ఛీ.. ఛీ.. అమ్మతనానికే మాయని మచ్చ.. సహజీవనానికి అడ్డుగా ఉందని కన్న కూతురినే కొరికి..
గుంటూరులో మూడేళ్ల చిన్నారి అనుమానాస్పద పరిస్థితుల్లో మృతి చెందడం కలకలం రేపింది. ఒంటిపై తీవ్ర గాయాలతో చిన్నారిని జీజీహెచ్‌కు తీసుకురాగా, వైద్యులు పరీక్షించి మృతి చెందినట్లు నిర్ధారించారు. గాయాలపై అనుమానం వ్యక్తం చేసిన వైద్యులు పోలీసులకు సమాచారం ఇవ్వడంతో కేసు నమోదైంది. చిన్నారి మృతికి సంబంధించి తల్లి నాగలక్ష్మీ, ఆమెతో సహజీవనం చేస్తున్న సుభాష్‌ను పోలీసులు అదుపులోకి తీసుకుని విచారిస్తున్నారు. ఘటనపై దర్యాప్తు కొనసాగుతోంది.
మూడేళ్ల చిన్నారికి తీవ్ర గాయాలయ్యాయి. వెంటనే చిన్నారిని తీసుకొని తల్లిదండ్రులు సుభాష్, నాగలక్ష్మీ గుంటూరు జిజిహెచ్‌కు తీసుకొచ్చారు. వంటిపై తీవ్రగాయాలున్నాయి. పాప ఆరోగ్య పరిస్థితిని పరీక్షించిన వైద్యులు ఆ చిన్నారి చనిపోయినట్లు నిర్దారించారు. ఒంటిపై గాయాలు ఎలా అయ్యాయంటూ వైద్యులు తల్లి నాగలక్ష్మీని ప్రశ్నించారు. ఇంట్లో మెట్ల మీద నుండి పడి గాయాలయినట్లు నాగలక్ష్మీ చెప్పింది. అయితే, ఒంటిపై గాయాలతో పాటు కొరికిన గాట్లున్నాయి. దీంతో వైద్యులకు అనుమానం వచ్చింది. ఆమెను గుచ్చి గుచ్చి ప్రశ్నించారు. అయితే ఆమె మాత్రం మెట్లపైనే నుండే పడిందని చెప్పింది. దీంతో పోస్టుమార్టమ్ చేస్తామని వైద్యులు చెప్పడంతో వద్దంటూ నాగలక్ష్మీ, సుభాష్ పట్టుబట్టారు. అనుమానం వచ్చిన వైద్యులు అవుట్ పోస్ట్ పోలీసులకు సమాచారం ఇచ్చారు. దీంతో మొదట కొత్తపేట పోలీసులు తర్వాత అరండల్ పేట పోలీసులు వచ్చి కేసు నమోదు చేసి చిన్నారి మృతదేహాన్ని మార్చురీకి తరలించారు.
ఏడేళ్ల క్రితం వివాహం.. ఇద్దరు కుమార్తెలు..
నల్ల చెరువుకి చెందిన బచ్చు సాయికి, దేవాపురానికి చెందిన నాగలక్ష్మీతో ఏడేళ్ల క్రితం వివాహం అయింది. వీరికి ఇద్దరు కుమార్తెలున్నారు. సాయికి వేరే మహిళతో వివాహేతర సంబంధం ఉండటంతో నాగలక్ష్మీ అతనితో ఘర్షణ పడింది. ఈ ఘర్షణ అనంతరం ఇద్దరూ విడిపోయారు. పెద్ద కుమార్తెను తండ్రి తీసుకెళ్లగా చిన్న కుమార్తె ఇషిక తల్లి నాగలక్ష్మీ వద్దే ఉంటుంది.
ఇది ఇలా ఉండగా నాగలక్ష్మీకి సుభాష్ అనే వ్యక్తితో పరిచయం ఏర్పడింది. పరిచయంతో ఇద్దరూ సహజీవనం చేస్తున్నారు. అయితే ఇషిక అడ్డుగా ఉండటంతో చిన్నారిని కొన్ని రోజులుగా ఇద్దరూ హింసిస్తున్నారు. నిన్న నేలకేసి కొట్టడంతోనే చిన్నారి చనిపోయింది. అయితే, మెట్లపై నుండి పడి తీవ్ర గాయాలయ్యాయని జిజిహెచ్‌కు తీసుకొచ్చారు. వైద్యులు అనుమానం వ్యక్తం చేయడం, ఆ తర్వాత పోలీసులు రంగంలోకి దిగి కేసు నమోదు చేయడంతో అసలు విషయం వెలుగుచూసింది. ప్రస్తుతం నాగలక్ష్మీ, సుభాష్ లను పోలీసులు అదుపులోకి తీసుకొని విచారిస్తున్నారు. త్వరలోనే అరెస్ట్ చూపించే అవకాశం ఉంది.