తూర్పుగోదావరిలో తూటాల కలకలం

ఆంధ్రప్రదేశ్‌లోని తూర్పుగోదావరి జిల్లాలో తుపాకీ బుల్లెట్లు బయటపడటం స్థానికంగా తీవ్ర సంచలనం సృష్టించింది. పోలీసులు నిర్వహించిన వాహనాల తనిఖీల్లో భారీగా తూటాలు పట్టుబడటంతో అధికారులు అప్రమత్తమయ్యారు. జిల్లాలోని పంగిడి ప్రాంతం వద్ద పోలీసులు సాధారణ వెహికిల్ చెకింగ్ నిర్వహిస్తుండగా, అనుమానాస్పదంగా కనిపించిన ఒక వ్యక్తిని ఆపి తనిఖీ చేశారు. ఈ క్రమంలో అతని వద్ద నిషేధిత ఆయుధాలకు సంబంధించిన తూటాలు లభ్యమయ్యాయి. నిందితుడిని ఉత్తరప్రదేశ్‌కు చెందిన అహ్మద్ సమీర్ హుస్సేన్‌గా పోలీసులు గుర్తించారు. ఇతను గత ఏడేళ్లుగా జిల్లాలోని దేచెర్లలో నివాసముంటున్నట్లు విచారణలో తేలింది. నిందితుడి నుంచి తొమ్మిది 9mm బుల్లెట్లు, ఆరు .315 బుల్లెట్లు పోలీసులు స్వాధీనం చేసుకున్నారు.