Telangana: మద్యం దుకాణాల కేటాయింపులో రిజర్వేషన్లపై తెలంగాణ సర్కార్ మార్గదర్శకాలు
లిక్కర్ షాపుల కేటాయింపులో రిజర్వేషన్లపై తెలంగాణ సర్కార్ మార్గదర్శకాలు విడుదల చేసింది. అందుకు సంబంధించిన పూర్తి వివరాలు ఈ ఆర్టికల్‌లో చదవండి.
లిక్కర్ షాపుల కేటాయింపులో రిజర్వేషన్లపై తెలంగాణ సర్కార్ మార్గదర్శకాలు విడుదల చేసింది. ఎస్సీ, ఎస్టీ, గౌడ్లకు ప్రభుత్వం నిర్ణయించిన రిజర్వేషన్ల ప్రకారం షాపులు కేటాయించేందుకు సంబంధించిన మార్గదర్శకాలను ప్రకటించింది. కొత్త జిల్లాలను యూనిట్‌గా తీసుకొని కేటాయింపులు చేసేందుకు కలెక్టర్లకు పవర్స్ ఇచ్చింది. ఆయా జిల్లాల్లో ఉన్న షాపులు ఆధారంగా ఈ కేటాయింపులు పూర్తి చేస్తారు. ఈ కేటాయింపుల కోసం కలెక్టర్‌ నేతృత్వంలో నలుగురు సభ్యులతో కమిటీ ఏర్పాటు చేశారు. ఈ కమిటీలో సభ్యులుగా.. జిల్లా ఎక్సైజ్‌ అధికారి, గిరిజన అభివృద్ధి అధికారి, బీసీ సంక్షేమ అధికారి, ఎస్సీ అభివృద్ధి అధికారి ఉంటారు. డ్రా ద్వారా లిక్కర్ షాపుల కేటాయింపు జరగనుంది. ఈ కేటాయింపు ప్రక్రియ మొత్తాన్ని వీడియో షూట్ చేయటం తప్పనిసరి చేస్తూ గవర్నమెంట్ ఆదేశాలు జారీ చేసింది.
నూతన పాలసీ ప్రకారం లిక్కర్ షాపుల కేటాయింపుల్లో రిజర్వేషన్లను తెలంగాణ సర్కార్ ఇప్పటికే అనౌన్స్ చేసింది. గౌడ్లకు 15, ఎస్సీలకు 10, ఎస్టీలకు 5 శాతం షాపులు కేటాయిస్తున్నట్లు వెల్లడించింది. జిల్లాల్లో జనాభా ప్రాతిపదికన లాటరీ ద్వారా షాపుల కేటాయింపులు చేయనున్నట్లు పేర్కొంది. దరఖాస్తు రుసుము గతంలో మాదిరిగానే రూ.2 లక్షలుగా సర్కార్ నిర్ణయించింది. షాపుల కేటాయింపుల్లో పాత స్లాబులే కొనసాగిస్తున్నట్లు ప్రభుత్వం ఇప్పటికే వివరించింది. లైసెన్స్‌లు పొందిన వారు సంవత్సరానికి ఒకసారి నిర్దేశించిన లైసెన్స్‌ ఫీజు చెల్లించాల్సి ఉంటుంది.
5 వేల జనాభా వరకు 50 లక్షలు, 5 వేల నుంచి 50 వేల వరకు జనాభా ఉంటే రూ.55 లక్షలు, 50 వేల నుంచి లక్ష వరకు జనాభా ఉంటే 60 లక్షలు లైసెన్స్‌ ఫీజు చెల్లించాల్సి ఉంటుంది. లక్ష నుంచి 5 లక్షల వరకు జనాభా ఉంటే 65 లక్షలు, 5 లక్షల నుంచి 20 లక్షలు వరకు జనాభా ఉంటే రూ.85 లక్షలు, 20 లక్షలకు మించి జనాభా ఉన్న ప్రాంతాల్లో లైసెన్స్‌ ఫీజు కోటి పది లక్షలుగా ఫిక్స్ చేశారు.
Also Read: CM KCR: తెలంగాణ సీఎం కేసీఆర్ కీలక ప్రెస్‌మీట్ లైవ్ చూడండి