శ్రేయస్ అయ్యర్ అంటే పిచ్చి.. ఆయనతో డేటింగ్ చేయాలని ఉంది.. షాకిచ్చిన బిగ్ బాస్ విన్నర్..!
Sana Makbul vs Shreyas Iyer: క్రికెట్, సినీ ప్రపంచాల మధ్య బంధం ఈనాటిది కాదు. పిచ్పై ఆటగాళ్ల సిక్సర్లకు మైదానంలో ఫ్యాన్స్ ఫిదా అయితే, కొందరు భామలు మాత్రం వారి వ్యక్తిత్వానికి క్లీన్ బౌల్డ్ అయిపోతుంటారు. తాజాగా టీమిండియా స్టార్ బ్యాటర్, ఐపీఎల్ కెప్టెన్ శ్రేయస్ అయ్యర్ ప్రేమలో పడిపోయానంటూ బాలీవుడ్ నటి, బిగ్ బాస్ ఓటీటీ విజేత సనా మక్బూల్ చేసిన వ్యాఖ్యలు ఇప్పుడు సోషల్ మీడియాలో సంచలనంగా మారాయి.
Sana Makbul vs Shreyas Iyer: భారతీయ టెలివిజన్ రంగంలో తనకంటూ ప్రత్యేక గుర్తింపు తెచ్చుకున్న నటి సనా మక్బూల్. బిగ్ బాస్ ఓటీటీ సీజన్ గెలిచిన తర్వాత ఆమె పాపులారిటీ మరింత పెరిగింది. అయితే, తాజాగా ఒక ప్రముఖ పాడ్కాస్ట్ ఇంటర్వ్యూలో పాల్గొన్న సనా, తన మనసులోని నిజాన్ని బయటపెట్టింది. టీమిండియా డాషింగ్ బ్యాటర్ శ్రేయస్ అయ్యర్ అంటే తనకు అమితమైన ఇష్టమని, ఆయనపై తనకు క్రష్ ఉందంటూ బహిరంగంగానే ఒప్పుకుంది. ఈ ఇంటర్వ్యూ నెట్టింట వైరల్గా మారడంతో క్రికెట్, సినీ వర్గాల్లో సరికొత్త చర్చకు తెరలేచింది.
‘ఆయన అడిగితే నో చెప్పను’.. మనసు పారేసుకున్న భామ..
ఈ ఇంటర్వ్యూలో సనా మక్బూల్ మాట్లాడుతూ.. శ్రేయస్ అయ్యర్ స్టైల్, ఆయన ఆడే విధానం తనకు ఎంతో నచ్చుతాయని తెలిపింది. “ఒకవేళ శ్రేయస్ అయ్యర్ గనుక నన్ను డేటింగ్కు రమ్మని అడిగితే, నేను ఖచ్చితంగా వెనుకాడను. వెంటనే గ్రీన్ సిగ్నల్ ఇచ్చేస్తాను” అంటూ నవ్వుతూ తన ప్రేమను వ్యక్తపరిచింది. గ్లామర్ ప్రపంచంలో ఉన్నప్పటికీ, నటులతో డేటింగ్ చేయడం తనకు అస్సలు ఇష్టం లేదని సనా స్పష్టం చేసింది. నటనారంగంలో స్థిరత్వం (స్టెబిలిటీ) తక్కువగా ఉంటుందని, అందుకే తాను ఇండస్ట్రీకి చెందిన వారిని భాగస్వామిగా ఎంచుకోనని క్లారిటీ ఇచ్చింది. ఇదే సమయంలో టీమిండియా మరో బౌలర్ అర్ష్దీప్ సింగ్ ఆటతీరును, ఆయన లుక్స్ను కూడా సనా మెచ్చుకుంది. అయితే ఆయన అప్పటికే సమ్రీన్ కౌర్తో ప్రేమలో ఉన్నారనే విషయం తనకు తెలుసని పేర్కొంది.
కష్టాల్లో శ్రేయస్ అయ్యర్ జట్టు.. ప్లేఆఫ్స్ ఆశలు సజీవమేనా?
మరోవైపు మైదానంలో శ్రేయస్ అయ్యర్ ప్రస్తుతం తీవ్రమైన ఒత్తిడిని ఎదుర్కొంటున్నారు. ఐపీఎల్ 2026 సీజన్లో ఆయన పంజాబ్ కింగ్స్ జట్టుకు సారథ్యం వహిస్తున్నాడు. టోర్నీ ఆరంభంలో పంజాబ్ జట్టు అద్భుతమైన ప్రదర్శనతో దూసుకుపోయినప్పటికీ, మధ్యలో వరుసగా ఆరు మ్యాచ్లలో ఓడిపోయి లయ తప్పింది. దీంతో పంజాబ్ కింగ్స్ ప్లేఆఫ్స్ అవకాశాలు ప్రస్తుతం సంక్లిష్టంగా మారాయి. లక్నో సూపర్ జాయంట్స్తో జరగబోయే తదుపరి పోరులో పంజాబ్ ఖచ్చితంగా గెలవాల్సిన పరిస్థితి ఏర్పడింది. ఒకవేళ ఆ మ్యాచ్లో ఓడిపోతే అయ్యర్ సేన టోర్నీ నుంచి నిష్క్రమిస్తుంది. విజయం సాధిస్తే మాత్రం.. రాజస్థాన్ రాయల్స్, కోల్కతా నైట్ రైడర్స్ జట్ల ఓటములపై పంజాబ్ ప్లేఆఫ్స్ అవకాశాలు ఆధారపడి ఉంటాయి.
మైదానంలో కెప్టెన్గా శ్రేయస్ అయ్యర్ ప్లేఆఫ్స్ గండం నుంచి తన జట్టును గట్టెక్కించేందుకు చెమటోడుస్తుంటే, బయట మాత్రం సనా మక్బూల్ లాంటి స్టార్ సెలబ్రిటీలు ఆయన కోసం మనసు పారేసుకుంటున్నారు. మరి ఈ సుందరి చేసిన ఓపెన్ లవ్ ప్రపోజల్పై మన స్టార్ క్రికెటర్ శ్రేయస్ అయ్యర్ ఎలా స్పందిస్తారో చూడాలి!
మరిన్ని క్రీడా వార్తల కోసం ఇక్కడ క్లిక్ చేయండి..