Watch Video: గేటు ఎక్కి.. మెట్లెక్కి ఇల్లంత తిరిగిన పాము.. చివరకు ఏం చేసిందో చూడండి
సాధారణంగా పాములు నేల మీద పాకడం చూస్తుంటాం.. కానీ ఇక్కడ మాత్రం ఒక భారీ పాము ఏకంగా ఇంటి గేటు ఎక్కి, మెట్లపై నుంచి బిల్డింగ్ పైకి వెళ్లి హల్చల్ చేసింది. అంతటితో ఆగకుండా మళ్లీ కిందకు వచ్చి అక్కడే పార్క్ చేసిన ఉన్న కారులో దూరి అక్కడే తిష్టవేసింది. సంగారెడ్డి జిల్లాలో వెలుగు చూసిన ఈ ఘటన స్థానికంగా తీవ్ర కలకలం రేపింది.
బయట మండుతున్న ఎండలను తట్టుకోలేక పాములు ఇంట్లోకి వస్తున్న ఘటనలు ఈ మధ్య చాలానే చూస్తున్నాం. తాజాగా అలాంటి ఘటనే సంగారెడ్డి జిల్లాలో వెలుగు చూసింది. గుమ్మడిదల మున్సిపల్ పరిధిలోని అన్నారం గ్రామంలో ఓ భారీ జెర్రిపోతు పాము ఒక ఇంట్లోకి చొరబడి నానా రచ్చ చేసింది. ఇంటి ముందున్న ఇనుప గేటును సునాయాసంగా ఎక్కేసిన ఆ పాము, మెల్లగా మెట్లపై నుంచి బిల్డింగ్ పైకి వెళ్ళింది. కాసేపు అక్కడ తిరిగిన అనంతరం తిరిగి కిందకు దిగి, ఇంటి ఆవరణలో పార్క్ చేసి ఉన్న కారు ఇంజిన్ భాగంలోకి దూరి లోపల నక్కింది.
సీసీటీవీకి చిక్కిన పాము దృశ్యాలు
పాము గేటు ఎక్కడం, బిల్డింగ్ పైకి వెళ్లడం వంటి దృశ్యాలన్నీ ఇంట్లో ఏర్పాటు చేసిన సీసీ కెమెరాల్లో రికార్డ్ అయ్యాయి. కారులో పాము దూరిన విషయాన్ని గమనించిన ఇంటి యజమాని ఒక్కసారిగా భయాందోళనకు గురయ్యారు. వెంటనే స్థానిక స్నేక్ క్యాచర్కు సమాచారం అందించారు.
చాకచక్యంగా పట్టుకున్న స్నేక్ క్యాచర్
సమాచారం అందుకున్న స్నేక్ క్యాచర్ ఘటనా స్థలానికి చేరుకుని, కారు ఇంజిన్ భాగంలో దాక్కున్న పామును ఎంతో నిశితంగా పరిశీలించి, చాకచక్యంగా బయటకు తీశారు. తర్వాత పామును సురక్షితంగా సమీపంలోని అటవీ ప్రాంతంలో విడిచిపెట్టడంతో ఇంటి యజమాని, స్థానికులు ఊపిరి పీల్చుకున్నారు. ప్రస్తుతం ఈ పాముకు సంబంధించిన సీసీటీవీ విజువల్స్ సోషల్ మీడియాలో వైరల్ అవుతున్నాయి.
వీడియో చూడండి..
మరిన్ని తెలంగాణ వార్తల కోసం ఇక్కడ క్లిక్ చేయండి.