వాట్సాప్ యూజర్స్ కి గుడ్ న్యూస్.. ఇన్‌-యాప్‌ కొనుగోళ్లు, క్లౌడ్‌ హోస్టింగ్‌ సేవలు
వాట్సాప్ వినియోగదారులకు శుభవార్త... ఇకపై వాట్సాప్ మెసెంజింగ్‌ యాప్‌ ద్వారా త్వరలో ఇన్‌-యాప్‌ కొనుగోళ్లు, క్లౌడ్‌ హోస్టింగ్‌ సేవలను అందుబాటులోకి రానున్నాయి.
వాట్సాప్ వినియోగదారులకు శుభవార్త… ఇకపై వాట్సాప్ మెసెంజింగ్‌ యాప్‌ ద్వారా త్వరలో ఇన్‌-యాప్‌ కొనుగోళ్లు, క్లౌడ్‌ హోస్టింగ్‌ సేవలను అందుబాటులోకి రానున్నాయి. ఫేస్‌బుక్‌ షాప్స్‌ ద్వారా వాట్సాప్‌లో వ్యాపారులు తమ ఉత్పత్తులను మార్కెట్ చేసుకునేందుకు వాట్సాప్ రంగం సిద్ధం చేస్తోంది. ఫేస్‌బుక్‌ షాప్స్‌ అనే ఆన్‌లైన్‌స్టోర్‌ను మే నెలలో ఫేస్‌బుక్‌ తీసుకొచ్చిన సంగతి తెలిసిందే. కాగా, తన వాట్సాప్ మెసెంజింగ్‌ యాప్‌ త్వరలో ఇన్‌-యాప్‌ కొనుగోళ్లు, క్లౌడ్‌ హోస్టింగ్‌ సేవలను ప్రారంభించనుందని గురువారం మాతృ సంస్థ ఫేస్‌బుక్‌ తెలియజేసింది. దీంతో ఫేస్‌బుక్‌ ఆదాయాలు మరింతగా పెరిగే అవకాశం ఉందని మార్కెట్ వర్గాలు భావిస్తున్నాయి. 2014లో 19 బిలియన్‌ డాలర్లతో వాట్సాప్‌ను ఫేస్‌బుక్‌ కొనుగోలు చేసిన సంతి తెలిసిందే. కాగా, ఇన్‌స్టాగ్రామ్‌, వాట్సాప్‌ల ద్వారా విక్రయాలను పెంచుకోవాలని ఫేస్‌బుక్‌ గట్టిగా ప్రయత్నిస్తోంది. కేవలం ఉత్పత్తుల విక్రయ సేవలే కాకుండా.. తన వినియోగదారు సేవల మెసెంజింగ్‌ టూల్స్‌ను వినియోగించుకునే కంపెనీలకు ఆ మెసేజ్‌లను ఫేస్‌బుక్‌ సర్వర్లలో నిల్వ చేసే క్లౌడ్‌ హోస్టింగ్‌ సేవలనూ అందించడం ద్వారా క్లౌడ్‌ కంప్యూటింగ్‌ రంగంలోకీ అడుగుపెట్టనుంది. ఈ ఏడాదిలోనే షాపింగ్‌ టూల్‌ మొదలవుతుందని, మెసేజ్‌ హోస్టింగ్‌ మాత్రం 2021 నుంచి అందుబాటులోకి రానున్నట్లు వాట్సాప్ సీఓఓ మాత్‌ ఇడేమా చెబుతున్నారు..
