23 ఏళ్లకు దొరికిన వజ్రాల స్మగ్లర్ హరీష్ కల్యాణ్

ఇరవై ఏళ్లకు పైగా తప్పించుకు తిరుగుతున్న వజ్రాల వ్యాపారిని ఎట్టకేలకు పోలీసులు పట్టుకున్నారు. వజ్రాల స్మగ్లింగ్ చేస్తూ వందల కేసుల్లో నిందితుడుగా ఉన్న హరీష్ కల్యాణ్ ని ముంబై పోలీసులు అరెస్ట్ చేశారు

వజ్రాలు, బంగారం స్మగ్లింగ్ చేసి పరారీలో ఉన్న మోస్ట్ వాంటెడ్ బడా స్మగ్లర్ ను 23 ఏళ్ల తర్వాత ముంబై పోలీసులు అదుపులోకి తీసుకున్నారు. ముంబై నగరానికి చెందిన హరీష్ కల్యాణ్ దాస్ భావసర్ అలియాస్ పరేష్ ఝావేరీ (53)వజ్రాలు, బంగారం స్మగ్లర్. అక్రమ దందా నిర్వహిస్తూ హరీష్ కల్యాణ్ ప్రభుత్వానికి 130కోట్ల రూపాయల పన్ను ఎగవేశాడు. దీంతో 1997లో ఇతనిపై మొదటి కేసు నమోదు చేసిన ముంబై పోలీసులు గాలింపు చేపట్టారు. అప్పటి నుంచి ఇప్పటి వరకు పోలీసులకు చిక్కకుండా రకరకాల వేషాల్లో తప్పించుకు తిరుగుతున్నాడు. ఇంతకాలం అతనిపై నిఘా పెట్టిన పోలీసులు ఎట్టకేలకు అరెస్ట్ చేశారు. హరీష్ కల్యాణ్ సింగపూర్ నుంచి ముడి బంగారం, వజ్రాలను దిగుమతి చేసుకొనేవాడని పోలీసులు తెలిపారు. దీంతో ఎన్ ఫోర్స్ మెంట్ డైరెక్టరేట్ అధికారులు కేసు నమోదు చేశారు. అప్పటి నుంచి పరారీలో ఉన్న స్మగ్లర్ హరీష్ ను అరెస్ట్ చేశామని ముంబై పోలీసులు తెలిపారు. హరీష్ పై బంగారం, వజ్రాల స్మగ్లింగ్ కేసు నమోదు చేశామని వెల్లడించారు.