Missing Meghana Movie: మిస్సింగ్ మేఘన మూవీ రివ్యూ.. మిస్సింగ్ సస్పెన్స్ డ్రామా ఎలా ఉంది..?
కూతురు మిస్సింగ్ నేపథ్యంలో ఓ నాన్న ఏం చేశాడు అనే కథతో వచ్చిన సినిమా మిస్సింగ్ మేఘన. వాచస్పతి ఈ సినిమాను తెరకెక్కించాడు. రామ్ కార్తీక్, అమ్ము అభిరామి, వైదిక సెంజాలియా, అంకిత్ కొయ్య ప్రధాన పాత్రల్లో నటించిన ఈ సస్పెన్స్ అండ్ మిస్టరీ చిత్రానికి వాచస్పతి దర్శకత్వం వహించారు. ఈ సినిమా ఎలా ఉందో పూర్తి రివ్యూలో చూద్దామా..
మూవీ రివ్యూ: మిస్సింగ్ మేఘన
నటీనటులు: రామ్ కార్తీక్, అమ్ము అభిరామి, కౌశిక్, వైదిక సెంజాలియా, అంకిత్ కొయ్య, గోపరాజు రమణ తదితరులు..
సంగీతం: ఆర్ఆర్ ధృవన్
ఎడిటర్: బసవ
సినిమాటోగ్రఫీ: శ్యామ్ కే నాయుడు
దర్శకత్వం: వాచస్పతి
కూతురు మిస్సింగ్ నేపథ్యంలో ఓ నాన్న ఏం చేశాడు అనే కథతో వచ్చిన సినిమా మిస్సింగ్ మేఘన. వాచస్పతి ఈ సినిమాను తెరకెక్కించాడు. ఈ సినిమా ఎలా ఉందో పూర్తి రివ్యూలో చూద్దామా..
కథ:
సడెన్గా ఒక రోజు మేఘన (అమ్ము అభిరామి) ఇంటికి రాకపోవడంతో ఈ చిత్రం ప్రారంభమవుతుంది. కూతురు కనిపించడం లేదని ఆమె నాన్న పోలీసులకు ఫిర్యాదు చేస్తాడు. కానీ వాళ్ళ నుంచి ఆశించిన స్థాయిలో స్పందన ఉండదు. దాంతో మేఘనను పెళ్లి చేసుకోబోయే కుర్రాడు, వృత్తిరీత్యా ACP అయిన అర్జున్ (కౌశిక్) స్వయంగా ఈ అదృశ్యం మిస్టరీని ఛేదించే పనిలో పడతాడు. ఈ క్రమంలో విచారణ మొదలుపెట్టగా.. చివరగా ఆమెకు లిఫ్ట్ ఇచ్చిన బైక్ రైడర్ కార్తీక్ (రామ్ కార్తీక్) పోలీసుల కంట్లో పడతాడు. కానీ తనకు ఈ కేసుకు ఎలాంటి సంబంధం లేదని అతను బుకాయిస్తాడు. మరో పక్క అతని పాత లవ్ స్టోరీ, ఫోన్ కాల్స్ డేటా విచారణను వేరే దారికి తీసుకెళ్తాయి. ఇంతకీ మేఘన ఏమైంది? ఆమె మిస్ అవ్వడానికి కార్తీక్కు ఉన్న లింక్ ఏంటి? అసలు ఈ అదృశ్యం వెనక ఉన్న మాస్టర్ మైండ్ ఎవరు? అనేదే ఈ చిత్ర ఇతివృత్తం.
కథనం:
ఈ చిత్రాన్ని కేవలం ఒక అమ్మాయి అదృశ్యం చుట్టూ తిరిగే పాయింట్లా కాకుండా మర్డర్ మిస్టరీ, డ్రగ్ మాఫియా, ప్రేమకథ ఇలా రకరకాల ఎలిమెంట్స్ను జోడించి తీశారు. ప్రారంభంలో పాత్రల పరిచయం, వాతావరణం సెట్ చేయడానికి దర్శకుడు కాస్త ఎక్కువ సమయం తీసుకున్నాడు. దీనివల్ల ప్రథమార్ధం నెమ్మదిగా సాగుతున్న ఫీలింగ్ కలుగుతుంది. కానీ సగం సినిమా పూర్తయ్యే సరికి వచ్చే ఇంటర్వెల్ బ్యాంగ్ మాత్రం ప్రేక్షకులలో తదుపరి ఏం జరుగుతుందనే ఉత్కంఠను గట్టిగానే రేపుతుంది. ఇక ద్వితీయార్థంలో మాత్రం సినిమా స్పీడ్ అందుకుంటుంది. ఒక సాధారణ మిస్సింగ్ కేసు కాస్తా పెద్ద క్రైమ్ ఇన్వెస్టిగేషన్ లాగా టర్న్ అవ్వడం, ఊహించని విషయాలు ఒక్కొక్కటిగా బయటకు రావడం ప్రేక్షకులను ఎంగేజ్ చేస్తాయి. హీరో, పోలీస్ డిపార్ట్మెంట్ కలిసి ఆధారాలు సేకరించే తీరు మెప్పిస్తుంది. అయితే దర్శకుడు రాసుకున్న కొన్ని మలుపులు సగటు ప్రేక్షకుడికి ముందే అర్థమైపోతాయి. ముఖ్యంగా మెయిన్ విలన్ ఎవరనేది రివీల్ చేసినప్పుడు ఎలాంటి సర్ప్రైజ్ అనిపించదు. అలాగే క్లైమాక్స్ కూడా రొటీన్ యాక్షన్ సినిమాలను తలపిస్తాయి. ఇన్ని చిన్న చిన్న లోపాలు ఉన్నప్పటికీ, సెకండాఫ్లో ఉండే ఇన్వెస్టిగేషన్ ట్రాక్, అక్కడక్కడా వచ్చే కొన్ని థ్రిల్లింగ్ అంశాలు సినిమాను బోర్ కొట్టకుండా కాపాడాయి. క్రైమ్ కథలను ఇష్టపడే వారికి ఈ సినిమా ఒక మోస్తరుగా నచ్చుతుంది.
నటీనటులు:
టైటిల్ రోల్ ప్లే చేసిన అమ్ము అభిరామి చాలా చక్కగా నటించింది. ఆమె స్క్రీన్ ప్రెజెన్స్ బాగుంది, సెంటిమెంట్ పండించే చోట తన ప్రతిభ కనబరిచింది. ఇక రామ్ కార్తీక్ తన క్యారెక్టర్లో పూర్తిగా ఇమిడిపోయాడు. బ్రేకప్ అయిన యువకుడిగా, యాక్షన్ సీక్వెన్సుల్లో తన బెస్ట్ ఇచ్చాడు. ఖాకీ దుస్తుల్లో కనిపించిన కౌశిక్ ఫుల్ ఎనర్జీతో అదరగొట్టాడు. తండ్రి పాత్రలో గోపరాజు రమణ తనదైన సహజ నటనతో కట్టిపడేశారు. అంకిత్ కొయ్యతో పాటు మిగిలిన ఆర్టిస్టులంతా తమ పాత్రల పరిధి మేర న్యాయం చేశారు.
టెక్నికల్ టీం:
ధృవన్ ఇచ్చిన పాటలు వినడానికి పర్వాలేదనిపిస్తాయి. అయితే ఒక థ్రిల్లర్ జానర్కి ప్రాణమైన నేపథ్య సంగీతం ఇంకాస్త పవర్ఫుల్గా ఇచ్చి ఉంటే రిజల్ట్ బాగుండేది. కెమెరామెన్ శ్యామ్ కే నాయుడు పనితనం ఈ సినిమాకు బాగా ప్లస్ అయింది. చాలా విజువల్స్ రిచ్గా అనిపిస్తాయి. ఎడిటర్ బసవ తన కత్తెరకు ఫస్ట్ హాఫ్లో కొంచెం పని చెప్పాల్సింది. సాగదీతగా అనిపించే సీన్లను కట్ చేసి ఉంటే సినిమా మరింత గ్రిప్పింగ్గా వచ్చేది. నిర్మాణ విలువలు కథా స్థాయికి తగ్గట్టుగా బాగానే ఉన్నాయి.
పంచ్ లైన్:
ఓవరాల్ గా మిస్సింగ్ మేఘన.. డీసెంట్ థ్రిల్లర్..!