3 రైడింగ్ మోడ్స్తో VIDA ఎలక్ట్రిక్ బైక్.. Dirt.E K3 లిమిటెడ్ ఎడిషన్ స్పెషాలిటీస్ ఇవే
యువ రైడర్లను ఆకట్టుకునేలా హీరో మోటోకార్ప్‌కు చెందిన ఎలక్ట్రిక్ టూ వీలర్ బ్రాండ్ విడా (VIDA) కొత్త బైక్‌ను ఆవిష్కరించింది. VIDA Dirt.E K3 6Days Limited Edition పేరుతో పరిచయం చేసిన ఈ ప్రత్యేక మోడల్‌ను పోర్చుగల్‌లో జరిగిన అంతర్జాతీయ మోటార్‌సైకిల్ ఈవెంట్‌లో ప్రదర్శించారు. అంతర్జాతీయ ఆఫ్‌రోడ్ రేసింగ్ ఈవెంట్ FIM International Six Days Enduro (ISDE) 100వ ఎడిషన్‌ను పురస్కరించుకుని ఈ బైక్‌ను రూపొందించారు. ఈ లిమిటెడ్ ఎడిషన్‌ను కేవలం 100 యూనిట్లకే పరిమితం చేయనున్నట్లు కంపెనీ తెలిపింది.
పిల్లలు ఆఫ్‌రోడ్ రైడింగ్ నేర్చుకునేందుకు వీలుగా రూపొందించిన ఈ ఎలక్ట్రిక్ డర్ట్ బైక్‌లో ప్రత్యేకమైన రేసింగ్ గ్రాఫిక్స్‌తో పాటు రైడర్ ఎదుగుదలకు అనుగుణంగా సర్దుబాటు చేసుకునే సదుపాయాలు ఉన్నాయి. 500W మోటార్‌, 350Wh బ్యాటరీ, మూడు రైడింగ్ మోడ్‌లు దీని ముఖ్యమైన ఫీచర్లుగా నిలుస్తున్నాయి. ఇప్పటికే అందుబాటులో ఉన్న స్టాండర్డ్ మోడల్‌తో పోలిస్తే కొత్త ఎడిషన్‌లో ప్రధానంగా డిజైన్ మార్పులు చేసినట్లు సమాచారం.
పోర్చుగల్ జెండా రంగులతో ప్రత్యేక లుక్‌!
1913లో ప్రారంభమైన FIM International Six Days Enduro (ISDE) ఆఫ్‌రోడ్ రేసింగ్ ఈవెంట్ 100వ ఎడిషన్‌ను గుర్తుచేస్తూ VIDA ఈ ప్రత్యేక బైక్‌ను తీసుకొచ్చింది. ఇందులో అధికారిక 6Days లోగోలు, రేసింగ్ స్ఫూర్తిని ప్రతిబింబించే గ్రాఫిక్స్ ఉన్నాయి. ఈసారి పోర్చుగల్‌లో ఈవెంట్ నిర్వహిస్తున్న నేపథ్యంలో, ఆ దేశ జెండాను పోలిన ఎరుపు, ఆకుపచ్చ రంగుల కలయికను ఉపయోగించారు.
కొత్త రంగులు, గ్రాఫిక్స్ మినహా బైక్‌లోని మెకానికల్ అంశాల్లో మార్పులు చేయలేదని అందించిన సమాచారం పేర్కొంటోంది. ఈ ప్రత్యేక ఎడిషన్‌ను కేవలం 100 యూనిట్లకే పరిమితం చేయడం వల్ల కలెక్టర్లతో పాటు యువ రైడర్లలోనూ ఆసక్తి పెరిగే అవకాశం ఉంది.
మూడు రైడింగ్ మోడ్‌లు!
VIDA Dirt.E K3 మొదటిసారిగా 2025 డిసెంబర్‌లో మార్కెట్లోకి వచ్చింది. చిన్న వయసు రైడర్లు ఆఫ్‌రోడ్ రైడింగ్‌ను నేర్చుకునేందుకు వీలుగా దీన్ని రూపొందించారు. ఇందులోని మాడ్యులర్ సెటప్‌ ప్రత్యేకతగా నిలుస్తోంది. అలెన్ కీ సాయంతో హ్యాండిల్‌బార్ ఎత్తు, ఫుట్‌పెగ్ పొజిషన్‌, సీటు ఎత్తును సర్దుబాటు చేసుకోవచ్చు. దీంతో పిల్లలు పెరిగే కొద్దీ బైక్‌ను వారి ఎత్తుకు అనుగుణంగా మార్చుకోవచ్చు.
ఈ ఎలక్ట్రిక్ బైక్‌లో 500W మోటార్‌, 350Wh బ్యాటరీ ప్యాక్ ఉన్నాయి. గరిష్ఠ వేగం గంటకు 25 కిలోమీటర్ల వరకు ఉంటుందని సమాచారం. బ్యాటరీ పూర్తిగా ఛార్జ్ కావడానికి సుమారు మూడు గంటలు పడుతుంది. రైడింగ్ అనుభవాన్ని బట్టి బిగినర్‌, అమెచ్యూర్‌, ప్రో అనే మూడు మోడ్‌లను ఎంచుకోవచ్చు. వీటిలో వేగాన్ని వరుసగా గంటకు 8, 16, 25 కిలోమీటర్ల వరకు పరిమితం చేసుకోవచ్చు. ధర విషయానికి వస్తే, VIDA Dirt.E K3 స్టాండర్డ్ మోడల్ ధర రూ.89,990గా ఉంది. అయితే 6 Days Limited Edition ధరను కంపెనీ ఇంకా ప్రకటించలేదు. అలాగే బుకింగ్‌లు, డెలివరీలు ఎప్పటి నుంచి ప్రారంభమవుతాయనే వివరాలు కూడా వెల్లడించలేదు.