Telangana: హోంగార్డు ఇంట చదువుల పంట పండింది.. ఏకంగా ముగ్గురు డాక్టర్లు..!

కరీంనగర్ జిల్లా జమ్మికుంటకు చెందిన హోంగార్డు ఎస్.కె. గౌస్ తన పరిమిత ఆదాయంతోనే ముగ్గురు పిల్లలను ఉన్నత చదువులు చదివిస్తున్నారు. ఆర్థిక ఇబ్బందులు ఎదురైనా వారి వైద్య విద్యకు అడ్డంకి కాకుండా ఎన్నో త్యాగాలు చేశారు. పూర్తి వివరాలు కథనంలో ..

Telangana: హోంగార్డు ఇంట చదువుల పంట పండింది.. ఏకంగా ముగ్గురు డాక్టర్లు..!
3 Doctors In One Family

Edited By:

Updated on: Nov 18, 2026 | 12:16 PM

ఓ సాధారణ హోంగార్డు.. వచ్చే పరిమిత జీతంతో కుటుంబాన్ని పోషించడమే ఆయన ముందున్న పెద్ద బాధ్యత. ఆర్థిక ఇబ్బందులు ఎన్ని ఎదురైనా పిల్లల చదువు విషయంలో మాత్రం వెనక్కి తగ్గలేదు. తన జీవితంలో ఎన్ని కష్టాలు వచ్చినా సరే.. పిల్లలు ఉన్నత స్థాయికి ఎదగాలన్నదే ఆయన కల. ఆ కలను నిజం చేసేందుకు తన సుఖాలను పక్కనపెట్టి, వారి చదువుల కోసం అహర్నిశలు శ్రమించారు. ఇప్పుడా తండ్రి కష్టానికి తగిన ఫలితం దక్కుతోంది. ఒకరు ఇప్పటికే డాక్టర్‌గా మారగా.. మరో కుమార్తె వైద్య విద్య అభ్యసిస్తోంది. తాజాగా కుమారుడికి కూడా ఎంబీబీఎస్ సీటు లభించింది. ఇలా ఒకే కుటుంబం నుంచి ముగ్గురు వైద్యులుగా ఎదుగుతుండటం అందరినీ ఆకట్టుకుంటోంది.

ఒకే కుటుంబం నుంచి ముగ్గురు వైద్యులు!

కరీంనగర్ జిల్లా జమ్మికుంట మున్సిపల్ పరిధిలోని ఆబాది జమ్మికుంటకు చెందిన ఎస్.కె. గౌస్ పోలీస్ శాఖలో హోంగార్డుగా విధులు నిర్వహిస్తున్నారు. ఆయనకు ఇద్దరు కుమార్తెలు, ఒక కుమారుడు. సాధారణ ఉద్యోగం.. పరిమిత ఆదాయం ఉన్నప్పటికీ ముగ్గురు పిల్లలకు ఉన్నత విద్య అందించాలనే పట్టుదలతో ముందుకు సాగారు.

ఆయన పెద్ద కుమార్తె ఎస్.కె. హజారా కాకతీయ మెడికల్ కాలేజీలో ఎంబీబీఎస్ పూర్తి చేసి డాక్టర్‌గా స్థిరపడ్డారు. రెండో కుమార్తె ఖమ్మం ప్రభుత్వ వైద్య కళాశాలలో మూడో సంవత్సరం ఎంబీబీఎస్ చదువుతున్నారు. తాజాగా కుమారుడు నవాజ్ అలీకి నిజామాబాద్ ప్రభుత్వ వైద్య కళాశాలలో ఎంబీబీఎస్ సీటు లభించింది. దీంతో ఒకే ఇంటి నుంచి ముగ్గురు వైద్యులుగా ఎదుగుతున్న అరుదైన ఘనత ఈ కుటుంబం సొంతమైంది.

పిల్లల భవిష్యత్తు కోసం ఎన్నో త్యాగాలు!

హోంగార్డు ఉద్యోగం ద్వారా వచ్చే పరిమిత జీతంతో కుటుంబ అవసరాలు తీర్చుకుంటూనే పిల్లల చదువులకు గౌస్ పెద్దపీట వేశారు. వారి విద్య కోసం తన వ్యక్తిగత అవసరాలను పక్కనపెట్టి ఎన్నో త్యాగాలు చేశారు. ఆర్థిక ఇబ్బందులు ఎదురైనా పిల్లల చదువుకు ఆటంకం కలగకుండా చూసుకున్నారు.

మరోవైపు తండ్రి పడుతున్న కష్టాన్ని అర్థం చేసుకున్న పిల్లలు కూడా చదువుపై ప్రత్యేక దృష్టి పెట్టారు. తమ ప్రతిభ, పట్టుదలతో వైద్య విద్యలో ఒక్కొక్క మెట్టు ఎక్కుతూ తండ్రి కలను నిజం చేస్తున్నారు. ఒకవైపు పోలీస్ శాఖలో విధులు.. మరోవైపు కుటుంబ బాధ్యతలు.. ఇంకోవైపు పిల్లల చదువుల ఖర్చులు.. ఇలా ఎన్నో సవాళ్లను ఎదుర్కొన్న గౌస్‌కు ఇప్పుడు పిల్లల విజయాలే అతిపెద్ద ఆనందంగా మారాయి.

సంపద లేకపోయినా.. సంకల్పం ఉంటే సాధ్యమే!

వైద్య విద్య అంటేనే భారీ ఖర్చుతో కూడుకున్నదనే అభిప్రాయం చాలామందిలో ఉంటుంది. అయితే ప్రతిభ, పట్టుదల ఉంటే ప్రభుత్వ వైద్య కళాశాలల్లోనూ అవకాశాలు అందిపుచ్చుకోవచ్చని ఈ కుటుంబం నిరూపిస్తోంది. ముఖ్యంగా ఆర్థిక పరిస్థితులు అనుకూలించక ఉన్నత చదువుల విషయంలో వెనుకడుగు వేస్తున్న పేద, మధ్యతరగతి కుటుంబాలకు గౌస్ ప్రయాణం ఒక స్ఫూర్తిదాయక ఉదాహరణ. తన జీవితంలో ఎన్నో కష్టాలను ఎదుర్కొంటూ పిల్లల భవిష్యత్తు కోసం శ్రమించిన ఓ సామాన్య హోంగార్డు.. నేడు ముగ్గురు పిల్లలను వైద్య విద్య దిశగా నడిపించారు. తండ్రి కష్టం, పిల్లల పట్టుదల కలిస్తే ఎలాంటి లక్ష్యాన్నైనా చేరుకోవచ్చని ఈ కుటుంబం చాటిచెబుతోంది.

హోదా చిన్నదైనా.. కలలు పెద్దవిగా ఉండొచ్చని, ఆర్థిక స్థితి ఎలా ఉన్నా పిల్లల భవిష్యత్తు కోసం చేసే ప్రయత్నం ఎప్పటికీ వృథా కాదని గౌస్ కుటుంబ విజయగాథ నిరూపిస్తోంది.

Loading...
Unable to load recommendations.
Follow Us