GT vs CSK : హాఫ్ సెంచరీలతో విరుచుకుపడ్డ బ్యాటర్లు.. చెన్నై ముందు 230 పరుగుల టార్గెట్
GT vs CSK : ఐపీఎల్ 2026 లో గుజరాత్ టైటాన్స్ బ్యాటర్లు విధ్వంసం సృష్టించారు. గిల్, సుదర్శన్, బట్లర్ హాఫ్ సెంచరీలతో చెన్నై సూపర్ కింగ్స్ ముందు 230 పరుగుల భారీ లక్ష్యాన్ని ఉంచారు. వికెట్ కీపర్ బ్యాటర్ సంజూ శాంసన్ మొదటి ఓవర్లోనే కీపింగ్ చేస్తూ వేలికి తీవ్ర గాయమవడంతో మైదానాన్ని వీడాడు.
GT vs CSK : ఐపీఎల్ 2026 సీజన్ లీగ్ దశ ముగింపునకు వస్తున్న వేళ నరేంద్ర మోదీ స్టేడియం వేదికగా జరిగిన చివరి లీగ్ మ్యాచ్లో గుజరాత్ టైటాన్స్ బ్యాటర్లు విధ్వంసం సృష్టించారు. చెన్నై సూపర్ కింగ్స్తో జరుగుతున్న కీలక పోరులో గుజరాత్ నిర్ణీత 20 ఓవర్లలో 4 వికెట్ల నష్టానికి 229 పరుగుల భారీ స్కోరు సాధించింది. కెప్టెన్ శుభ్మన్ గిల్, సాయి సుదర్శన్, జోస్ బట్లర్ హాఫ్ సెంచరీలతో చెన్నై బౌలర్లకు చుక్కలు చూపించారు. ప్లేఆఫ్స్ ఆశలు సజీవంగా ఉంచుకోవాలంటే చెన్నై జట్టు ఇప్పుడు 120 బంతుల్లో 230 పరుగులు చేయాల్సి ఉంది.
ఈ మ్యాచ్లో టాస్ గెలిచిన చెన్నై సూపర్ కింగ్స్ కెప్టెన్ రుతురాజ్ గైక్వాడ్ మొదట ఫీల్డింగ్ ఎంచుకున్నాడు. పిచ్ కండిషన్స్, చేజింగ్ రికార్డులను మనసులో ఉంచుకుని ఈ నిర్ణయం తీసుకున్నప్పటికీ.. గుజరాత్ ఓపెనర్లు ఆ అంచనాలను తలకిందులు చేశారు. చెన్నై జట్టు ఈ మ్యాచ్లో గుర్జప్నీత్ సింగ్, మాథ్యూ షార్ట్లను తుది జట్టులోకి తీసుకురాగా, గుజరాత్ జట్టు సాయి కిషోర్ స్థానంలో ప్రసిద్ధ్ కృష్ణకు అవకాశం ఇచ్చింది. అయితే చెన్నై బౌలర్ల వ్యూహాలేవీ హోమ్ గ్రౌండ్లో గుజరాత్ బ్యాటర్లను అడ్డుకోలేకపోయాయి.
గుజరాత్ ఇన్నింగ్స్ ప్రారంభించిన కెప్టెన్ శుభ్మన్ గిల్, ఓపెనర్ సాయి సుదర్శన్ మొదటి ఓవర్ నుంచే చెన్నై బౌలర్లపై విరుచుకుపడ్డారు. ముఖ్యంగా శుభ్మన్ గిల్ కేవలం 23 బంతుల్లోనే 5 ఫోర్లు, 3 సిక్సర్లతో హాఫ్ సెంచరీ పూర్తి చేసుకున్నాడు. గిల్ 37 బంతుల్లో 64 పరుగులు చేసి అవుట్ కాగా, అప్పటికే వీరిద్దరూ మొదటి వికెట్కు 125 పరుగుల భారీ భాగస్వామ్యాన్ని నెలకొల్పారు. మరోవైపు సాయి సుదర్శన్ అద్భుత ఫామ్ను కొనసాగిస్తూ ఈ సీజన్లో వరుసగా ఐదో హాఫ్ సెంచరీ నమోదు చేశాడు. సుదర్శన్ 53 బంతుల్లో 7 ఫోర్లు, 4 సిక్సర్లతో 84 పరుగులు చేసి సెంచరీకి చేరువగా వచ్చి అన్షుల్ కాంబోజ్ బౌలింగ్లో అవుటయ్యాడు.
ఓపెనర్లు ఇచ్చిన భారీ పునాదితో వన్ డౌన్లో వచ్చిన స్టార్ బ్యాటర్ జోస్ బట్లర్ కూడా చెన్నై బౌలర్లను వదల్లేదు. కేవలం 23 బంతుల్లోనే 4 ఫోర్లు, 4 సిక్సర్ల సాయంతో బట్లర్ హాఫ్ సెంచరీ బాదాడు. సాయి సుదర్శన్, బట్లర్ జోడి రెండో వికెట్కు కేవలం 28 బంతుల్లోనే 61 పరుగులు జోడించి స్కోరు బోర్డును పరుగులు పెట్టించింది. అయితే ఇన్నింగ్స్ చివరిలో రాహుల్ తెవాటియా ఖాతా తెరవకుండానే రనౌట్ కాగా, చివరి ఓవర్లలో ముఖేష్ చౌదరి కీలక వికెట్ తీసి పరుగుల వేగాన్ని కాస్త నియంత్రించాడు. అయినప్పటికీ గుజరాత్ 229 పరుగుల భారీ స్కోరును బోర్డుపై ఉంచగలిగింది.
ఇన్నింగ్స్ పరంగా భారీ స్కోరు సమర్పించుకున్న చెన్నైకి మ్యాచ్ ప్రారంభంలోనే ఊహించని షాక్ తగిలింది. వికెట్ కీపర్ బ్యాటర్ సంజూ శాంసన్ మొదటి ఓవర్లోనే కీపింగ్ చేస్తూ వేలికి తీవ్ర గాయమవడంతో మైదానాన్ని వీడాడు. అతని స్థానంలో ఉర్విల్ పటేల్ కీపింగ్ బాధ్యతలు చేపట్టాడు. ఇప్పటికే ప్లేఆఫ్స్ రేసులో వెనుకబడి వరుస ఓటములతో సతమతమవుతున్న చెన్నైకి, ఒకవైపు 230 పరుగుల కొండంత లక్ష్యం, మరోవైపు కీలక ప్లేయర్ సంజూ శాంసన్ గాయపడటం కోలుకోలేని దెబ్బగా మారింది.
మరిన్ని క్రీడా వార్తల కోసం ఇక్కడ క్లిక్ చేయండి..