ఎమ్మెల్యే అంటే ఇలా ఉండాలి..! అధికారుల వెన్నులో వణుకు పుట్టించాడు..?

మహబూబాబాద్ జిల్లా గూడూరులో మండల సర్వసభ్య సమావేశం రసాభాసాగా అనేకంటే రసవత్తరంగా సాగిందని చెప్పాలి. 39 గ్రామాలకు సంబంధించి, అది కూడా ఆరు నెలల తర్వాత జరిగిన మండల సర్వసభ్య భేటీ. ఇంతకు ముందు ఎన్నడూ ఇలాంటి సమావేశం జరిగి ఉండదు. ఒక్కొక్క అధికారి సిత్రాలు, వారి పని తీరును స్థానిక ఎమ్మెల్యే సభలోనే కడిగిపారేశాడు. ఇద్దరు అధికారులపై సస్పెన్షన్ వేటుకు కూడా సిఫార్సు చేశారు. మరో ఇద్దరు అధికారులకు షోకాజ్ నోటీసులు జారీ చేశారు. ఇంతకీ ఎవరా ఎమ్మెల్యే, ఎంటా స్టోరీ అనుకుంటున్నారా..అయితే పూర్తి వివరాల్లోకి వెళ్లాల్సిందే..

మహబూబాబాద్ జిల్లా గూడూరులో మండల సర్వసభ్య సమావేశంలో పాల్గొన్న ఎమ్మెల్యే శంకర్‌ నాయక్‌ నిర్లక్ష్యంగా వ్యవహరిస్తున్న అధికారులకు తనదైన శైలిలో క్లాస్‌ తీసుకున్నారు. మల్సూర్ అనే విద్యుత్ లైన్ ఇన్స్‌పెక్టర్ రైతుల వద్ద లంచాలు తీసుకుంటున్నాడని కిషన్ అనే ఎంపిటీసీ సభ్యుడు ఆరోపించాడు. మరోమారు లంచాల ప్రస్తావన వినిపించినా, నిర్లక్ష్యం ప్రదర్శించినా తానే స్వయంగా “కరెంట్ షాక్” పెడుతానని విద్యుత్ అధికారులను ఎమ్మెల్యే హెచ్చరించాడు.

అడవులను కాపాడాల్సిన ఆ శాఖాధికారులు అడవులను నరికివేస్తున్నారని, పొనుగోడు సర్పంచ్ వెంకన్న నిండు సభలో ఆరోపించాడు. తన వద్ద ఆధారాలున్నాయని తెలపడంతో అటవీ శాఖాధికారులపై ఎమ్మెల్యే సీరియస్ అయ్యాడు. పద్దతి మార్చుకోవాలనీ హెచ్చరించాడు. పంచాయతీరాజ్ శాఖా ఏఈ ఇరవై సంవత్సరాలుగా గూడూరు లోనే పని చేస్తూ, విధులలో అలసత్వం ప్రదర్శిస్తున్నాడనీ సభ్యులందరు ముక్తకంఠంతో ఫిర్యాదు చేయడంతో ఏఈ ని సస్పెండ్ చేస్తానని సభ్యులకు ఎమ్మెల్యే హామి ఇచ్చాడు.

సభలో వెైద్యాధికారులపై కూడా ఎమ్మెల్యే అసహనం వ్యక్తం చేశాడు. నిర్దేశించిన లక్ష్యం మేరకు పనులు చేయక పోవడంతో ఇద్దరు మిషన్ భగీరథ అధికారులను సస్పెండ్ చేయాలని సభ తీర్మానించింది. గ్రామీణ ఉపాధి హామి అధికారికి కూడికలు, తీసివేతలు సరిగా రావడం లేదని, గణితం నేర్చుకోవాలని ఎమ్మెల్యే సెటైర్ వేశారు. కోవిడ్ కారణంగా ఈ సారి సమావేశం బహిరంగ ప్రదేశంలో నిర్వహించడంతో స్థానికులంతా వీక్షించారు. అధికారులను ఎమ్మెల్యే మందలిస్తుంటే, స్థానికుల నుండి హర్షాతిరేకాలు వ్యక్తమయ్యాయి. ఎమ్మెల్యే అంటే గీ తీరున ఉండాలి. అధికారుల వెన్నులో వణుకు పుట్టించాడంటూ స్థానికులు ఎంతగానో ప్రశంసించారు.