ప్రొద్దుటూరు టీడీపీ నేత హత్య కేసులో కొత్త కోణం.. సంచలన వ్యాఖ్యలు చేసిన సుబ్బయ్య సతీమణి అపరాజిత

ఆంధ్రప్రదేశ్ రాష్ట్రంలోని వైఎస్సార్ కడప జిల్లా ప్రొద్దుటూరు టీడీపీ నేత నందం సుబ్బయ్య హత్యపై రాజకీయ దుమారం రాజుకుంది. ప్రొద్దుటూరులో ఎమ్మెల్యే రాచమల్లు ప్రసాద్ రెడ్డి చేసిన దైవ ప్రమాణపై సుబ్బయ్య సతీమణి సంచలన వ్యాఖ్యలు చేశారు. తన భర్త టీడీపీ నేత సుబ్బయ్యను ముమ్మాటికీ ఎమ్మెల్యే, అనుచరులు హత్య చేయించారని ఆరోపించారు. సుబ్బయ్య హత్యకేసులో స్థానిక ఎమ్మెల్యేపై ఆరోపణలు రావడంతో ఆయన తన నియోజకవర్గంలో ఉన్న ఆలయంలో ప్రమాణం చేశారు. తనకు ఆ హత్యకు ఎలాంటి సంబంధం లేదన్నారు.

ప్రొద్దుటూరులో ఎమ్మెల్యే రాచమల్లు ప్రసాద్ రెడ్డి చేసిన దైవ ప్రమాణపై సుబ్బయ్య సతీమణి అపరాజిత స్పందించారు. తన భర్త హత్యతో సంబంధం లేదని ఎమ్మెల్యే ప్రసాద్ రెడ్డి దైవ ప్రమాణం చేశారని.. తాను ఇద్దరి పిల్లల మీద ప్రమాణం చేసి చెబుతున్నా.. ఎమ్మెల్యే బావమరిది బంగారురెడ్డి తన భర్తను చంపారని ఆరోపించారు. ఎమ్మెల్యే ప్రోద్బలంతోనే ఈ హత్య జరిగిందన్నారు. బంగారు రెడ్డిపై మొదటి నుండి ఇన్ని ఆరోపణలు వచ్చిప్పుడు.. ఆయన ఎందుకు స్పందిచలేదని అపరాజిత ప్రశ్నించారు. బంగారు రెడ్డి కూడా ప్రమాణం చేసి చెప్పాలని డిమాండ్ చేశారు. తన భర్త మొబైల్ ఇప్పటి వరకు దొరకలేదన్న ఆమె.. పూర్తిస్థాయిలో విచారణ జరిపి నిందితులను కఠినంగా శిక్షించాలని ఆమె డిమాండ్ చేశారు.