Amara Raja Batteries: అమర రాజా లిథియం అయాన్‌ బ్యాటరీ కంపెనీ కీలక నిర్ణయం.. తిరుపతిలో ఉత్పత్తి యూనిట్‌..!
Amara Raja Batteries: ఆటోమోటివ్‌ బ్యాటరీ తయారీదారు అమర రాజా బ్యాటరీస్‌ కీలక నిర్ణయం తీసుకుంది. లిథియం అయాన్‌ బ్యాటరీలను తిరుపతిలో ఉత్పత్తి చేసేందుకు సిద్దమవుతోంది...
Amara Raja Batteries: ఆటోమోటివ్‌ బ్యాటరీ తయారీదారు అమర రాజా బ్యాటరీస్‌ కీలక నిర్ణయం తీసుకుంది. లిథియం అయాన్‌ బ్యాటరీలను తిరుపతిలో ఉత్పత్తి చేసేందుకు సిద్దమవుతోంది. ఇందు కోసం తిరుపతిలోని తన ఉత్పత్తి కేంద్రంలోనే ప్రత్యేక టెక్నాలజీ రీసెర్చ్‌ హబ్‌తో పాటు ఉత్పత్తి యూనిట్‌ను ఏర్పాటు చేయనుంది. లిథియం అయాన్‌ బ్యాటరీ కోసం దేశంలో ఒక ప్రైవేటు కంపెనీ ఇలాంటి యూనిట్‌ను ఏర్పాటు చేయడం ఇదే మొదటిసారని అమర రాజా బ్యాటరీస్‌ సీఈవో విజయానంద్‌ వెల్లడించారు.
ఈ బ్యాటరీల తయారీకి అవసరమైన సాంకేతిక పరిజ్ఞానాన్ని భారత అంతరిక్ష పరిశోధనా సంస్థ (ఇస్రో) అందిస్తోంది. టెక్నాలజీ బదిలీ, బిల్డింగ్‌ కోసం అమర రాజ 2019లోనే ఇస్రోకు కొంత మొత్తాన్ని చెల్లించింది. మరో వైపు లిథియం అయాన్‌ బ్యాటరీల అభివృద్ధికి సంబంధించి ఇప్పటికే రూ.20 కోట్ల వరకు పెట్టుబడులు పెట్టినట్లు సీఈవో విజయానంద్‌ వెల్లడించారు.
రెండేళ్లలో ఉత్పత్తి ప్రారంభం
అమర రాజా ఉత్పత్తి చేయబోయే లిథియం అయాన్‌ బ్యాటరీ విడి భాగాల్లో మూడింట రెండొంతులు దేశీయంగానే లభిస్తాయని తెలిపారు. ప్రధాన ముడి పదార్థమైన లిథియంను మాత్రం ఆస్ట్రేలియా లేదా కొన్ని లాటిన్‌ దేశాల నుంచి దిగుమతి చేసుకోవాలని ఆలోచిస్తున్నట్లు చెప్పారు. రానున్న రోజుల్లో తమ లిథియం అయాన్‌ బ్యాటరీల ఉత్పత్తి ప్రారంభం అవుతుందని పేర్కొన్నారు. అయితే ప్రస్తుతం ఎలక్ట్రిక్‌ వాహనాల తయరీదారులు లిథియం బ్యాటరీలను చైనా నుంచి దిగుమతి చేసుకుంటున్నాయని, ఇది ఆ కంపెనీలకు భారంగా ఉంటోందని అన్నారు.
దేశంలో రెండో స్థానంలో..
కాగా, లెడ్‌ యాసిడ్‌ ఆధారిత బ్యాటరీల ఉత్పత్తిలో అమర రాజా బ్యాటరీస్‌ ప్రస్తుతం దేశంలో రెండో స్థానంలో ఉందని విజయానంద్‌ వెల్లడించారు. లిథియం అయాన్‌ బ్యాటరీల ఉత్పత్తి ప్రారంభమైనా మార్కెట్లో మరి కొన్ని దశాబ్దాల పాటు లెడ్‌ యాసిడ్‌ బ్యాటరీల హవా కొనసాగుతుందన్నారు.