Virat Kohli : 100 సెంచరీలు కొట్టేస్తాడు.. సచిన్ వరల్డ్ రికార్డు బ్రేక్ చేస్తాడు.. లెజెండ్ పై మాజీ క్రికెటర్ జోస్యం
Virat Kohli : క్రికెట్ దిగ్గజం, మాజీ కెప్టెన్ సునీల్ గవాస్కర్, రన్ మెషిన్ విరాట్ కోహ్లీ గురించి పెద్ద అంచనాను ప్రకటించారు. క్రికెట్ చరిత్రలో అసాధ్యంగా భావించే సచిన్ టెండూల్కర్ పేరిట ఉన్న అంతర్జాతీయ 100 సెంచరీల ప్రపంచ రికార్డును విరాట్ కోహ్లీ కూడా సులభంగా సమం చేయగలడని గవాస్కర్ ధీమా వ్యక్తం చేశారు.
Virat Kohli : క్రికెట్ దిగ్గజం, మాజీ కెప్టెన్ సునీల్ గవాస్కర్, రన్ మెషిన్ విరాట్ కోహ్లీ గురించి పెద్ద అంచనాను ప్రకటించారు. క్రికెట్ చరిత్రలో అసాధ్యంగా భావించే సచిన్ టెండూల్కర్ పేరిట ఉన్న అంతర్జాతీయ 100 సెంచరీల ప్రపంచ రికార్డును విరాట్ కోహ్లీ కూడా సులభంగా సమం చేయగలడని గవాస్కర్ ధీమా వ్యక్తం చేశారు. విరాట్ కోహ్లీ 2027 ప్రపంచ కప్ తర్వాత కూడా ఆడతాడని గవాస్కర్ జోస్యం చెప్పారు.
కోహ్లీ ప్రస్తుతం వన్డే అంతర్జాతీయ క్రికెట్లో మాత్రమే చురుకుగా ఉన్నారు. ఇటీవల ముగిసిన దక్షిణాఫ్రికా సిరీస్లో ఆయన అద్భుతంగా రాణించి, ప్లేయర్ ఆఫ్ ది సిరీస్గా నిలిచారు. ఈ సిరీస్లో రెండు సెంచరీలు, ఒక అజేయ హాఫ్ సెంచరీతో ఆయన మొత్తం 302 పరుగులు సాధించారు. ప్రస్తుతం విరాట్ కోహ్లీ ఖాతాలో అంతర్జాతీయ క్రికెట్లో 84 సెంచరీలు ఉన్నాయి. ఈ రికార్డుపై గవాస్కర్ మాట్లాడుతూ.. “కోహ్లీ 100 సెంచరీలు ఎందుకు కొట్టలేడు? ఇంకో మూడేళ్లు ఆడితే అతనికి కేవలం 16 సెంచరీలు మాత్రమే అవసరం. మూడు మ్యాచ్ల సిరీస్లో రెండు సెంచరీలు కొట్టాడు” అని అన్నారు.
కోహ్లీ ప్రస్తుతం ఉన్న అద్భుతమైన ఫామ్ ఈ అంచనాలకు మరింత బలాన్ని చేకూరుస్తోంది. దక్షిణాఫ్రికా సిరీస్లో కోహ్లీ బ్యాటింగ్ తీరును చూసిన గవాస్కర్, “అతను బ్యాటింగ్ చేస్తున్న తీరును బట్టి, రాబోయే న్యూజిలాండ్తో మూడు మ్యాచ్ల సిరీస్లో మరో రెండు సెంచరీలు కొడితే, అతని సెంచరీల సంఖ్య 86కి చేరుకుంటుంది. అందుకే, అతను 100 సెంచరీలకు చేరుకునే అవకాశాలు చాలా బాగున్నాయి” అని తెలిపారు.
36 ఏళ్ల వయసులో కూడా కోహ్లీ తన కెరీర్ చివరి దశలో అద్భుతమైన బ్యాటింగ్ ప్రదర్శిస్తున్నారు. గత 10 ఇన్నింగ్స్లలో 3 సెంచరీలు సాధించడం ఆయన నిలకడకు నిదర్శనం. అయితే టీమిండియాకు 2027 ప్రపంచ కప్ వరకు దాదాపు 35 వన్డే మ్యాచ్లు మాత్రమే ఉన్నాయి. ఈ సమయంలో 16 సెంచరీలు కొట్టడం చాలా కష్టం. అయినప్పటికీ గవాస్కర్ అంచనా ప్రకారం కోహ్లీ గనుక వరల్డ్ కప్ తర్వాత కూడా ఆడటం కొనసాగిస్తే, 100 సెంచరీల మైలురాయిని చేరుకోవడం ఖాయం. నిపుణుల అభిప్రాయం ప్రకారం.. కోహ్లీ ఖచ్చితంగా 90కి పైగా సెంచరీలు సులభంగా సాధించగలరు.