ఆ హీరోయిన్ చాలా ప్రొఫెషనల్.. ఆమె స్థానాన్ని ఎప్పటికీ ఎవ్వరూ భర్తీ చేయలేరు
తెలుగు చలన చిత్ర పరిశ్రమలో ఒకప్పుడు హీరోగా దూసుపోయిన నటుడు సుమన్. ఎన్నో సూపర్ హిట్ చిత్రాలతో తక్కువ సమయంలోనే ఇండస్ట్రీలో తనదైన ముద్ర వేశారు. కానీ ఆ తర్వాత నెమ్మదిగా గ్రాఫ్ తగ్గిపోయింది. ఆ తర్వాత కంటెంట్ ప్రాధాన్యతను బట్టి సహయ నటుడిగా కనిపించి మెప్పించారు.
ప్రముఖ నటుడు సుమన్ తన సినీ జీవితంలోని అనేక ఆసక్తికరమైన అంశాలను, జ్ఞాపకాలను, ముఖ్యంగా దివంగత నటి సిల్క్ స్మిత గురించి తన అనుభవాలను పంచుకున్నారు. ఓ ఇంటర్వ్యూలో ఆయన తన కెరీర్లో సాధించిన సంగీత విజయాల గురించి మాట్లాడుతూ, రాజ్-కోటి సంగీత దర్శకత్వంలో తనకు, చిరంజీవి గారికి అనేక హిట్లు వచ్చేవని గుర్తుచేసుకున్నారు. ఇళయరాజా తక్కువ చిత్రాలకు సంగీతం అందించినా.. రాజ్-కోటి అందించిన ట్యూన్లు అప్పట్లో ట్రెండ్ సెట్టర్గా నిలిచాయని చెప్పారు. డైరెక్టర్ శరత్ తన పాటలను అద్భుతంగా చిత్రీకరించేవారని, ట్యూన్కు తగ్గట్టుగా స్టెప్లు వేసేలా ఆయన ప్రత్యేక శ్రద్ధ చూపేవారని సుమన్ అన్నారు. ఆడియో హిట్లు, క్యాసెట్ల అమ్మకాలు, సిల్వర్, ప్లాటినం డిస్క్ల ద్వారా అప్పట్లో సినిమా పాటల విజయాన్ని అంచనా వేసేవారని తెలిపారు. ఆటోలు, టాక్సీలలో తన పాటలు లౌడ్గా ప్లే అవుతున్నప్పుడు, పండుగలప్పుడు కార్లలో వెళ్తున్నప్పుడు తమ పాటలు వినిపించినప్పుడు కలిగే థ్రిల్ను ఆయన వివరించారు.
ఇప్పటికీ కొన్ని గ్రామాలలో తన పాత పాటలు, ముఖ్యంగా బావ బామ్మర్ది చిత్రంలోని “గజ్జ ఘల్లుమన్నది” పాట వినిపిస్తూ ఉంటుందని సుమన్ ఆనందం వ్యక్తం చేశారు. బావ బామ్మర్ది సినిమా అనుభవాలను పంచుకుంటూ, కృష్ణం రాజు గారితో పని చేయడం తనకు ఒక చిన్న భయాన్ని కలిగించినా, ఆయన చాలా స్నేహపూర్వకంగా ఉండేవారని, సొంత తమ్ముడిలా చూసుకునేవారని సుమన్ చెప్పారు. జయసుధ కూడా సీనియర్ అయినప్పటికీ, చాలా డౌన్ టు ఎర్త్, సున్నితంగా వ్యవహరించారని పేర్కొన్నారు. ఆ సినిమాలో తన పాత్ర పేరు రాజు అని, ఆ సెంటిమెంట్ బాగా క్యారీ ఆన్ అయిందని, చాలామంది తనను రాజు అని పిలిచేవారని గుర్తుచేసుకున్నారు.
సిల్క్ స్మితతో తన అనుభవం గురించి మాట్లాడుతూ.. ఆమె ఒక అద్భుతమైన, క్రమశిక్షణ కలిగిన, ప్రొఫెషనల్ వ్యక్తి అని సుమన్ పేర్కొన్నారు. మేకప్, డ్రెస్సింగ్లో ఆమె అద్భుతమైన అభిరుచి ఉన్న మనిషి, తన దుస్తులను తనే స్వయంగా ఎంచుకునేవారని వెల్లడించారు. ఆమె చాలా స్నేహపూర్వకంగా, నిష్కపటంగా వ్యవహరించేవారని, అయితే తప్పుగా ప్రవర్తించే వారి పట్ల చాలా కఠినంగా ఉండేవారని తెలిపారు. తాను ఎల్లప్పుడూ ప్రొఫెషనల్గా ఉండి, ఆమెను గౌరవించడం వల్ల తమ మధ్య మంచి స్నేహం ఉండేదని సుమన్ వివరించారు. ఆమె ఆత్మహత్య చేసుకోవడం చాలా దురదృష్టకరమని, ఆమె స్థానాన్ని ఇప్పటికీ ఎవరూ భర్తీ చేయలేకపోయారని, సిల్క్ స్మిత స్థానం ఇంకా ఖాళీగానే ఉందని సుమన్ ఆవేదన వ్యక్తం చేశారు. ఆమె కళ్ళు, హావభావాలు అద్భుతమని, ఆమె ఒక గొప్ప వ్యక్తి అని కొనియాడారు.
మరిన్ని సినిమా వార్తల కోసం ఇక్కడ క్లిక్ చేయండి