గేదె డెలివరీ సమయంలో ఈ జాగ్రత్తలు తప్పకుండా తీసుకోండి..
గేదెల డెలివరీ సమయంలో, పుట్టిన దూడలకు ఎలాంటి సంరక్షణ అందించాలో ఈ కథనం వివరిస్తుంది. డెలివరీకి ముందు సంకేతాలు, ప్రసవ ప్రక్రియ, బొడ్డు తాడు సంరక్షణ, తల్లి-దూడ బంధం పెంపొందించడం, ప్రసవానంతర తల్లికి ఆహారం, దూడ శుభ్రత వంటి ముఖ్యమైన అంశాల గురించి ఇప్పుడు తెలుసుకుందాం ..
గేదెల డెలివరీ సమయంలో, పుట్టిన దూడలకు అత్యంత ముఖ్యమైన సంరక్షణ అందించడం పశువుల యజమానులకు ఎంతో అవసరం. ఈ కథనంలో గేదెకు డెలివరీ నొప్పి ప్రారంభమైనప్పటి నుంచి దూడ పాలు తాగే వరకు పాటించాల్సిన కీలక జాగ్రత్తలను వివరిస్తుంది. సాధారణంగా గేదెలు 10 నెలలు, ఆవులు 9 నెలలు నిండిన తర్వాత ఈనుతాయి. డెలివరీకి 1-3 గంటల ముందు గేదె అస్థిరంగా, ఆందోళనగా ఉంటుంది. తరచుగా పడుకోవడం, లేవడం, చుట్టూ తిరగడం, ఎక్కువ సేపు మూత్ర విసర్జన చేయడం వంటి లక్షణాలు కనిపిస్తాయి. ఈ లక్షణాలు గేదె ఈనడానికి సిద్ధంగా ఉందని సూచిస్తాయి. ప్రసవ సమయంలో దూడ తల మరియు ముందు కాళ్ళు మొదట బయటకు రావాలి. గేదె సొంతంగా ఈనలేకపోతే, పశువైద్యుడిని సంప్రదించి సహాయం తీసుకోవాలి. కొన్నిసార్లు దూడ వెనుక కాళ్ళు మొదట రావచ్చు, అటువంటప్పుడు వెంటనే వైద్య సహాయం తప్పనిసరి.
ప్రసవ ప్రదేశం పొడిగా, శుభ్రంగా.. రాళ్ళు, రెప్పలు లేకుండా ఉండాలి. డ్రై గడ్డిని పరుచుకోవడం వలన శుభ్రతను కాపాడుకోవచ్చు. ఇన్ఫెక్షన్లను నివారించవచ్చు. దూడ బయటకు వచ్చిన వెంటనే, తల్లి గేదె దూడను నాకడానికి ప్రోత్సహించాలి. తల్లి నాకడం వలన దూడ శరీరం శుభ్రపడి, పొడిగా మారుతుంది. తల్లి-దూడ బంధం బలపడుతుంది. కొన్నిసార్లు గేదెలు ప్రసవానంతర ఒత్తిడి (స్ట్రెస్) కారణంగా దూడను పట్టించుకోకపోవచ్చు. అటువంటప్పుడు దూడను తల్లి ముందు ఉంచడం, దాని తల దగ్గర పెట్టడం ద్వారా తల్లి నాకేలా ప్రోత్సహించాలి. దూడ బొడ్డు తాడును 4-5 అంగుళాలు ఉంచి కత్తిరించి, శుభ్రమైన దారంతో కట్టాలి. ఆపై ఇన్ఫెక్షన్ రాకుండా అయోడిన్ లేదా పసుపును రాయాలి. బొడ్డు తాడును తల్లి కొరకకుండా జాగ్రత్త పడాలి, ఎందుకంటే అది ఇన్ఫెక్షన్లకు దారితీయవచ్చు. దూడ పుట్టిన వెంటనే దాని శరీరంపై ఉన్న జిగురును కడగకూడదు, ఇది సహజ యాంటీబయోటిక్గా పనిచేస్తుంది. దూడను చలి ప్రదేశంలో ఉంచకుండా, పొడిగా.. వెచ్చగా ఉండేలా చూసుకోవాలి. కుక్కలు, కాకులు వంటివి దూడ బొడ్డు తాడును లాగకుండా లేదా దూడకు ఇబ్బంది కలిగించకుండా జాగ్రత్త వహించాలి. డెలివరీ తర్వాత మాయ (ప్లసెంటా) సాధారణంగా 1 నుంచి 5 గంటలలోపు పడిపోతుంది. మాయ పడకపోతే, ఒక రోజు లేదా రెండు రోజులలోపు పశువైద్యుడిని సంప్రదించాలి. మాయ పడిన తర్వాత, ప్రసవించిన ప్రదేశాన్ని పూర్తిగా శుభ్రం చేసి, పొడిగా తుడవాలి. గేదెను, దూడను వేరొక శుభ్రమైన, పొడి ప్రదేశంలో ఉంచాలి.
ప్రసవానంతరం గేదెకు గోరువెచ్చని నీటిలో అర కిలో బెల్లం కలిపి 2-3 రోజులు ఇవ్వడం వలన నీరసం తగ్గి, త్వరగా కోలుకుంటుంది. బెల్లంలో ఉండే కాల్షియం దీనికి సహాయపడుతుంది. డెలివరీ తర్వాత గేదెను ఉదయం, సాయంత్రం గోరువెచ్చని నీటితో శుభ్రంగా కడగాలి. దానా విషయానికి వస్తే, మొదటి వారం తక్కువ పరిమాణంలో ఇచ్చి, క్రమంగా పెంచుకుంటూ నెల రోజుల తర్వాత సాధారణ పరిమాణంలో ఇవ్వాలి. ఇది పొదుగులో పాలగడ్డలు ఏర్పడకుండా నిరోధిస్తుంది. గేదె కట్టే ప్రదేశం ఎల్లప్పుడూ పొడిగా, బురద లేకుండా ఉండేలా చూసుకోవాలి.
మీరు ఏసీలు వాడతారా..? అయితే ఇంటి పరిసరాల్లో ఈ చెట్టు పెంచండి.. ఎందుకంటే..?