కరోనాపై 130 రోజుల పోరాటం.. మహమ్మారిని జయించిన బ్రిటన్ మహిళ..!

UK woman beats coronavirus: కోవిద్-19 విజృంభిస్తోంది. ప్రపంచ దేశాలను వణికిస్తోంది. ఈ క్రమంలో బ్రిటన్‌కు చెందిన 35ఏళ్ల మహిళ దాదాపు 130రోజులు కరోనాతో పోరాటం చేసి, విజయం సాధించింది. బ్రిటన్‌కు చెందిన 35ఏళ్ల ఫాతిమా.. మొరాకో నుంచి తిరిగి వచ్చిన తర్వాత కొద్ది రోజులకు అనారోగ్యానికి గురయ్యారు. దీంతో ఆమె వైద్యులను సంప్రదించగా.. కరోనా సోకినట్లు వెల్లడించారు. ఈ క్రమంలో తీవ్ర అనారోగ్యానికి గురైన ఫాతిమా బ్రిటన్‌లోని సౌతాంప్టన్ జనరల్ ఆసుపత్రిలో చేరారు.

ఈ నేపథ్యంలో దాదాపు 105 రోజులపాటు వెంటిలేటర్లపై ఉంచి ఆమెకు డాక్టర్లు వైద్యం అందించారు. ఇటీవలే ఫాతిమా వైరస్ బారి నుంచి కోలుకున్నారు. దీంతో డాక్టర్లు ఆమెను రికవరీ వార్డుకు తరలించారు. ఈ క్రమంలో స్పందించిన ఆమె.. ‘ఇది ఒక కలలా అనిపిస్తుందంటూ’ కోలుకోవడం గురించి వ్యాఖ్యానించారు. ఇదిలా ఉంటే.. బ్రిటన్‌లో ఇప్పటి వరకు 2.94లక్షల మంది కరోనా బారినపడగా.. సుమారు 45వేల మంది ప్రాణాలు కోల్పోయారు.