Andhra Pradesh: కన్నీరు పెట్టించే ఘటన.. భార్య మృతదేహంపై పడి రోదిస్తూ భర్త మృతి

Wife And Husband Death

అన్యోన్య దాంపత్యం.. ఈ మాటను ప్రజంట్ జనరేషన్‌లో చాలా అరుదుగా వింటున్నాం. ఇప్పుడు తేడా వస్తే విడాకులే. మాటా, మాటా అనుకున్నా చాలు.. నీకు, నాకు సెట్ అవ్వదు అంటూ డివైడ్ అయిపోతున్నారు. అయితే భార్య మరణాన్ని జీర్ణించుకోలేని ఓ భర్త ఆమె మృతదేహం ముందు రోదిస్తూ తనువు చాలించాడు. భార్య మరణాన్ని తట్టుకోలేక గుండెపగిలి చనిపోయాడు. కలిసే జీవించారు.. కలిసే గంటల వ్యవధిలో ఇద్దరూ లోకాన్ని వీడారు. విశాఖ జిల్లా చోడవరం మండలం రావికమతంలో ఈ విషాద ఘటన చోటుచేసుకుంది. సింగంశెట్టి వెంకటరమణ, వరలక్ష్మికి 30 ఏళ్ల కిందట వివాహమైంది. సింగంశెట్టి భవాని (51) అనారోగ్య సమస్యలతో మృతి చెందగా.. ఆమె మరణాన్ని తట్టుకోలేక భర్త వెంకటరమణ (56) గుండెపోటుతో మరణించారు. పిల్లాపాపలతో సంతోషంగా ఉండాలనుకున్న వీరికి.. సంతానం కలగకపోవడంతో భవాని అక్క మనుమడు వర్ధన్‌ (14)ను దత్తత తీసుకున్నారు. వెంకటరమణ స్థానిక సాయిబాబా గుడి సమీపంలో కిరాణా, ఫ్యాన్సీ స్టోర్ పెట్టి కుటుంబాన్ని పోషిస్తున్నారు. ఇటీవలి కాలంలో భవాని మధుమేహం, రక్తపోటు, ఆయాసంతో అనారోగ్యానికి గురయ్యారు.

ఆయాసం ఎక్కువై పరిస్థితి కాస్త విషమించడంతో గురువారం రాత్రి రెండు గంటల సమయంలో చోడవరంలోని ఓ ప్రైవేటు ఆసుపత్రికి తరలించారు. అక్కడ చికిత్స పొందుతూ శుక్రవారం తెల్లవారుజామున ఆమె తుదిశ్వాస విడిచింది. ఉదయం ఆరు గంటల సమయంలో మృతదేహాన్ని ఇంటికి తీసుకొచ్చారు. విగతజీవిగా మారిన భార్యను చూసి వెంకటరమణ కన్నీటి పర్యంతమయ్యారు. ఆమె మృతదేహంపై పడి గుండెలిసేలా రోదించారు. బాధ తట్టుకోలేక రోదిస్తుండగా గుండెపోటు రావడంతో హఠాన్మరణం చెందారు. ఇలా.. భార్య మరణాన్ని తట్టుకోలే భర్త కూడా మరణించడంతో రావికమతం గ్రామంలో విషాద ఛాయలు అలుముకున్నాయి. దంపతులకు వారి బంధువులు అంత్యక్రియలు నిర్వహించారు.

Also Read: పునీత్ పార్దీవదేహం వద్ద వెక్కివెక్కి ఏడ్చిన బాలకృష్ణ..