Hair care Tips: అందరికీ తెలిసిన గురివింద గింజలు.. ఇలా ఉప‌యోగిస్తే జుట్టు వేగంగా పెరుగుతుంది..!
Gurivinda Ginjalu: గురువింద గింజ తన కింద నలుపు ఎరుగదనే శాస్త్రం మనందరికీ తెలిసిందే..! మన చిన్నతనంలో ఈ గింజలను బంగారం తూకం వేయడానికి ఉపయోగించేవారు. గురువింద గింజల ను లక్ష్మీ స్వరూపంగా కొలుస్తారు.. ఇది తీగ జాతి మొక్క.. ఇందులో ఆకుపచ్చ, పసుపు, తెలుపు, నలుపు రకాలు ఉన్నాయి.. కాకపోతే ఇది అరుదుగా కనిపిస్తాయి. వీటి గింజలు విషపూరితంగా భావిస్తారు.. కానీ, గురివింద గింజల ఉపయోగాలు తెలిస్తే షాక్‌ అవ్వాల్సిందే..!
గురివింద మొక్క తీగలు పల్లెలు, పంట పొలాల ద‌గ్గ‌ర, చేల కంచెల వెంబ‌డి విరివిరిగా కనిపిస్తుంటాయి. గ్రామీణ ప్రజలకు ఈ గింజల గురించి బాగా తెలుసు. ఆయుర్వేద షాపుల్లో అమ్ముతుంటారు. పైగా ఇప్పుడు ఆన్‌లైన్‌ మార్కెట్లోను గురివింద గింజలను విక్రయిస్తున్నారు.
గురివింద చెట్టు ఆకులు, కాండం లో అనేక ఔషధ గుణాలు ఉన్నాయి. ఇవి మన ఆరోగ్యానికి చాలా మేలు చేస్తాయి. గురివింద గింజలను కేశ సంరక్షణలో కూడా ఉపయోగిస్తారని మీకు తెలుసా.? వీటిని ఇలా ఉప‌యోగిస్తే జుట్టు వేగంగా పెరుగుతుందని నిపుణులు చెబుతున్నారు. జుట్టు రాలిపోవటం, తలలో దురద, చుండ్రు వంటి సమస్యలను తగ్గించటానికి గురివింద గింజలు సహాయపడతాయి.
జుట్టు సమస్యల కోసం గురివింద గింజలను తీసుకుని చిన్న చిన్న ముక్కలుగా మిక్సీ చేసుకోవాలి. అది పప్పులు పప్పులుగా అవుతుంది. అప్పుడు దాన్ని ఒక మందపాటి బట్టలో పోసి మూట కట్టాలి. త‌రువాత ఒక గిన్నెలో అర గ్లాసు పాలు పోసుకుని, ఇందులో గురివింద గింజల మూట వేసి పాలు పూర్తిగా ఆవిరై పోయే వరకు మ‌రిగించాలి. ఆ తర్వాత మూట‌ను తీసి ప‌క్కకు పెట్టాలి.
మరొక గిన్నెలో 100 గ్రాముల కొబ్బరి నూనె తీసుకోని ఒక స్పూన్ గుంట‌గ‌ల‌గ‌రాకు పొడిని వేసి క‌ల‌పాలి. ఆ తర్వాత ఉడికించిన గురివింద గింజల ప‌ప్పు కూడా వేసి క‌ల‌పాలి. ఈ మిశ్రమాన్ని పొయ్యి మీద పెట్టి 5 నుంచి 7 నిమిషాల వరకు మరిగించి చల్లారబెట్టాలి. ఈ నూనెను వడకట్టి నిల్వ చేసుకోవాలి.
ఈ నూనెను రాత్రి పడుకొనే ముందు జుట్టు కుదుళ్ళ నుండి చివర్ల వరకు బాగా అప్లై చేయాలి. ఆ మరుసటి రోజు ఉదయం తేలికపాటి షాంపుతో తలస్నానం చేయాలి. ఇలా చేయ‌డం వ‌ల్ల క్రమంగా జుట్టు రాల‌డం త‌గ్గుతుంది. జుట్టు ఒత్తుగా, న‌ల్ల‌గా పెరుగుతుంది. దురద, చుండ్రు వంటి స‌మ‌స్య‌లు దూర‌మ‌వుతాయి. ఇలా వారానికి రెండు సార్లు చేస్తూ ఉంటే..త్వరలోనే మంచి ఫ‌లితం ఉంటుంది.