Most Sixes: టెస్ట్ క్రికెట్ చరిత్రలోనే అత్యధిక సిక్సర్లు కొట్టిన ఏడుగురు విధ్వంసకర బ్యాటర్లు వీరే
Most Sixes: టెస్ట్ క్రికెట్లో సిక్సర్ల సునామీ సృష్టించిన విధ్వంసకర బ్యాటర్ల జాబితాలో రిషభ్ పంత్ మూడో స్థానానికి చేరాడు. బెన్ స్టోక్స్ 138 సిక్సర్లతో అగ్రస్థానంలో ఉండగా, బ్రెండన్ మెక్కలమ్ 107 సిక్సర్లతో రెండో స్థానంలో ఉన్నాడు. పంత్ 102 సిక్సర్లతో మూడో స్థానంలో నిలిచి, భవిష్యత్తులో స్టోక్స్ రికార్డును బద్దలు కొట్టే అవకాశాలు కనిపిస్తున్నాయి.
Most Sixes: 1877లో ప్రారంభమైన టెస్ట్ క్రికెట్ అంటే సుదీర్ఘ ఓపిక, డిఫెన్స్ బ్యాటింగ్కు చిరునామా. అయితే కొంతమంది విధ్వంసకర బ్యాటర్లు మాత్రం ఈ రొటీస్ స్టైల్ మాకొద్దంటూ టెస్టుల్లోనూ సిక్సర్ల సునామీ సృష్టించారు. క్రికెట్ చరిత్రలో ఇప్పటివరకు కేవలం నలుగురు బ్యాటర్లు మాత్రమే టెస్టుల్లో 100 లేదా అంతకంటే ఎక్కువ సిక్సర్లు సాధించారు. అందులో భారత స్టార్ వికెట్ కీపర్ బ్యాటర్ రిషభ్ పంత్ అత్యంత పిన్న వయస్సులోనే మూడో స్థానాన్ని కైవసం చేసుకుని సంచలనం సృష్టించాడు.
టాప్ స్థానాల్లో ఉన్న దిగ్గజాలు వీరే
1. బెన్ స్టోక్స్ (ఇంగ్లాండ్)
టెస్ట్ క్రికెట్ చరిత్రలోనే అత్యధిక సిక్సర్లు బాదిన ప్రపంచ రికార్డు ఇంగ్లాండ్ మాజీ ఆల్ రౌండర్ బెన్ స్టోక్స్ పేరిట ఉంది. స్టోక్స్ తన 122 టెస్టుల కెరీర్లో ఏకంగా 138 సిక్సర్లు బాది అగ్రస్థానంలో నిలిచాడు. టెస్టుల్లో దాడి చేసే బ్యాటింగ్ శైలికి ఆద్యుడిగా నిలిచి ఈ రికార్డును నెలకొల్పాడు.
2. బ్రెండన్ మెక్కలమ్ (న్యూజిలాండ్)
న్యూజిలాండ్ మాజీ డాషింగ్ ఓపెనర్ బ్రెండన్ మెక్కలమ్ ఈ జాబితాలో రెండో స్థానంలో ఉన్నాడు. తన 101 టెస్టుల సుదీర్ఘ కెరీర్లో ప్రత్యర్థి బౌలర్లపై విరుచుకుపడుతూ 107 సిక్సర్లు బాదాడు.
3. రిషభ్ పంత్ (భారత్)
భారత వికెట్ కీపర్ బ్యాటర్ రిషభ్ పంత్ సరికొత్త చరిత్ర సృష్టించాడు. కేవలం 52వ టెస్ట్ మ్యాచ్ ఆడుతున్న పంత్ ఇప్పటికే 102 సిక్సర్లు పూర్తి చేసుకుని మూడో స్థానానికి చేరాడు. ప్రస్తుతం అంతర్జాతీయ క్రికెట్ ఆడుతున్న యాక్టివ్ ఆటగాళ్లలో 100 కంటే ఎక్కువ టెస్ట్ సిక్సర్లు బాదిన ఏకైక ఆటగాడు పంత్ మాత్రమే కావడం గమనార్హం. ఇదే ఊపు కొనసాగితే బెన్ స్టోక్స్ వరల్డ్ రికార్డును పంత్ తిరగ రాయడం ఖాయంగా కనిపిస్తోంది.
4. ఆడమ్ గిల్క్రిస్ట్ (ఆస్ట్రేలియా)
ఆస్ట్రేలియా దిగ్గజ వికెట్ కీపర్ ఆడమ్ గిల్క్రిస్ట్ 96 టెస్టుల్లో 100 సిక్సర్లు బాది నాలుగో స్థానంలో నిలిచాడు. టెస్టుల్లో వేగంగా పరుగులు సాధించడంలో గిల్క్రిస్ట్ ఒక కొత్త శకానికి నాంది పలికాడు.
5. టిమ్ సౌథీ (న్యూజిలాండ్)
న్యూజిలాండ్ మాజీ వేగవంతమైన బౌలర్ టిమ్ సౌథీ తన లోయర్ ఆర్డర్ బ్యాటింగ్తో 98 సిక్సర్లు సాధించి ఐదో స్థానాన్ని ఆక్రమించాడు. సౌథీ 2024లో తన చివరి టెస్ట్ మ్యాచ్ ఆడాడు.
ఎక్కువమంది చదివినది: Video: దులీప్ ట్రోఫీలో వైభవ్ సూర్యవంశీ జెర్సీపై టేప్.. అసలు సీక్రెట్ ఏంటంటే..?
6. క్రిస్ గేల్ (వెస్ట్రన్ డీస్)
యూనివర్సల్ బాస్ క్రిస్ గేల్ తన సుదీర్ఘ టెస్ట్ ప్రయాణంలో 98 సిక్సర్లు బాదాడు. 2014లో చివరి టెస్ట్ ఆడిన గేల్ ఆరో స్థానంలో ఉన్నాడు.
7. జాక్వెస్ కల్లిస్ (దక్షిణాఫ్రికా)
వరల్డ్ బెస్ట్ ఆల్ రౌండర్లలో ఒకరైన దక్షిణాఫ్రికా దిగ్గజం జాక్వెస్ కల్లిస్ 97 సిక్సర్లతో ఏడో స్థానంలో నిలిచాడు. కల్లిస్ 2013లో అంతర్జాతీయ టెస్ట్ క్రికెట్కు గుడ్బై చెప్పాడు.
టెస్ట్ క్రికెట్ స్టైల్ మారుతుంది అనడానికి ఈ సిక్సర్ల రికార్డులే నిదర్శనం. ప్రస్తుతం అద్భుత ఫామ్లో ఉన్న రిషభ్ పంత్ భవిష్యత్తులో బెన్ స్టోక్స్ ఆల్టైమ్ రికార్డును అధిగమించి అగ్రస్థానంలో నిలిచే అవకాశం స్పష్టంగా కనిపిస్తోంది.
మరిన్ని క్రీడా వార్తల కోసం ఇక్కడ క్లిక్ చేయండి..