాలను కూడా ఏకకాలంలో మోహరించవచ్చు.

విక్రాంత్ ఎందుకు ప్రత్యేకమైనది?

వాస్తవానికి, విక్రాంత్ అతి పెద్ద లక్షణం దాని స్వదేశీయత. విక్రాంత్ తయారీలో వాడిన మెటీరియల్స్, పరికరాలలో 70% కంటే ఎక్కువ భారతదేశంలో తయారు చేసినవే. దీనితో, విమాన వాహక నౌకలను నిర్మించే సామర్ధ్యం కలిగిన ప్రపంచంలోని అతికొద్ది దేశాలలో భారతదేశం ఒకటిగా మారింది. క్యారియర్‌ను డిజైన్ చేయడం నుండి సమీకరించడం వరకు, అన్ని పనులు కొచ్చి షిప్‌యార్డ్‌లో జరిగాయి. దీని పూర్తి బాధ్యత డైరెక్టరేట్ ఆఫ్ నావల్ డిజైన్ (DND) తో ఉంటుంది. అలాగే, కెరీర్ స్వావలంబన భారత్, మేక్ ఇన్ ఇండియా కింద నిర్మించారు. దీని కారణంగా, దాని మొత్తం వ్యయంలో 80-85% (23 వేల కోట్లు) భారతీయ మార్కెట్‌లోనే ఖర్చు చేయడం జరిగింది. నిర్మాణ సమయంలో, 40 వేల మందికి ప్రత్యక్షంగా లేదా పరోక్షంగా ఉపాధి లభించింది.

విక్రాంత్ బలం ఇదీ..

విక్రాంత్ నావికాదళంలో చేరితే భారతదేశానికి గొప్ప బలం అని అంటున్నారు. 44 వేల 500 టన్నుల బరువున్న ఈ ఓడలో ట్విన్ ప్రొపెల్లర్లు ఉన్నాయి. ఇవి సముద్రంలో ఈ భారీ ఓడను గంటకు 52 కిలోమీటర్ల వేగంతో నడిచేలా చేస్తాయి. సాధారణ పరిస్థితులలో, ఈ క్యారియర్ గంటకు 33 కిలోమీటర్ల వేగంతో నిరంతరం 13 వేల కిలోమీటర్ల దూరాన్ని కవర్ చేయగలదు. అలాగే, ఈ క్యారియర్ నుండి ఒకేసారి 30 కి పైగా ఫైటర్ జెట్‌లు, హెలికాప్టర్‌లను ఆపరేట్ చేయవచ్చు. ఒకేసారి 2 వేలకు పైగా ప్రజలు ఇందులో నివసించవచ్చు. అంటే, ఈ విమాన వాహక నౌక ఒక చిన్న గ్రామం. ప్రారంభించిన తర్వాత, దీనిని ఐఎన్ఎస్ విక్రాంత్ అని పిలుస్తారు.

ఇది సైన్యం బలాన్ని ఎంతగా పెంచుతుంది?

రిటైర్డ్ నేవీ ఆఫీసర్, రక్షణ నిపుణుడు ఉదయ్ భాస్కర్ చెబుతున్నదాని ప్రకారం, విమాన వాహక నౌక పూర్తిగా నావికాదళంలో చేరిన తర్వాత హిందూ మహాసముద్రంలో భారతదేశ సరిహద్దు సామర్థ్యం పెరుగుతుంది. అదేవిధంగా హిందూ మహాసముద్రంలో చైనా తన ఆధిపత్యాన్ని పెంచుకుంటున్న ప్రస్తుత పరిస్థితిలో.. విమాన వాహక నౌక సహాయంతో, చైనా, పాకిస్తాన్ రెండింటితోనూ భారత్ పోటీపడగలదు.

భారత సైన్యంలో ఇదే మొదటి విమాన వాహక నౌకా?

కాదు.. భారతదేశంలో ప్రస్తుతం INS విక్రమాదిత్య ఉంది, ఇది నవంబర్ 2013 లో ప్రారంభించబడింది. 30 కి పైగా ఫైటర్ జెట్‌లను దానిపై పార్క్ చేయవచ్చు. ఇది రష్యా నుండి డీ-కమిషన్ చేయబడిన అడ్మిరల్ గోర్ష్కోవ్ అనే క్యారియర్ నుండి సవరించబడింది. ఇది కాకుండా, భారతదేశంలో మొదటి INS విరాట్, INS విక్రాంత్ విమాన వాహకాలు కూడా ఉన్నాయి. ప్రస్తుతం, రెండూ డీ-కమిషన్ చేయబడ్డాయి. ఈ రెండు విమాన వాహక నౌకలను బ్రిటన్ తయారు చేసింది.

దీనికి విక్రాంత్ అనే పేరు ఎందుకు పెట్టారు?

భారతదేశంలో ఇప్పటికే ఐఎన్‌ఎస్ విక్రాంత్ అనే ఎయిర్‌క్రాఫ్ట్ క్యారియర్ ఉండగా మళ్ళీ ఈ కొత్త నౌకకి కూడా అదేపేరు ఎందుకు పెట్టరని సందేహం రావచ్చు. నిజానికి, 1971 లో జరిగిన ఇండో-పాకిస్తాన్ యుద్ధంలో భారతదేశం ఇంతకు ముందు చేసిన ఐఎన్ఎస్ విక్రాంత్ చాలా ముఖ్యమైన పాత్ర పోషించింది. ఈ యుద్ధంలో పాకిస్తాన్ ఓడిపోయింది. పాకిస్తాన్ కూడా బంగ్లాదేశ్ రూపంలో తన భూమిని కోల్పోయింది. ఇప్పుడు 1971 యుద్ధంలో విజయం సాధించిన 50 వ వార్షికోత్సవాన్ని భారత్ జరుపుకుంటోంది. అందుకే నేవీ తన ఐఎన్ఎస్ విక్రాంత్ జ్ఞాపకార్థం ఈ కొత్త విమాన వాహక నౌకకు విక్రాంత్ అని పేరు పెట్టింది. ఇది ఐఎన్ఎస్ విక్రాంత్ పునర్జన్మ అని నేవీ తెలిపింది.

ఇంకో నౌక సిద్ధం అవుతోంది..

భారతదేశం తన రెండవ స్వదేశీ విమాన వాహక నౌక విశాల్‌పై పనిచేస్తోంది. అయితే, దాని మొత్తం ప్రణాళిక ఇంకా ఆమోదించడం జరగలేదు. దీని ప్రణాళికలు ఇంకా ప్రారంభ దశలోనే ఉన్నాయి. ఈ వాహక నౌకను ఎలక్ట్రోమాగ్నెటిక్ ఎయిర్‌క్రాఫ్ట్ లాంచ్ సిస్టమ్ (EMALS) తో సన్నద్ధం చేసే ప్రణాళికలో నేవీ పనిచేస్తోంది.

Also Read: ఆన్‌లైన్‌ బ్యాంకింగ్‌ చేస్తున్నారా? గూగుల్‌లో యాప్స్‌ కోసం వెతుకుతున్నారా..? అయితే మీ ఖాతా ఖాళీ.. జాగ్రత్త..!

Samsung Galaxy F62: శాంసంగ్‌ బంపర్‌ ఆఫర్.. ఆ స్మార్ట్‌ఫోన్‌పై భారీ తగ్గింపు.. అదిరిపోయే ఫీచర్స్‌!