మునక్కాయతో ఇలా వెల్లుల్లి కారం కూర చేశారంటే.. రెండ ముద్దలు ఎక్కువే తింటారు!

Drumstick

మునక్కాయ అంటే ఇష్టపడని వారు ఎవరూ ఉండరు. సాంబార్‌లో వేసినా, మాంసంతో కలిపి వండినా దాని రుచే వేరు. అయితే, ఎప్పుడూ చేసే రొటీన్ పద్ధతిలో కాకుండా, కొంచెం స్పెషల్‌గా వెల్లుల్లి కారం దట్టించి మునక్కాయ మసాలా కూర చేస్తే ఆ రుచి అద్భుతంగా ఉంటుంది. ఈ కూర అన్నంలోకి మాత్రమే కాకుండా చపాతీ, జొన్న రొట్టెల్లోకి కూడా చాలా బాగుంటుంది. మునక్కాయలో ఉండే పోషకాలతో పాటు వెల్లుల్లి వల్ల కలిగే ఆరోగ్య ప్రయోజనాలు ఈ వంటకాన్ని మరింత ప్రత్యేకం చేస్తాయి.

ముందుగా ఈ కూరకు ప్రధాన ఆకర్షణ అయిన వెల్లుల్లి కారాన్ని సిద్ధం చేసుకోవాలి. ఒక మిక్సీ జార్‌లో లేదా రోటిలో అర కప్పు వెల్లుల్లి రెబ్బలు, తగినంత కారం, కొద్దిగా జీలకర్ర, ఉప్పు వేసి కచ్చాపచ్చాగా దంచుకోవాలి. ఈ వెల్లుల్లి కారం మునక్కాయ ముక్కలకు పడితే వచ్చే రుచి మరే మసాలా ఇవ్వలేదు. మునక్కాయలను సమాన పరిమాణంలో ముక్కలుగా కట్ చేసుకుని పక్కన పెట్టుకోవాలి. బాణలిలో కొంచెం నూనె వేసి ఆవాలు, జీలకర్ర, ఎండుమిర్చి, కరివేపాకుతో పోపు పెట్టుకోవాలి. ఇప్పుడు సన్నగా తరిగిన ఉల్లిపాయ ముక్కలు వేసి అవి గోల్డెన్ బ్రౌన్ కలర్ వచ్చే వరకు వేయించాలి. ఉల్లిపాయలు బాగా వేగితేనే గ్రేవీకి మంచి రుచి వస్తుంది.

ఉల్లిపాయలు వేగిన తర్వాత మునక్కాయ ముక్కలను వేసి కొద్దిగా పసుపు, ఉప్పు చల్లి నిమిషం పాటు మగ్గనివ్వాలి. ముక్కలు ఉడకడానికి సరిపడా నీళ్లు పోసి మూత పెట్టి ఐదు నుండి పది నిమిషాల పాటు ఉడికించాలి. మునక్కాయ ముక్కలు మెత్తబడ్డాక, మనం సిద్ధం చేసుకున్న వెల్లుల్లి కారాన్ని వేసి బాగా కలపాలి. చివరగా కొంచెం ధనియాల పొడి, కొత్తిమీర చల్లితే వేడివేడి మునక్కాయ వెల్లుల్లి కారం రెడీ! తక్కువ సమయంలో, ఇంట్లో ఉండే సామాన్లతోనే ఎంతో రుచికరమైన ఈ మునక్కాయ కూరను తయారు చేసుకోవచ్చు. వెల్లుల్లి ఘాటు, మునక్కాయ రుచి కలిసి మీ భోజనాన్ని మరింత రుచికరంగా మారుస్తాయి.