Khairatabad Ganesh Nimajjanam Live: గంగమ్మ ఒడికి ఖైరతాబాద్ మహా గణేశుడు

హెస్సెన్ సాగర్ వైపు తరలివస్తున్న గణేష్ విగ్రహాలు

ఎన్టీఆర్ మార్గ్‌లో భారీగా నిలిచిన గణేష్ విగ్రహాలు

గణేష్ విగ్రహాలు, భక్తులతో కిక్కిరిసిన ఎన్టీఆర్ మార్గ్

హైదరాబాద్‌లో కన్నుల పండుగగా గణేష్ నిమజ్జనం

ముగిసిన ఖైరతాబాద్ మహా గణేష్ నిమజ్జనం

గంగమ్మ ఒడికి చేరిన ఖైరతాబాద్ మహా గణేషుడు

గంగమ్మ ఒడికి ఖైరతాబాద్‌ బడా గణేష్

హుస్సెన్‌ సాగర్‌లో ఖైరతాబాద్ మహా గణేష్ నిమజ్జనం

గణనాథుడి దర్శనానికి పోటెత్తిన భక్తజనం

భక్తులతో కిక్కిరిసిన హుస్సెన్ సాగర్ పరిసర ప్రాంతాలు

ఎన్టీఆర్‌ మార్గ్‌లోని క్రెయిన్ నెం.5వద్ద ఖైరతాబాద్ మహా గణేష్ నిమజ్జనం

ట్యాంక్‌బండ్‌ క్రేన్ నెంబర్ 4 వద్ద ఖైరతాబాద్‌ మహాగణపతి నిమజ్జన ప్రక్రియ ప్రారంభమైంది. కలశ పూజతో నిమజ్జన కార్యక్రమానికి శ్రీకారం చుట్టారు. ప్రస్తుతం మహాగణపతికి చివరి పూజలు కొనసాగుతున్నాయి. భారీగా తరలివచ్చిన భక్తులు గణనాథుడిని దర్శించుకుంటున్నారు. ప్రత్యేక ఏర్పాట్ల మధ్య అధికారులు నిమజ్జన ప్రక్రియను పర్యవేక్షిస్తున్నారు. భక్తుల గణపతి నామస్మరణలతో ట్యాంక్‌బండ్‌ పరిసరాలు మార్మోగుతున్నాయి. మరికాసేపట్లో మహాగణపతిని గంగమ్మ ఒడికి చేర్చనున్నారు.

హైదరాబాద్‌ పాతబస్తీలో గణేష్‌ నిమజ్జన శోభాయాత్ర నేపథ్యంలో పోలీసులు భారీగా మోహరించారు. చార్మినార్‌ పరిసరాల్లో భద్రతను కట్టుదిట్టం చేశారు. చార్మినార్‌ భాగ్యలక్ష్మి ఆలయంలో హారతి కార్యక్రమం ముగియగా.. సమీపంలోని మక్కామసీదులో శుక్రవారం ప్రార్థనలు కొనసాగుతున్నాయి. మరికాసేపట్లో బాలాపూర్‌ గణేషుడు చార్మినార్‌ పరిసరాల్లోకి చేరుకోనున్న నేపథ్యంలో పోలీసులు అప్రమత్తమయ్యారు. బాలాపూర్‌ గణేషుడి వెంట పాతబస్తీకి చెందిన గణనాథులు కూడా నిమజ్జనానికి బయలుదేరుతున్నారు. సున్నిత ప్రాంతాల్లో అదనపు బలగాలను మోహరించి, శోభాయాత్ర ప్రశాంతంగా సాగేలా పోలీసులు ప్రత్యేక చర్యలు చేపట్టారు. భక్తులు భారీగా తరలివస్తుండటంతో ట్రాఫిక్‌, భద్రతపై పోలీసులు నిరంతరం పర్యవేక్షిస్తున్నారు. భక్తిశ్రద్ధలతో, కోలాహలంగా సాగుతున్న గణపతి శోభాయాత్రలో ఎలాంటి అవాంఛనీయ ఘటనలు చోటుచేసుకోకుండా అధికారులు జాగ్రత్తలు తీసుకుంటున్నారు.

బొజ్జ గణపయ్యను భక్తిశ్రద్ధలతో, కోలాహలంగా ఊరేగిస్తూ గంగమ్మ ఒడికి సాగనంపే నిమజ్జన వేడుకలు భక్తుల్లో ఆధ్యాత్మిక ఉత్సాహాన్ని నింపుతున్నాయి. ‘మళ్లీ త్వరగా రావయ్యా’ అంటూ భక్తులు గణపయ్యకు వీడ్కోలు పలుకుతున్నారు. తెలుగు నేలపై జరిగే ఈ నిమజ్జన వేడుకలు మన ప్రాచీన సంస్కృతి, సంప్రదాయాలు, ఐక్యతకు ప్రతీకగా నిలుస్తున్నాయి. శోభాయాత్రలో పాల్గొన్న భక్తులు గణపతి రూపాన్ని తమ మొబైల్ ఫోన్లలో ఫొటోలు, వీడియోలు తీసుకుంటూ మురిసిపోతున్నారు. డప్పుల మోతలు, భక్తుల నినాదాలు, రంగురంగుల అలంకరణల మధ్య సాగుతున్న ఈ వేడుకలు నగరాలు, గ్రామాల్లో పండుగ వాతావరణాన్ని మరింత పెంచుతున్నాయి.

హైదరాబాద్‌లో ఖైరతాబాద్‌ మహాగణపతి నిమజ్జన ఘట్టం కీలక దశకు చేరుకుంది. 69 అడుగుల బడా గణపతి క్రేన్‌ నంబర్‌ 4 వరకు చేరుకుంది. వెడ్డింగ్‌ పనులు పూర్తయిన అనంతరం మహాగణపతిని ట్యాంక్‌బండ్‌లో గంగమ్మ ఒడిలో నిమజ్జనం చేయనున్నారు. ఈ మహా నిమజ్జన ఘట్టాన్ని వీక్షించేందుకు దేశ, విదేశాల నుంచి భక్తులు భారీగా తరలివచ్చారు. భక్తుల రద్దీ నేపథ్యంలో పోలీసులు ప్రత్యేక రక్షణ చర్యలు చేపట్టారు. నిమజ్జన ప్రాంతం మొత్తం నిఘా నేత్రంలో కొనసాగుతోంది. ఎలాంటి అవాంఛనీయ ఘటనలు చోటుచేసుకోకుండా పోలీసులు, అధికారులు అప్రమత్తంగా ఉన్నారు. నిమజ్జన ప్రక్రియ సురక్షితంగా, సజావుగా పూర్తయ్యేలా క్రేన్లు, సిబ్బందిని సిద్ధంగా ఉంచారు. మహాగణపతి నిమజ్జనాన్ని వీక్షించేందుకు ట్యాంక్‌బండ్‌ పరిసరాలు భక్తులతో కిక్కిరిసిపోయాయి.

భాగ్యనగరంలో బాలాపూర్‌ గణేషుడి శోభాయాత్ర వైభవంగా కొనసాగుతోంది. గణేష్‌ నిమజ్జనాన్ని వీక్షించేందుకు భక్తులు భారీగా తరలివచ్చారు. బాలాపూర్‌ హనుమాన్‌ టెంపుల్‌ నుంచి ప్రారంభమైన శోభాయాత్ర గణేశ్‌చౌక్‌ ఎడమ వైపు నుంచి డైమండ్‌ హోటల్‌కు చేరుకుంది. అక్కడి నుంచి మైసమ్మకట్ట, చాంద్రాయణగుట్ట మీదుగా చార్మినార్‌కు చేరుతుంది. అనంతరం అఫ్జల్‌గంజ్‌, ఎంజే మార్కెట్‌, అబిడ్స్‌, బషీర్‌బాగ్‌, లిబర్టీ వై జంక్షన్‌ మీదుగా ట్యాంక్‌బండ్‌కు చేరుకోనుంది. భారీగా తరలివచ్చే భక్తుల రద్దీని దృష్టిలో ఉంచుకుని పోలీసులు ప్రత్యేక భద్రతా ఏర్పాట్లు చేశారు. శోభాయాత్ర సజావుగా సాగేందుకు రోప్‌ పార్టీని కూడా రంగంలోకి దించారు. మార్గమధ్యంలో ఎలాంటి అవాంఛనీయ ఘటనలు చోటుచేసుకోకుండా పోలీసులు నిరంతరం పర్యవేక్షిస్తున్నారు.

భాగ్యనగరంలో గణేష్‌ నిమజ్జన శోభాయాత్ర వైభవంగా కొనసాగుతోంది. ఖైరతాబాద్‌ మహాగణపతి శోభాయాత్ర సచివాలయం వరకు చేరుకుంది. మహాగణపతిని దర్శించుకునేందుకు మార్గమధ్యంలో భక్తులు భారీగా తరలివచ్చారు. ప్రత్యేక వాహనంపై మహాగణపతిని తరలిస్తూ నిమజ్జనానికి ఏర్పాట్లు చేస్తున్నారు.

2026లో జరిగిన బాలాపూర్ లడ్డూ వేలంలో అర్బన్ గ్రూప సంస్థ అధినేత సామ ప్రణీత్‌ రెడ్డి రూ.39 లక్షలకు బాలాపూర్‌ లడ్డూను దక్కించుకున్నారు. ఈ ఏడాది మరో కొత్త రికార్డు నమోదైంది. అంటే 1994లో రూ.450తో మొదలైన బాలాపూర్‌ లడ్డూ వేలం.. 32 ఏళ్లలో రూ.39 లక్షల స్థాయికి చేరింది. ఈ వేలంలో వచ్చిన మొత్తాన్ని బాలాపూర్‌ గణేష్‌ ఉత్సవ కమిటీ సామాజిక, సేవా కార్యక్రమాలకు వినియోగిస్తున్నట్లు గణేష్ ఉత్సవ కమిటీ పేర్కొంది.

1994 – రూ. 450

2002 – రూ. 1.05 లక్షలు

2015 – రూ. 10.32 లక్షలు

2022 – రూ. 24.60 లక్షలు

2024 – రూ. 30.01 లక్షలు

2025 – రూ. 35 లక్షలు

2026 – రూ. 39 లక్షలు.

2020లో కరోనా మహమ్మారి కారణంగా బాలాపూర్‌ లడ్డూ వేలం నిర్వహించలేదు. ఆ ఏడాది లడ్డూను అప్పటి ముఖ్యమంత్రి కేసీఆర్‌కు అందజేశారు. 2021లో రూ.18.90 లక్షలు పలికిన లడ్డూ.. 2022లో ఒక్కసారిగా రూ.24.60 లక్షలకు చేరింది. 2023లో రూ.27 లక్షలు, 2024లో రూ.30.01 లక్షలు పలికింది. 2025లో కర్మన్‌ఘాట్‌కు చెందిన లింగాల దశరథ్‌ గౌడ్ రూ.35 లక్షలకు లడ్డూను దక్కించుకున్నారు. దీంతో అప్పటి వరకు ఉన్న రికార్డు బద్దలైంది.

1994లో తొలిసారి లడ్డూ వేలం ప్రారంభమైంది. ఆ ఏడాది స్థానిక రైతు కొలను మోహన్‌రెడ్డి రూ.450కు లడ్డూను దక్కించుకున్నారు. ఆ తర్వాత ప్రతి ఏడాది వేలంలో లడ్డూ ధర పెరుగుతూ వచ్చింది. 2002లో తొలిసారి రూ.1 లక్ష మార్క్‌ను దాటి రూ.1.05 లక్షలు పలికింది. 2007లో రూ.4.15 లక్షలు, 2015లో రూ.10.32 లక్షలు, 2018లో రూ.16.60 లక్షలు, 2019లో రూ.17.60 లక్షలకు చేరుకుంది. తాజాగా 2026లో జరిగిన వేలంలో సామ ప్రణీత్‌ రెడ్డి రూ.39 లక్షలకు బాలాపూర్‌ లడ్డూను దక్కించుకున్నారు.

హైదరాబాద్‌లోని బాలాపూర్‌ గణేష్‌ లడ్డూ వేలానికి ప్రత్యేక గుర్తింపు ఉంది. 1994లో తొలిసారి లడ్డూ వేలం ప్రారంభమైంది. ఆ ఏడాది స్థానిక రైతు కొలను మోహన్‌రెడ్డి రూ.450కు లడ్డూను దక్కించుకున్నారు. లడ్డూ ప్రసాదాన్ని కుటుంబ సభ్యులకు, స్థానికులకు పంచడంతో పాటు పొలంలో చల్లగా పంట దిగుబడి పెరిగిందనే అనుభవంతో ఆయన మరుసటి ఏడాది కూడా లడ్డూను వేలంలో దక్కించుకున్నారు. దీంతో లడ్డూను సొంతం చేసుకుంటే సుఖసంతోషాలు, ఐశ్వర్యం కలుగుతాయనే నమ్మకం క్రమంగా బలపడింది.

Sama Praneeth Reddy

ఎంతో ఆసక్తిగా ఎదురుచూస్తున్న బాలాపూర్‌ గణేష్‌ లడ్డూ వేలం పాట ముగిసింది. బాలాపూర్‌ ఉత్సవ కమిటీ తరఫున రూ.1,116 ప్రారంభ ధరతో వేలం పాట మొదలైంది. ఈసారి లడ్డూకు భారీగా పోటీ నెలకొనగా.. సామ ప్రణీత్‌ రెడ్డి అత్యధికంగా రూ.39 లక్షలు చెల్లించి లడ్డూను దక్కించుకున్నారు. దీంతో బాలాపూర్‌ లడ్డూ వేలంలో మరోసారి భారీ ధర నమోదైంది. గతేడాది రూ.35.70 లక్షలు పలికిన లడ్డూ.. ఈసారి రూ.39 లక్షలకు చేరింది. దీంతో గతేడాది ధరతో పోలిస్తే ఈసారి రూ.3.30 లక్షలు అధికంగా పలికింది. వేలం సందర్భంగా బాలాపూర్‌లో సందడి నెలకొంది. వేలం పాటను వీక్షించేందుకు భారీ సంఖ్యలో గ్రామస్థులు, భక్తులు తరలివచ్చారు.

ఎంతో ఆసక్తిగా ఎదురుచూస్తున్న బాలాపూర్‌ గణేష్‌ లడ్డూ వేలం పాట ప్రారంభమైంది.  బాలాపూర్ ఉత్సవ కమిటీ వారి పాట రూ. 1,116 తో వేలం పాట మొదలైంది.

ఎంతో ఆసక్తిగా ఎదురుచూస్తున్న బాలాపూర్‌ గణేష్‌ లడ్డూ వేలం పాట ప్రారంభమైంది. బాలాపూర్‌ గణేష్‌ గ్రామ బొడ్రాయికి చేరుకుంది. లడ్డూ వేలానికి అధికారులు అన్ని ఏర్పాట్లు పూర్తి చేశారు. వేలం పాటను ప్రత్యక్షంగా వీక్షించేందుకు బాలాపూర్‌ గ్రామస్థులు, భక్తులు భారీగా తరలివచ్చారు. దీంతో వేలం ప్రాంగణం కిక్కిరిసిపోయింది. లడ్డూ కోసం ఈసారి వ్యక్తులతో పాటు కంపెనీలు కూడా పోటీలో నిలిచాయి. మొత్తం తొమ్మిది మంది దరఖాస్తుదారుల్లో ఐదు కంపెనీలు ఉండటంతో పోటీ ఆసక్తికరంగా మారింది. గతేడాది బాలాపూర్‌ లడ్డూ రూ.35.70 లక్షలు పలికింది. ఈసారి ధర మరింత పెరిగే అవకాశం ఉండటంతో.. వేలం ఎంతకు ముగుస్తుందన్న ఉత్కంఠ నెలకొంది.

హైదరాబాద్‌లో గణేష్‌ నిమజ్జన శోభాయాత్ర ప్రారంభమైంది. ఖైరతాబాద్‌ బడా గణేష్‌ శోభాయాత్రకు భక్తులు భారీగా తరలివస్తున్నారు. నిమజ్జనం సందర్భంగా నగరంలో భారీ బందోబస్తు ఏర్పాటు చేశారు. దాదాపు 25 వేల మంది పోలీసులతో భద్రతా చర్యలు చేపట్టారు. 10 వేల సీసీ కెమెరాల నిఘాలో శోభాయాత్ర కొనసాగనుంది. హుస్సేన్‌సాగర్‌ చుట్టూ 45 క్రేన్లను అధికారులు ఏర్పాటు చేశారు. నిమజ్జన ప్రక్రియ సజావుగా సాగేందుకు పోలీసులు, జీహెచ్‌ఎంసీ అధికారులు సమన్వయంతో చర్యలు చేపడుతున్నారు. ఈరోజు నుంచి రేపు సాయంత్రం వరకు హైదరాబాద్‌లో పలు ప్రాంతాల్లో ట్రాఫిక్‌ ఆంక్షలు అమల్లో ఉంటాయి. ఖైరతాబాద్‌ ఫ్లైఓవర్‌ను మూసివేశారు. హుస్సేన్‌సాగర్‌ పరిసరాల్లో సాధారణ వాహనాలకు అనుమతి లేదని అధికారులు తెలిపారు. ప్రజలు ప్రత్యామ్నాయ మార్గాలను ఉపయోగించాలని పోలీసులు సూచించారు.

బాలాపూర్‌ గణేష్‌ లడ్డూ వేలానికి సర్వం సిద్ధమైంది. గణేష్‌ ఊరేగింపు కొనసాగుతుండగా మరికొద్దిసేపట్లో గ్రామ బొడ్రాయికి మహాగణపతి చేరుకోనున్నారు. లడ్డూ వేలం పాటను వీక్షించేందుకు గ్రామస్థులు, భక్తులు భారీగా తరలివచ్చారు. 32 ఏళ్లుగా వ్యక్తిగతంగా కొనసాగుతున్న రిజిస్ట్రేషన్లు, వేలంపాటలో ఈసారి కంపెనీలు కూడా బరిలోకి దిగాయి. మొత్తం తొమ్మిది మంది దరఖాస్తుదారుల్లో ఐదు కంపెనీలు ఉన్నాయి. గతేడాది లడ్డూ రూ.35 లక్షలు పలకగా, ఈసారి రూ.40 లక్షలు దాటొచ్చన్న అంచనాలు వినిపిస్తున్నాయి.

హైదరాబాద్‌లో గణేష్‌ నిమజ్జన శోభాయాత్ర వైభవంగా ప్రారంభమైంది. ఖైరతాబాద్‌ మహాగణపతి శోభాయాత్రకు వేలాది మంది భక్తులు తరలివచ్చారు. మహాగణపతి దర్శనం కోసం భక్తులతో పరిసర ప్రాంతాలు కిక్కిరిసిపోయాయి. ఈ సందర్భంగా మంత్రి దానం నాగేందర్‌ టస్కర్‌ ముందు కొబ్బరికాయ కొట్టి శోభాయాత్రను ప్రారంభించారు. అనంతరం మహాగణపతి ఎదుట దానం నాగేందర్‌ ఉత్సాహంగా డ్యాన్స్‌ చేశారు. ఖైరతాబాద్‌ గణేష్‌ యాత్ర ఆలస్యంగా ప్రారంభమైనప్పటికీ భక్తుల్లో ఉత్సాహం ఏమాత్రం తగ్గలేదు. ప్రత్యేక వాహనంపై మహాగణపతిని తరలించేందుకు అధికారులు ఏర్పాట్లు చేశారు. శోభాయాత్ర మార్గంలో భారీగా పోలీసు బందోబస్తు ఏర్పాటు చేశారు. భక్తులకు ఎలాంటి ఇబ్బందులు కలగకుండా అధికారులు చర్యలు చేపట్టారు. మహాగణపతి శోభాయాత్రను వీక్షించేందుకు నగరంలోని వివిధ ప్రాంతాల నుంచి ప్రజలు పెద్ద సంఖ్యలో తరలివచ్చారు. దీంతో ఖైరతాబాద్‌ పరిసరాల్లో పండుగ వాతావరణం నెలకొంది.

ఇంకా కదలని ఖైరతాబాద్ బడా గణేష్‌

మరీ ఆలస్యమవుతున్న శోభయాత్ర

టస్కర్‌పైకి గణపతిని ఎక్కిస్తున్న నిర్వాహకులు

మధ్యాహ్నం 2.గంటలలోపు నిమజ్జనం పూర్తి చేస్తామన్న సీపీ సజ్జనార్

అందుకు భిన్నంగా వాస్తవ పరిస్థితులు

భక్తులతో కోలాహలంగా ఖైరతాబాద్‌ పరిసరాలు

గణేష్ నిమజ్జనం సందర్భంగా పాతబస్తీలో భారీ సెక్యూరిటీ

కట్టుదిట్టమైన భద్రత ఏర్పాటు చేసిన అధికారులు

పాతబస్తీ నుంచి కొనసాగనున్న బాలాపూర్ గణేష్ శోభాయాత్ర

శోభాయాత్ర సమయంలో ఎలాంటి అవాంఛనీయ ఘటనలు జరగకుండా నిఘా

బాలాపూర్‌లో సందడే సందడి

మొదలైన బాలాపూర్‌ గణేష్‌ శోభాయాత్ర

భక్తుల కోలాహలంతో సాగర్‌వైపు గణనాథుడు

భారీ భద్రత మధ్య సాగుతున్న శోభాయాత్ర

బడా గణపతి చుట్టూ మోహరించిన పోలీసులు

హైదరాబాద్‌లో గణేష్ నిమజ్జనాన్ని ప్రశాంతంగా, సురక్షితంగా నిర్వహించేందుకు ప్రభుత్వం పకడ్బందీ ఏర్పాట్లు చేసిందని హైదరాబాద్ ఇంచార్జి మంత్రి పొన్నం ప్రభాకర్ తెలిపారు. భక్తులు, మండపాల నిర్వాహకులు అధికారులకు సహకరించాలని మంత్రి కోరారు. నిమజ్జన శోభాయాత్రకు దాదాపు 20 వేల మంది పోలీసులతో భారీ బందోబస్తు ఏర్పాటు చేశారు. 10 వేల సీసీ కెమెరాలు, 24 డ్రోన్లతో నిరంతర నిఘా కొనసాగుతోందన్నారు. హుస్సేన్‌సాగర్ సహా ప్రధాన నిమజ్జన ప్రాంతాల్లో క్రేన్లు, బోట్లు, రెస్క్యూ బృందాలు, శిక్షణ పొందిన ఈతగాళ్లను అందుబాటులో ఉంచామన్నారు. తాగునీరు, వైద్య సేవలు, మొబైల్ టాయిలెట్లు, పారిశుద్ధ్య సిబ్బంది, ప్రత్యేక లైటింగ్ ఏర్పాట్లు చేశారు. ట్రాఫిక్ నియంత్రణకు ప్రత్యేక చర్యలు చేపట్టారు. మెట్రో, ఆర్టీసీ, రైల్వే శాఖలు అదనపు సేవలు అందిస్తున్నాయి. అత్యవసర పరిస్థితుల్లో 112 లేదా 040-21111111కు సంప్రదించాలని మంత్రి పొన్నం ప్రభాకర్ సూచించారు.

భాగ్యనగరంలో గణేష్ నిమజ్జనానికి అన్ని ఏర్పాట్లు పూర్తయ్యాయని హైదరాబాద్ పోలీస్ కమిషనర్ విసీ సజ్జనార్ తెలిపారు. నిమజ్జనం సందర్భంగా 20 వేల మంది పోలీసులతో బందోబస్తు ఏర్పాటు చేసినట్లు వెల్లడించారు. నగరవ్యాప్తంగా 10 వేల సీసీ కెమెరాలు, ట్యాంక్‌బండ్ చుట్టూ 100 హైరిజ్ కెమెరాలు, 24 డ్రోన్లతో నిఘా కొనసాగుతుందని చెప్పారు. బడా గణేష్‌ను 25 లక్షల మంది, బాలాపూర్ గణేష్‌ను 15 లక్షల మంది దర్శించుకున్నట్లు తెలిపారు. నిమజ్జన శోభాయాత్ర మొత్తం 18 కిలోమీటర్ల మేర సాగనుంది. ప్రాంతాన్ని ఐదు సెక్టార్లుగా విభజించారు. మహిళల భద్రత కోసం 26 షీ టీమ్స్ మఫ్టీలో విధులు నిర్వహిస్తాయి. సోషల్ మీడియాపై 24 గంటలూ నిఘా ఉంటుందని, పుకార్లు, అసభ్యకర డ్యాన్స్‌లకు పాల్పడితే చర్యలు తప్పవని సజ్జనార్ హెచ్చరించారు. ఇప్పటివరకు 1,172 మంది ఆకతాయిలను అరెస్ట్ చేసినట్లు తెలిపారు.

హైదరాబాద్‌లో గణేష్‌ నిమజ్జన వేడుకల్లో విషాద ఘటన చోటుచేసుకుంది. ఖైరతాబాద్‌ సమీపంలో నిమజ్జన శోభాయాత్ర సందర్భంగా ఓ వ్యక్తి వాహనం కిందపడి మృతి చెందాడు. భారీగా భక్తులు తరలివచ్చిన సమయంలో ఈ ఘటన చోటుచేసుకుంది. ఘటనకు సంబంధించిన పూర్తి వివరాలు తెలియాల్సి ఉంది. పోలీసులు సంఘటనా స్థలానికి చేరుకుని పరిస్థితిని పరిశీలిస్తున్నారు. మృతుడి వివరాలు, ప్రమాదానికి గల కారణాలపై ఆరా తీస్తున్నారు.

జగిత్యాల పట్టణంలోని తులసినగర్‌లో వినాయక నిమజ్జన వేడుకల్లో విషాద ఘటన చోటుచేసుకుంది. నిమజ్జన వేడుకల్లో డ్యాన్స్ చేస్తుండగా ఓ యువకుడు ఒక్కసారిగా అస్వస్థతకు గురై కుప్పకూలాడు. వెంటనే స్పందించిన పోలీసులు యువకుడికి సీపీఆర్ చేశారు. 108 అంబులెన్స్‌కు ఫోన్ చేసినప్పటికీ సకాలంలో అందుబాటులోకి రాకపోవడంతో.. పోలీసుల వాహనంలో యువకుడిని ఆసుపత్రికి తరలించారు. అయితే అప్పటికే పరిస్థితి విషమంగా ఉండగా.. పరీక్షించిన వైద్యులు గుండెపోటుతో మృతి చెందినట్లు నిర్ధారించారు. మృతుడిని జగిత్యాల తులసినగర్‌కు చెందిన తోపారపు జయంత్‌గా గుర్తించారు. నిమజ్జన వేడుకల్లో ఉత్సాహంగా పాల్గొన్న యువకుడు అకస్మాత్తుగా మృతి చెందడంతో స్థానికంగా విషాదం నెలకొంది.

చారిత్రాత్మకంగా ప్రసిద్ధిగాంచిన బాలాపూర్ గణేష్ లడ్డూ వేలం పాటకు సర్వం సిద్ధమైంది. ఉదయం 9:30 గంటలకు లడ్డూ వేలం ప్రారంభం కానుంది. ఈ ఏడాది వేలంలో పాల్గొనే వారి జాబితాను నిర్వాహకులు విడుదల చేశారు. అనంతరం ఉదయం 10 గంటలకు బాలాపూర్ గణేష్ నిమజ్జన శోభాయాత్ర ట్యాంక్‌బండ్ వైపు ప్రారంభం కానుంది.

వేలంలో పాల్గొనే వారిలో అర్బన్ గ్రూప్‌కు చెందిన సామ ప్రణీత్ రెడ్డి, మార్రి రవికిరణ్ రెడ్డి, కందాడ శాలిని వీరేందర్ రెడ్డి, కంచర్ల శివారెడ్డి, లండన్‌కు చెందిన ది సుషీ కో. తరఫున సామ దయానంద్ రెడ్డి, సామ వరానంద్ రెడ్డి, జీఎన్‌ఆర్ డెవలపర్స్ గడ్డం నవీన్ రెడ్డి, పీఎస్‌కే గ్రూప్ శ్రీకాంత్, ఇబ్రహీం ప్రత్యూష్ ఉన్నారు. గతేడాది లడ్డూ రూ.35 లక్షలు పలకగా.. ఈసారి ఎంత ధర పలుకుతుందనేది ఆసక్తిగా మారింది.

బాలాపూర్ గణేష్ నిమజ్జనానికి అన్ని ఏర్పాట్లు పూర్తి చేసినట్లు శంషాబాద్ జోన్ డీసీపీ రాజేష్ తెలిపారు. టీవీ9తో మాట్లాడిన ఆయన.. ప్రత్యేకంగా లడ్డూ వేలం పాట కోసం అన్ని ఏర్పాట్లు చేసినట్లు చెప్పారు. భద్రత కోసం సుమారు 400 మంది పోలీసులతో బందోబస్తు ఏర్పాటు చేశామని వెల్లడించారు. ఇందులో లా అండ్ ఆర్డర్, ట్రాఫిక్, షీ టీమ్స్, టాస్క్‌ఫోర్స్ సిబ్బంది ఉన్నారని తెలిపారు. బాలాపూర్ పరిసర ప్రాంతాలను సీసీ కెమెరాలతో నిరంతరం పర్యవేక్షిస్తున్నట్లు పేర్కొన్నారు. మరోవైపు ప్రత్యేక పూజల అనంతరం బాలాపూర్ గణేష్‌ను ఉత్సవ సమితి సభ్యులు ప్రత్యేక వాహనంపైకి ఎక్కించనున్నారు. అనంతరం గ్రామ ప్రదక్షిణ, శోభాయాత్ర నిర్వహించనున్నారు.

హైదరాబాద్‌లో వినాయక నిమజ్జనోత్సవాన్ని దృష్టిలో పెట్టుకుని జలమండలి విస్తృత ఏర్పాట్లు చేపట్టింది. శోభాయాత్రకు తరలివచ్చే లక్షలాది మంది భక్తులకు తాగునీటి కొరత లేకుండా ప్రత్యేక చర్యలు తీసుకుంది. నిమజ్జనం పూర్తయ్యే వరకు రాబోయే 72 గంటల పాటు అధికారులు, సిబ్బంది అప్రమత్తంగా ఉండాలని జలమండలి ఎండీ అశోక్‌రెడ్డి ఆదేశించారు.

ఖైరతాబాద్ బడా గణేష్‌ నిమజ్జనం ఈసారి కాస్త ఆలస్యమవుతోంది. క్రేన్‌లో సాంకేతిక లోపం తలెత్తడంతో శోభాయాత్రకు ఆలస్యం జరిగింది. ప్రస్తుతం నిమజ్జనం కోసం క్రేన్‌లను సిద్ధం చేశారు. మరికాసేపట్లో ఖైరతాబాద్ నుంచి ఎన్టీఆర్ మార్గ్ వైపు బడా గణేష్‌ శోభాయాత్ర ప్రారంభం కానుంది. గతేడాదితో పోలిస్తే ఈసారి శోభాయాత్ర ఆలస్యంగా మొదలవుతోంది. మధ్యాహ్నం 12 గంటలకు మహాగణపతి సాగర్ తీరానికి చేరుకునేలా అధికారులు ఏర్పాట్లు చేశారు. నిమజ్జనం కోసం క్రేన్ నంబర్-4ను సిద్ధం చేశారు. మధ్యాహ్నం 1:30 గంటలలోపు నిమజ్జనం పూర్తి చేయాలని లక్ష్యంగా పెట్టుకున్నారు. శోభాయాత్ర మార్గంలో భారీగా భద్రతా ఏర్పాట్లు చేశారు.

బాలాపూర్ గణేష్ లడ్డూ వేలం పాటకు సర్వం సిద్ధమైంది. మరికొద్ది సేపట్లో ఉత్సవ సమితి సభ్యులు గణనాథుడికి ప్రత్యేక పూజలు నిర్వహించనున్నారు. అనంతరం బాలాపూర్ గ్రామ ప్రదక్షిణ తర్వాత శోభాయాత్ర ప్రారంభమవుతుంది. ఉదయం 9 గంటలకు బాలాపూర్ గణేష్ బొడ్రాయి వద్దకు చేరుకోనున్నారు. ఉదయం 9:30 గంటలకు ప్రతిష్ఠాత్మక లడ్డూ వేలం పాట ప్రారంభం కానుంది. వేలం పాటను చూసేందుకు భారీగా భక్తులు తరలిరానుండటంతో పోలీసులు పటిష్ఠ బందోబస్తు ఏర్పాటు చేశారు. ఇప్పటికే 15 లక్షల మందికి పైగా భక్తులు బాలాపూర్ గణేష్‌ను దర్శించుకున్నట్లు నిర్వాహకులు తెలిపారు. గతేడాది లడ్డూ రూ.35 లక్షలకు వేలం కాగా.. ఈసారి ఎంత ధర పలుకుతుందనే దానిపై ఉత్కంఠ నెలకొంది.

బాలాపూర్ గణేష్ లడ్డూ వేలం పాటకు సర్వం సిద్ధమైంది. ఈసారి ప్రతిష్ఠాత్మక లడ్డూను ఎవరు దక్కించుకుంటారనే అంశంపై ఉత్కంఠ నెలకొంది. ఉదయం బాలాపూర్ గణేష్‌కు ఉత్సవ సమితి సభ్యులు ప్రత్యేక పూజలు నిర్వహించారు. పూజల అనంతరం గ్రామంలో గణనాథుడి శోభాయాత్ర నిర్వహించేందుకు సర్వం సిద్దం చేశారు. అనంతరం గ్రామ బొడ్రాయి వద్ద బాలాపూర్ గణేష్ లడ్డూ వేలం పాట జరగనుంది. వేలం పాటను తిలకించేందుకు భారీగా భక్తులు తరలివచ్చే అవకాశం ఉంది. ఇప్పటికే బాలాపూర్ గణేష్‌ను 15 లక్షల మందికి పైగా భక్తులు దర్శించుకున్నట్లు నిర్వాహకులు తెలిపారు

గణపతి శోభాయాత్ర మార్గంలో భక్తుల భారీ రద్దీ దృష్ట్యా పోలీసులు విస్తృత భద్రతా ఏర్పాట్లు చేశారు. కీలక ప్రాంతాల్లో బారికేడ్లు ఏర్పాటు చేయడంతో పాటు ట్రాఫిక్‌ను నియంత్రించేందుకు ప్రత్యేక చర్యలు చేపట్టారు. భక్తులకు ఎలాంటి ఇబ్బందులు తలెత్తకుండా అధికారులు సమన్వయంతో ఏర్పాట్లను పర్యవేక్షిస్తున్నారు.

హైదరాబాద్‌లో ఖైరతాబాద్ మహాగణపతి శోభాయాత్రకు ఏర్పాట్లు పూర్తయ్యాయి. ఖైరతాబాద్ నుంచి ఎన్టీఆర్ మార్గ్ వైపు బడా గణేష్‌ శోభాయాత్ర సాగనుంది. మధ్యాహ్నం 12 గంటల సమయంలో మహాగణపతి సాగర్ తీరానికి చేరుకునేలా అధికారులు ఏర్పాట్లు చేశారు. నిమజ్జనం కోసం ప్రత్యేకంగా క్రేన్ నంబర్-4ను సిద్ధం చేశారు. మధ్యాహ్నం 1:30 గంటలలోపు మహాగణపతి నిమజ్జన ప్రక్రియను పూర్తి చేయాలని అధికారులు లక్ష్యంగా పెట్టుకున్నారు.