Gen Z ప్రేమలో వినిపించే ఈ డేటింగ్ పదాల అసలు అర్థాలివే!

ఒకప్పుడు ప్రేమ అంటే.. నచ్చిన వ్యక్తితో మాట్లాడటం.. కలవడం.. ఇద్దరికీ కనెక్షన్ కుదిరితే రిలేషన్‌షిప్‌లోకి వెళ్లడం. అంతే! కానీ ఇప్పుడు డేటింగ్ సీన్ మొత్తం మారిపోయింది. ముఖ్యంగా Gen Zలో.. మనం రిలేషన్‌షిప్‌లో ఉన్నామా? లేదా? అనే దానికే క్లారిటీ లేకుండా నెలలు గడిచిపోతున్నాయి. ఒకరు స్టోరీ చూస్తారు కానీ మెసేజ్ చేయరు.. ఇంకొకరు అప్పుడప్పుడు మిస్ యూ అంటారు కానీ కమిట్‌మెంట్ మాత్రం ఇవ్వరు. ఇంకొకరు రిలేషన్‌షిప్‌ను బయటకు చెప్పకుండా.. ఇన్‌స్టాగ్రామ్‌లో చిన్న చిన్న క్లూస్ ఇస్తుంటారు. వీటన్నింటికీ ఇప్పుడు ప్రత్యేకమైన పేర్లు ఉన్నాయి. మరి ఆ పేర్లు ఏంటి? అసలు ఈ డేటింగ్ ట్రెండ్స్ ఎలా ఉంటాయో ఒక్కసారి చూద్దాం. ముందుగా సిట్యువేషన్‌షిప్. పేరు వింటేనే కొంచెం కన్ఫ్యూజింగ్‌గా ఉంది కదా? ఇదే అసలు కాన్సెప్ట్ కూడా. ఇద్దరూ రోజూ చాట్ చేస్తారు.. కలుస్తారు.. ఒకరిపై ఒకరికి ఇష్టం ఉంటుంది. చూస్తే పక్కాగా రిలేషన్‌షిప్‌లానే అనిపిస్తుంది. కానీ మనం ఏంటి? అని అడిగితే మాత్రం.. అదేంటో.. ఇప్పుడే ఎందుకు లే అంటారు. అంటే రిలేషన్‌షిప్ ఉంది.. కానీ పేరు లేదు. దీనినే సిట్యువేషన్‌షిప్ అంటారు. ఇద్దరికీ ఓకే అయితే పెద్ద సమస్య కాదు. కానీ ఒకరికి సీరియస్‌గా వెళ్లాలనిపించి.. ఇంకొకరు కేవలం టైమ్ పాస్ మోడ్‌లో ఉంటే.. అక్కడే అసలు డ్రామా మొదలవుతుంది. ఇక బెంచింగ్. మీకు ఎవరైనా నచ్చారు. కానీ వారితో రిలేషన్‌షిప్‌లోకి వెళ్లేంత ఆసక్తి లేదు. అలాగని పూర్తిగా వదిలేయాలనిపించడం లేదు. కాబట్టి అప్పుడప్పుడు హాయ్.. ఏం చేస్తున్నావ్? అంటూ మెసేజ్ చేస్తుంటారు. అవసరమైనప్పుడు మళ్లీ దగ్గరవుతారు. అంటే.. ఒక ఆప్షన్‌గా పక్కన పెట్టుకోవడం. మీకు ఫస్ట్ ప్రియారిటీ ఇవ్వరు.. కానీ లిస్ట్ నుంచి కూడా తీసేయరు. దీనినే బెంచింగ్ అంటారు. బ్రెడ్‌క్రంబింగ్ కూడా దాదాపు ఇలాంటిదే. కానీ ఇక్కడ చిన్న చిన్న అటెన్షన్‌తో ఎదుటివారిని కనెక్ట్‌లో ఉంచుతారు. ఒకరోజు మిస్ అవుతున్నా అని మెసేజ్.. ఇంకోరోజు స్టోరీకి లైక్.. వారం తర్వాత ఎలా ఉన్నావ్? అని అడగడం. కానీ మనిద్దరం ఏంటి? అని అడిగితే మాత్రం సీన్ సైలెంట్. అంటే ఫుల్ రిలేషన్‌షిప్ కాదు.. ఫుల్ బ్రేకప్ కూడా కాదు. మధ్యలో చిన్న చిన్న ఆశలు పెడుతూ కనెక్షన్‌ను కొనసాగించడం. ఇదే బ్రెడ్‌క్రంబింగ్. ఇక ఘోస్టింగ్ గురించి చాలా మందికి ఇప్పటికే తెలిసే ఉంటుంది. నిన్నటి వరకు రోజూ చాట్. ఉదయం గుడ్ మార్నింగ్.. రాత్రి గుడ్ నైట్. ఒక్కసారిగా మరుసటి రోజు నుంచి.. సీన్ క్లోజ్! మెసేజ్ చూస్తారు కానీ రిప్లై లేదు. కాల్ చేస్తే లిఫ్ట్ చేయరు. ఏం జరిగిందో కూడా చెప్పరు. ఇలా ఎలాంటి వివరణ లేకుండా ఒక్కసారిగా కమ్యూనికేషన్ కట్ చేయడమే ఘోస్టింగ్. నిజానికి ప్రతి సంబంధానికి పెద్ద క్లైమాక్స్ అవసరం లేదు. కానీ వీలైతే ఒక చిన్న క్లియర్ మెసేజ్ అయినా ఇవ్వడం ఎదుటివారికి మంచిదే. ఘోస్టింగ్‌కు కాస్త స్లో వెర్షన్ స్లో ఫేడ్. ఇక్కడ ఒక్కసారిగా మాయం అవ్వరు. ముందు రోజూ మాట్లాడేవారు. తర్వాత రెండు రోజులకు ఒకసారి. ఆ తర్వాత రిప్లైలు గంటల తర్వాత. తర్వాత కాల్స్ తగ్గిపోతాయి. చివరికి అసలు మనం ఇంకా మాట్లాడుతున్నామా? అనిపిస్తుంది. ఇలా నెమ్మదిగా ఒకరి జీవితంలో నుంచి దూరమవ్వడమే స్లో ఫేడ్. ఇక రిలేషన్‌షిప్ మొదలైన వెంటనే ఓవర్ డోస్ ప్రేమ చూపిస్తే.. దాన్ని లవ్ బాంబింగ్ అంటారు. మొదటి వారంలోనే గంటల కొద్దీ కాల్స్.. రోజంతా మెసేజ్‌లు.. నువ్వే నా ప్రపంచం అనే డైలాగులు.. ఖరీదైన గిఫ్టులు.. ప్రతి నిమిషం అటెన్షన్. వినడానికి చాలా బాగానే ఉంటుంది. కానీ ఇక్కడ చిన్న ట్విస్ట్ ఉంది. ఇలా ఎక్కువ ప్రేమ చూపించడం మాత్రమే లవ్ బాంబింగ్ కాదు. ఎదుటివారిని చాలా త్వరగా ఎమోషనల్‌గా తనకు అటాచ్ చేసుకోవడానికి ఇలా చేస్తే.. అది మానిప్యులేషన్‌గా మారొచ్చు. ఇక ఒకప్పుడు మీతో బాగా మాట్లాడేవారు. ఇప్పుడు అసలు మెసేజ్ చేయరు. కానీ మీ ఇన్‌స్టాగ్రామ్ స్టోరీ మాత్రం ప్రతి రోజూ చూస్తారు. పోస్టులకు అప్పుడప్పుడు లైక్ కూడా కొడతారు. అంటే మాట్లాడరు.. కానీ కనిపించకుండా ఫాలో అవుతూనే ఉంటారు. దీనినే ఆర్బిటింగ్ అంటారు. రిలేషన్‌షిప్ నుంచి బయటకు వచ్చేశారు.. కానీ సోషల్ మీడియా నుంచి మాత్రం బయటకు రాలేదు అన్నమాట. మరి మీరు ఆ వ్యక్తిని మర్చిపోయారు అనుకోండి. చాలా నెలల తర్వాత ఒక్కసారిగా ఫోన్‌లో నోటిఫికేషన్.. హే.. ఎలా ఉన్నావ్?.. ఇదే జాంబీయింగ్. అంటే గతంలో మాయమైన వ్యక్తి మళ్లీ అకస్మాత్తుగా లైఫ్‌లోకి రావడం. మనం వాళ్లను మర్చిపోయి ముందుకు వెళ్లే టైమ్‌లోనే ఎందుకు వస్తారో మాత్రం ఇప్పటికీ పెద్ద మిస్టరీనే! ఇక పాకెటింగ్. మీరు రిలేషన్‌షిప్‌లో ఉన్నారు. కానీ మీ పార్ట్‌నర్ ఫ్రెండ్స్‌కు మీ గురించి చెప్పరు. ఫ్యామిలీకి పరిచయం చేయరు. సోషల్ మీడియాలో కూడా మీ ఉనికి కనిపించదు. అంటే రిలేషన్‌షిప్‌ను ఒకరకంగా జేబులో దాచుకున్నట్టుగా ఉంచడం. అందుకే దీనికి పాకెటింగ్ అనే పేరు. అయితే ఇక్కడ ఒక విషయం గుర్తుంచుకోవాలి. ప్రతి ప్రైవేట్ రిలేషన్‌షిప్ పాకెటింగ్ కాదు. కొంతమంది తమ పర్సనల్ లైఫ్‌ను సోషల్ మీడియాలో అసలు షేర్ చేయరు. కాబట్టి వాళ్ల ఉద్దేశం ఏంటన్నదే ముఖ్యం. ఇక సోషల్ మీడియాలో ప్రేమను ప్రకటించడానికి కూడా ఇప్పుడు రెండు స్టైల్స్ ఉన్నాయి. ఒకటి సాఫ్ట్ లాంచ్. అంటే పార్ట్‌నర్ ఉన్నారని డైరెక్ట్‌గా చెప్పరు. కానీ ఇన్‌స్టాగ్రామ్ స్టోరీలో రెండు కాఫీ కప్పులు.. ఒకరి చేతి ఫొటో.. ఎవరో ఒకరి షోల్డర్.. ఇలా చిన్న చిన్న క్లూస్ ఇస్తారు. ఏదో ఉంది.. కానీ మేము ఇంకా చెప్పం అనే ఫీల్ అన్నమాట. ఇక నేరుగా పార్ట్‌నర్‌తో ఫొటో పెట్టి.. మై పర్సన్ అని క్యాప్షన్ పెట్టి.. అందరికీ అధికారికంగా చెప్పేస్తే అది హార్డ్ లాంచ్. అంటే సాఫ్ట్ లాంచ్‌లో క్లూ ఇస్తారు.. హార్డ్ లాంచ్‌లో పూర్తి అనౌన్స్‌మెంట్ ఇస్తారు. ఇక కఫింగ్ సీజన్ అనే పదం కూడా సోషల్ మీడియాలో బాగా వినిపిస్తుంది. ముఖ్యంగా చలికాలంలో సింగిల్‌గా ఉండటం కంటే ఎవరో ఒకరితో రిలేషన్‌షిప్‌లో ఉండాలని ఎక్కువగా అనిపిస్తుందనే పాప్ కల్చర్ భావనకు ఈ పేరు. అయితే ఇది ఏదైనా శాస్త్రీయంగా నిరూపించబడిన రూల్ కాదు. డేటింగ్ కల్చర్‌లో పాపులర్ అయిన ఒక పదం మాత్రమే. ఇక డేటింగ్‌లో మరో రెండు పదాలు చాలా ఇంపార్టెంట్.. రెడ్ ఫ్లాగ్స్, గ్రీన్ ఫ్లాగ్స్. మీ పార్ట్‌నర్ మీ ఫోన్ చెక్ చేయాలి.. పాస్‌వర్డ్ అడగాలి.. ఎవరితో మాట్లాడాలో చెప్పాలి.. ఫ్రెండ్స్ నుంచి దూరం చేయాలి.. ప్రతి విషయాన్ని కంట్రోల్ చేయాలి.. మిమ్మల్ని పదేపదే అవమానించాలి.. ఇవన్నీ రెడ్ ఫ్లాగ్స్ కావచ్చు. అంటే ఇక్కడ కాస్త జాగ్రత్త అనే సిగ్నల్స్. అదే మీ మాట వినడం.. మీ బౌండరీస్‌ను గౌరవించడం.. అవసరమైనప్పుడు స్పేస్ ఇవ్వడం.. తప్పు అయితే ఒప్పుకోవడం.. మీ ఫ్రెండ్స్, కెరీర్, పర్సనల్ లైఫ్‌ను గౌరవించడం.. ఇవన్నీ గ్రీన్ ఫ్లాగ్స్. అంటే ఈ రిలేషన్‌షిప్ హెల్తీగా ఉంది అనే మంచి సంకేతాలు. అయితే సోషల్ మీడియాలో ట్రెండ్ అయ్యే ప్రతి చిన్న విషయాన్నీ రెడ్ ఫ్లాగ్ అనుకోవాల్సిన అవసరం లేదు. ఒకసారి ఏదైనా జరిగిందా? లేక అదే బిహేవియర్ పదేపదే జరుగుతుందా? అది మీపై ఎలాంటి ప్రభావం చూపుతోంది? అనేదే అసలు ముఖ్యం. ఇక డేటింగ్ యాప్స్ వల్ల ఈ మొత్తం డేటింగ్ గేమ్‌కి మరో డిజిటల్ అడ్రస్ వచ్చింది. ఫొటో చూసాం.. బయో చదివాం.. కామన్ ఇంట్రెస్ట్ కనిపించింది.. నచ్చితే మ్యాచ్.. ఆ తర్వాత చాట్. కొంతమంది నిజమైన రిలేషన్‌షిప్‌లోకి వెళ్తారు. కొంతమంది కొంతకాలానికే కనెక్షన్ కట్ చేసుకుంటారు. ఇంకొందరు సిట్యువేషన్‌షిప్‌లోకి వెళ్తారు. అయితే ఆన్‌లైన్‌లో కనిపించే ప్రొఫైల్‌ను వెంటనే నమ్మేయకండి. వ్యక్తిగత సమాచారం, డబ్బు, ప్రైవేట్ ఫొటోలు షేర్ చేసే విషయంలో జాగ్రత్తగా ఉండాలి. మొదటిసారి కలుస్తున్నప్పుడు కూడా సేఫ్‌గా, జనాలు ఉండే ప్రదేశాన్నే ఎంచుకోవడం మంచిది. మొత్తానికి.. Gen Z డేటింగ్ ప్రపంచంలో పదాలు కొత్తగా ఉన్నాయి. ప్రేమను వ్యక్తపరిచే విధానాలు కొత్తగా ఉన్నాయి. సోషల్ మీడియా వల్ల సంబంధాలు కనిపించే విధానం కూడా మారిపోయింది. కానీ ఒక మంచి రిలేషన్‌షిప్‌కు కావాల్సిన బేసిక్స్ మాత్రం ఎప్పటికీ మారవు. ఒకరిపై ఒకరికి గౌరవం ఉండాలి. నమ్మకం ఉండాలి. ఏం కావాలో క్లియర్‌గా మాట్లాడుకోవాలి. ఒకరి బౌండరీస్‌ను మరొకరు గౌరవించాలి. ముఖ్యంగా.. సోషల్ మీడియాలో మీ రిలేషన్‌షిప్ ఎంత పర్ఫెక్ట్‌గా కనిపిస్తుందనేది కాదు.. సోషల్ మీడియా ఆఫ్ చేసిన తర్వాత మీరు ఒకరితో ఒకరు ఎలా ఉంటున్నారనేదే అసలు విషయం. పేర్లు మారొచ్చు.. ట్రెండ్స్ మారొచ్చు.. డేటింగ్ స్టైల్ మారొచ్చు.. కానీ మంచి ప్రేమకు కావాల్సిన విలువలు మాత్రం ఎప్పటికీ పాతబడవు.

మరిన్ని వీడియోల కోసం ఇక్కడ క్లిక్ చేయండి

Also Watch:

టీమిండియాను కలవరపెడుతున్న వరుస గాయాలు.. రంగంలోకి బీసీసీఐ పెద్దలు!

వయసుతో మీకేం పని? వైభవ్ సూర్యవంశీపై బ్రెట్ లీ ప్రశంసలు

గొర్రెల మంద వద్ద వలలో చిక్కుకున్న దానిని చూసి.. కాపరులు పరుగో పరుగు

సామాన్యుడికి మరో షాక్.. సెప్టెంబర్‌లో పెరగనున్న ధరలు!

అందమైన అమ్మాయి డీపీ చూసి టెంప్ట్ అయ్యాడు.. రూ.20 లక్షలు గోవింద!