హోమ్ కుక్ కావాలా? ఆన్‌లైన్‌లో కొత్త స్కామ్ కలకలం.. అడ్వాన్స్ ఇస్తే అంతే సంగతులు!
సాంకేతికత పెరిగిన కొద్దీ సైబర్ నేరగాళ్లు సరికొత్త మార్గాల్లో మోసాలకు పాల్పడుతున్నారు. గతంలో డిజిటల్ అరెస్ట్, పార్సెల్ స్కామ్స్ చూశాం. కానీ, ఇప్పుడు రోజువారీ అవసరాలను ఆసరాగా చేసుకుని హోమ్ కుక్ పేరుతో కొత్త తరహా ఆన్‌లైన్ మోసానికి తెరతీశారు. ఆన్‌లైన్‌లో వంట మనుషులను వెతికే వారిని లక్ష్యంగా చేసుకుని ఈ స్కామ్ చేస్తున్నారు.
ఇంటి పని, వంట మనుషుల కోసం ఆన్‌లైన్‌లో వెతుకుతున్నారా? అయితే, ఈ కొత్త సైబర్ స్కామ్ గురించి తప్పక తెలుసుకోవాలి. వంట మనుషులను ఏర్పాటు చేస్తామంటూ ఆన్‌లైన్‌లో తప్పుడు ప్రకటనలు ఇచ్చి, అమాయకులను ముంచే కొత్త రకం మోసం వెలుగులోకి వచ్చింది. రైలు ప్రయాణంలో వీడియో కాల్ ద్వారా స్కామర్‌ను గుర్తుపట్టి అరెస్టు చేయించిన ఘటన ఆధారంగా ఈ వ్యవహారం వైరల్‌గా మారింది. ఆన్‌లైన్ సర్వీసులను ఉపయోగించేటప్పుడు అపరిచిత వ్యక్తులకు డబ్బులు పంపవద్దని నిపుణులు హెచ్చరిస్తున్నారు. అసలు స్కామ్ ఎలా జరుగుతుంది?
సోషల్ మీడియా, వెబ్‌సైట్లు, క్లాసిఫైడ్ ప్లాట్‌ఫామ్‌లలో తక్కువ ధరకే నమ్మకమైన హోమ్ కుక్స్ లభిస్తారు అని ప్రకటనలు ఇస్తారు. వీటిని చూసి సంప్రదించిన బాధితులతో సైబర్ క్రిమినల్స్ చాలా ఆప్యాయంగా మాట్లాడుతారు. నెలకు ఇంత జీతం అని కుదుర్చుకున్నాక, బుకింగ్ ఛార్జ్ లేదా మొదటి నెల అడ్వాన్స్ చెల్లించాలని కోరతారు. అందుకోసం ఒక క్యూఆర్‌ కోడ్ లేదా పేమెంట్ లింక్ పంపుతారు. ఆ లింక్ క్లిక్ చేయగానే లేదా క్యూఆర్‌ కోడ్ స్కాన్ చేయగానే బాధితుల బ్యాంక్ ఖాతాల నుంచి నగదు మాయమవుతుంది.
ట్రైన్ వీడియో కాల్‌తో బయటపడ్డ ముఠా:
తాజాగా ఒక బాధితుడు ఈ స్కామ్‌ను ఎంతో చాకచక్యంగా బయటపెట్టాడు. తనకు జరిగిన మోసంపై అనుమానం వచ్చి, స్కామర్‌ను రైలు ప్రయాణంలో ఉన్నప్పుడు వీడియో కాల్ ద్వారా మాట్లాడాడు. ఆ వీడియో కాల్ ఆధారంగా నేరగాడు ఎక్కడ ఉన్నాడో గుర్తించి, పోలీసులకు సమాచారం అందించి అరెస్ట్ చేయించాడు. ఈ వీడియో సోషల్ మీడియాలో విపరీతంగా వైరల్ కావడంతో ఈ ఆన్‌లైన్ స్కామ్ వ్యవహారం వెలుగులోకి వచ్చింది.
జాగ్రత్తలు, నివారణ మార్గాలు:
ఆన్‌లైన్‌లో చూసిన వ్యక్తులకు, సర్వీస్ ఏజెన్సీలకు ముందుగానే డబ్బులు పంపకండి. వంట మనుషులను లేదా పనివారిని నియమించుకునే ముందు వారి ఆధార్ కార్డ్, చిరునామా ప్రత్యక్షంగా సరిచూసుకోవడం శ్రేయస్కరం. డబ్బులు అందుకోవడానికి క్యూఆర్‌ కోడ్ స్కాన్ చేయాల్సిన అవసరం ఉండదని గుర్తుంచుకోండి. ఒకవేళ సైబర్ మోసానికి గురైతే వెంటనే 1930 సైబర్ క్రైమ్ హెల్ప్‌లైన్ నంబర్‌కు ఫిర్యాదు చేయండి. మనం నిత్యం ఉపయోగించే సేవల పేరుతోనే మోసగాళ్లు వల వేస్తున్నారు. కాబట్టి, ఆన్‌లైన్ లావాదేవీల విషయంలో అత్యంత జాగ్రత్తగా ఉండటం అవసరం.
మరిన్ని ట్రెండింగ్ న్యూస్ కోసం క్లిక్ చేయండి..