వామ్మో పెద్దపులి.. వణుకుతున్న మన్యం
పెద్ద కొండ గ్రామాన్ని వణికిస్తున్న పెద్దపులి సంచారం గిరిజనులలో తీవ్ర భయాందోళనలు సృష్టిస్తోంది. పులిని తరిమేందుకు గ్రామస్తులు టపాసులు, శబ్దాలు చేస్తున్నారు. అటవీ శాఖ అధికారులు గ్రామానికి చేరుకుని, భయపడవద్దని భరోసా ఇచ్చారు. పాపికొండల అభయారణ్యం నుండి వచ్చిన పులిని GPS ట్రాకింగ్ ద్వారా నిరంతరం పర్యవేక్షిస్తున్నారు. ప్రస్తుతానికి పులి అటవీ ప్రాంతంలోనే ఉన్నా, ప్రజలు అప్రమత్తంగా ఉండాలని అధికారులు కోరారు.
పోలవరం జిల్లా రంపచోడవరం మండలం, మర్రివాడ పంచాయతీ పరిధిలోని పెద్ద కొండ గ్రామంలో పెద్దపులి సంచారం స్థానిక గిరిజనులను వణికిస్తోంది. గత కొన్ని రోజులుగా అటవీ ప్రాంతం నుంచి గ్రామాల వైపు పులి వస్తుండటంతో ప్రజలు ప్రాణభయంతో పరుగులు తీస్తున్నారు. గ్రామ సమీపంలో పులి కనిపించడంతో అప్రమత్తమైన గిరిజనులు, దానిని అడవిలోకి తరిమేందుకు తమదైనశైలిలో ప్రయత్నాలు చేస్తున్నారు. పెద్ద ఎత్తున టపాసులు పేలుస్తూ, స్టీలు కంచాలను కొడుతూ భయంకరమైన శబ్దాలు చేస్తూ పులిని భయపెట్టే ప్రయత్నం చేస్తున్నారు. అయినప్పటికీ పులి ఎప్పుడు ఎటువైపు నుంచి దాడి చేస్తుందోనన్న భయంతో గ్రామస్తులు కంటిమీద కునుకు లేకుండా గడుపుతున్నారు. సమాచారం అందుకున్న అటవీ శాఖ అధికారులు తక్షణం పెద్ద కొండ గ్రామానికి చేరుకున్నారు. గ్రామస్తులు ఎవరూ ఒంటరిగా బయటకు రావద్దని, భయాందోళనలకు గురికావద్దని అధికారులు మైకుల ద్వారా గిరిజనులకు అవగాహన కల్పిస్తూ భరోసా ఇచ్చారు. కొద్దిరోజుల క్రితమే పాపికొండల అభయారణ్యంలో అధికారులు ఒక పెద్దపులిని వదిలారు. దానికి అమర్చిన GPS ట్రాకింగ్ చిప్ ఆధారంగా పులి ప్రస్తుత కదలికలను అధికారులు నిరంతరం పర్యవేక్షిస్తున్నారు. ప్రస్తుతానికి పులి అటవీ ప్రాంతంలోనే ఉన్నట్లు అధికారులు గుర్తించారు. ఏదేమైనా, అటవీ సమీప ప్రాంత ప్రజలు అప్రమత్తంగా ఉండాలని అధికారులు కోరుతున్నారు.
మరిన్ని వీడియోల కోసం ఇక్కడ క్లిక్ చేయండి
Also Watch:
అర్ధరాత్రి లాడ్జిలో మంటలు.. 33 మంది..
గుర్రంపై బ్లింకిట్ డెలివరీ.. ఇదెక్కడి మాస్ రా మావా..
EPFO: వాడని పీఎఫ్ ఖాతాల్లోని డబ్బులు వాపస్